Pablo io tsa ñuu nani Efeso
19
San neni Apolos io tsa Corinto, Pablo ndinoo tsa ndidaa ndaꞌa ñuu san noo tsa Efeso san nanitaꞌan tsa xiꞌin uu ñayii nchiko ñaꞌan xi Jesús. 2 San ndukutoꞌon tsa:—Niꞌi ni Espíritu Santu kii xíninchisa ni Jesucristu ña?
Ndidaa tsa yaꞌa sadaa tsa:
—Nisa ti xini da tu io Espíritu Santu.
3 Pablo sadaa tsa:
—Na modo sendutsa ni tuda?
San ndidaa tsa yaꞌa sadaa tsa:
—kuenta dakuentutsa Juan.
4 Pablo sadaa tsa:
—Juan dákuendutsa ñaꞌan tsa xi ndidaa ñayii nata uꞌu, san xu kadaa tsa sa na kininchisa ñaꞌan ndidaa ñayii ya xi Jesús ia nchiko vaxi.a
5 Ndidaa tsa yaꞌa tsáku s-tsa san xininchisa tsa san sendutsa tsa xiꞌin sa nani ku Toꞌo ndo Jesucristu. 6 Danduu sakindodo Pablo ndaꞌa tsa d̶iki ndidaa tsa yaꞌa, san kíxi Espíritu Santu sa io tsa, san kaꞌan tsa enka daꞌan san kaꞌan tsa toꞌon sañaꞌan Ndios. 7 San uxi-uu tsayee kuu tsa.
8 Uni yoo, io Pablo veꞌe sinagoga san kaꞌan tsa san ti xu dayuꞌu ñaꞌan s-tsa sa ndatoꞌon tsa s-toꞌon Ndios xiꞌin dande-ini tsa ñayii kuan nchoj tsa sa na kininchisa ñaꞌan ndidaa ñayii xi Jesús. 9 Doko dagua tsa kída ntsee diki tsa, san ti nchu kininchisa tsa, san kaꞌan kuiꞌia tsa xi ichi guaꞌa yaꞌa jnu ndidaa ñayii io jukua, danduu Pablo xikokuin tsa jukua xiꞌin ndidaa tsa xininchisa san kuaꞌan tsa xeꞌe en tsa nani Tiranu san jukua xu nataka tsa ndikii sa kaꞌvi tsa s-toꞌon Ndios. 10 Duꞌua ío tsa ubi kuia, juandiku ndidaa ñayii io Asia ñayii kuu judiu xiꞌin ñayii kuu griegu, tsáku xi s-toꞌon Ndios. 11 Ndios xu kada ia kuaꞌa ntseꞌe milagru sa saꞌa Pablo, 12 san dagua ñayii xu kuneꞌe pañetu adi delantar san xu kukoꞌon Pablo san titsaa yaꞌa xu kakindodo tsa sata tsa kuꞌu xi san xu nduguaꞌa tsa xiꞌin xu kakindodo tsa sata tsa xu ku neꞌe tachi kuiꞌia san xu kee.
13 Doko dagua judiu ndinoo tsa kineꞌen tsa tachi kuiꞌia kesaꞌa tsa kaꞌan tsa sa tastuni Jesús sa io ndidaa tsa neꞌe tachi kuiꞌia san kachi tsa:
—Sa tastuni Jesús tsa kaꞌan Pablo taꞌvichiion ntsu xo sa na kee yo xiti nu xan.
14 Jaꞌa xu kada ndi usa d̶aꞌa en tsa nani Esceva, en tsa kuu judiu kunaꞌnu xi ndidaa dutu. 15 Doko tachi kuiꞌia kaꞌan san sadaa:
—Jesús xiꞌin Pablo ku sa xini ntsu andu kuu; doko yoꞌo ndidaa yo, andu kuu yo?
16 San tachi kuiꞌia neꞌe tsayee yaꞌa, kída sa ndagua ntsaa tsa tsa yaꞌa, san kaniaꞌa ntseꞌe tsa san oni kineꞌen nchala ñaꞌan s-tsa ndidaa tsa san datakueꞌe ñaꞌan, san xíno tsa ndidaa tsa. 17 Nitoꞌon ndidaa judiu xiꞌin griegu io Efeso sa duꞌua taꞌan ya. San yuꞌu ntseꞌe tsa ndidaa tsa san duꞌua kuaꞌa ntseꞌe ka ñayii kesaꞌa xininchisa ñaꞌan xi ku Toꞌo ndo Jesús.
18 San ndidaa kuachi kída ndidaa ñayii kuenta ti xu kininchisa tsa Jesús xu naꞌma tsa ndidaa tsa jnu ndidaa ñayii xininchisa ñaꞌan xi Jesús. 19 San duꞌua, kuaꞌa ntseꞌe tsa xu kadachiion xiꞌin magia neꞌe tsa ndidaa tutu xu kadachiion xiꞌin tsa, san ntsaꞌa ndidaa ñayii sa dakayu tsa. San kída tsa kuenta sa kuu kuenta daguacientu mil tuini plata. 20 San duꞌua kaya ka s-toꞌon Ndios ndidaa ñuu.
21 San tuꞌu yaꞌia ndidaa jaꞌa, Pablo sani-ini tsa sa kiꞌin tsa Macedonia xiꞌin Acaya. Na tuꞌu kiꞌin tsa Jerusalén. Kachi tsa: Na tuꞌu ndee ntsu juan san nandeꞌe sa kiꞌin ntsu ku koto ntsu Roma. 22 San tsandaꞌa tsa ubi tsa chintsee ñaꞌan s-tsa Macedonia, tsa nani Timoteu xiꞌin Erastu san kendoo tsa Asia uu ka kii.
Naandodo tsa ndidaa tsa ichi saa yaꞌa ñuu nani Efeso
23 San ndidaa kii yukua kuaꞌa ñayii ñuu Efeso dadiko ini ntseꞌe tsa ñuu sa saꞌa xichi Ndios. 24 Kuan en tsayee nani Demetriu kidachiion xiꞌin plata, tsa xu kadaguaꞌa veꞌe yiki sa xu ku kuu kuenta en veñuꞌu en diosa nani Diana san xu niꞌi ntseꞌe tsa tuini xiꞌin ndidaa jaꞌa. Tsayaꞌa xiꞌin ndidaa tsa kada chiion yaꞌa, 25 Demetriu nadataka tsa ndidaa tsa xu kada chiion yaꞌa san sadaa tsa:
—Xani ntsaꞌa ni sa guaꞌa ntseꞌe niꞌi ndo tuini xiꞌin chiion kida ndo; 26 doko mee ni xini ni xiꞌin tsaku ni sa Pablo nadama tsa sa xininchisa ñayii san adi ni ñuu Efeso ya, nee Asia, Pablo ya kaꞌan tsa sa adi ndios kuu sa kidaguaꞌa ñayii san kuaꞌa ntseꞌe ñayii nadama sa xininchisa. 27 San jaꞌa ntseꞌe ii io, kuan ii io sa ndeꞌe ku chiion ndo xiꞌin ma niꞌi ka ndo tuini san adi jaꞌa kuita ntsandeꞌe veñuꞌu diosa nani Artemisa ya kuita, kuan ntsa vita chiñuꞌu ñaꞌan ntseꞌe ñayii xan, doko ii io san ma en ka chiñuꞌu ñaꞌan xan san kuita sa kidakaꞌnu ñaꞌan xan Asia ya xiꞌin nee ñuyii.
28 San tsaku s-tsa toꞌon yaꞌa san nadiko ntseꞌe s-tsa, san kána tsa ndidaa tsa, san kachi tsa:
—Kaꞌnu ntseꞌe Diana ndidaa Efesiu.
29 San nadiko ntseꞌe xi ndidaa tsa io ñuu yaꞌa san kana tsa. San kuaꞌan tsa ntsa ami nataka ndidaa ñayii ñuu san teen tsa Gayo xiꞌin Aristarco, xuun tsa yaꞌa nduu tsa kuu Macedonia xiꞌin kuu tsa tsa ntsaka taꞌan xiꞌin Pablo. 30 San kuani Pablo nchukee tsa jnu ndidaa tsa yaꞌa, doko ndidaa tsa xininchisa ñaꞌan xi Jesús ti semani tsa. 31 Uu tsa io chiion Asia, mani tsa xiꞌin Pablo, táꞌvichiion tsa sa na kiꞌin ku kadaa xi Pablo sa ma kiꞌin tsa teatru sa nataka ñayii. 32 Tuku tuku kana tsa ndidaa tsa kuan ti xini tsa nasa kaꞌan tsa, san dagua ñayii nisa ti xini naku nataka tsa ndidaa tsa jukua. 33 Uu judiu xíka sa na kiꞌin en tsa nani Alejandru ntsa jnu xi kuan san na kadaa tsa nasa kuu sa taꞌan. San Alejandru, ndaneꞌe tsa ndaꞌa tsa sa na kukadi tsa yaꞌa ndidaa tsa, san nchu natavi tsa mee tsa jnu ñuu ya. 34 San kuenta xíni tsa ndidaa tsa sa tsa yaꞌa ku tsa judiu tuku san kána tsa niꞌi ntseꞌe ndaa ubi ora san kachi tsa:
—Kaꞌnu ntseꞌe Diana ndidaa Efesiu.
35 Danduu duꞌua sadaa secretariu ñuu yaꞌa, kuan kúu kída tsa sa na kukadi ndidaa ñayii yaꞌa san sadaa tsa:
—Nee ñuu Éfeso ya xini sa nandeꞌe sa kuntsaa veñuꞌu Diana ña kee andivi. 36 San jaꞌa ma en nakaꞌnu, guaꞌa ka kadi vii ni kunuꞌu ni sa ma kada ni nisadana. 37 Kuan ntsaka ni tsa yaꞌa san kuadi nasa kuiꞌia kida tsa nisa ti kaꞌan kuiꞌia tsa xi ku diosa ndo ya. 38 Juandiku tu Demetriu xiꞌin ndidaa tsa kidachiion xiꞌin tsa naa tsa xiꞌin en ñayii, san juandiku io ndidaa tsa saꞌntsakuachi san na kiꞌin tsa juan na ku ndaa. 39 San tu kaꞌnu ka en kuachi kuu san na kada ndaa jnu ndidaa tsa nataka tastuni. 40 Sani-ini ni ndidaa sa ii io sa kuidokuachi ndo sa kuu ndo en idi miꞌin ña? ma kachi tavi ndo mee ndo tu na dakuidokuachi ñaꞌan ndidaa tsa tastuni ku ndo.
41 San tuꞌu kaꞌan tsa san danuꞌu tsa ndidaa ñayii yaꞌa.