Duꞌua táꞌan kuenta saꞌa Pablo ñuu nani Corinto
18
Danduu Pablo kée tsa Atenas san kuaꞌan tsa Corinto. 2 San jukua nanitaꞌan tsa xiꞌin en judiu nani Aquila, tsa káku ñuu nani Ponto. Aquila xiꞌin d̶eꞌe tsa Priscila dika ndee tsa Italia, kuan Claudio táꞌvichiion tsa sa ndidaa judiu na kee Roma, Pablo saꞌan tsa sa koto ñaꞌan tsa. 3 Kuan Pablo xiꞌin Aquila xu kiku tsa nduu tsa ñee san xu diko tsa juandiku kendoo tsa xeꞌe Aquila xiꞌin Priscila kuan dii ni chiion yukua xu kada tsa ndidaa tsa. 4 San ndiden sábadoa xu dakuaꞌa ñaꞌan Pablo s-toꞌon Ndios veꞌe sinagoga, san xu nchoj s-tsa sa na kininchisa ndidaa ñayii kuu judiu xiꞌin griegu.5 Kuenta Silas xiꞌin Timoteu kee tsa ñuu Macedonia san saa tsa ñuu Corinto, Pablo xu kaꞌan tsa s-toꞌon Ndios, juan nika xu kada tsa, xu dadana ñaꞌan tsa xi ndidaa judiu, sa Jesús kuu Cristu. 6 Doko ndidaa tsa yaꞌa naxikokaguaꞌa tsa x-kontra Pablo san kaꞌan kuiꞌia tsa xi Cristu, juandiku Pablo kidi tsa d̶oꞌno tsa san sadaa tsa:
—Mee ni kada sa kuita ni, adi x-kuachi mee da kuu; san vita nakiꞌin da sa io ndidaa ñayii ti kuu ñuu Israel ku dadana ñaꞌan da.
7 San kee tsa veꞌe sinagoga san kuaꞌan tsa ku dadana ñaꞌan tsa xeꞌe en tsa nani Ticio Justo, tsa kuu en tsa xininchisa ñaꞌan xi Ndios, san xeꞌe tsa kantsaa taꞌan xiꞌin veꞌe sinagoga. 8 San Crispo, tsa kuu tsa jnu xi veꞌe sinagoga, nee veꞌe tsa xíninchisa ñaꞌan xi Jesús. San kuaꞌa ntseꞌe tsa io Corinto ya ínini ñaꞌan xi Pablo, san xíninchisa tsa Jesús san sendutsa tsa. 9 En niñu nanuu ku Toꞌo ndo Cristu jnu Pablo, san sadaa ia:
—Ma yuꞌu yo, kaꞌan san ma kadi yo xuꞌu yo; 10 kuan ntsuꞌu io ntsu xiꞌin yo, san atuu sa kuiꞌia kada ñayii yo; kuan kuaꞌa ntseꞌe ñayii io ñuu yaꞌa ku ntsu. 11 Pablo kendoo tsa ñuu yaꞌa en yodo kuia, san dakuaꞌa ñaꞌan tsa s-toꞌon Ndios.
12 Kuenta Galión kuu tsa tastuni ñuu Acaya, uu judiu ndatoꞌon tsa san teen tsa Pablo san ntsaka ñaꞌan tsa kuaꞌan jnu tribunal, 13 san sadaa tsa:
—Tsa yaꞌa dakuaꞌa ñaꞌan tsa sa na chiñuꞌu ñaꞌan xi Ndios doko adi kuenta taꞌvichiion sa taꞌvichiion da ndidaa da.
14 Pablo sa io sa kaꞌan tsa doko Galión sadaa tsa xi ndidaa judiu:
—Tu ntseꞌe ni ka kaꞌnu kuachi io jnu, ntsuꞌu kunini ntsu sa kaꞌan yoꞌo ndidaa yo ñayii Israel. 15 Doko ntsuꞌu ma chitaꞌan ntsu ndidaa sa nandodo yo ndidaa yo, tu kuu sa saꞌa toꞌon dadana ñaꞌan dakaa yo san kada ndaa mee yo kuan ntsuꞌu ma chitaꞌan ntsu.
16 San táꞌvichiion tsa sa na kuiko ñaꞌan tsa xi ndidaa tsa yaꞌa. 17 Danduu ndidaa griegu nataka jukua teen tsa Sóstenes tsa kuu jnu xi veꞌe sinagoga san kaniaꞌa tsa jnu tribunal, san Galión ti danuu tsa ndidaa jaꞌa.
18 Doko Pablo, keꞌen ka kii kendoo tsa xiꞌin ndidaa ku kiani ndo danduu dandoo ñaꞌan tsa, san kukee tsa en barku xiꞌin Aquila xiꞌin Priscila san kuaꞌan tsa ichi Siria. San saa tsa ñuu Cencrea jukua datsa Pablo d̶iki tsa, kuan kida tsa en tratu xiꞌin Ndios.b 19 San saa tsa ñuu Éfeso, Pablo dandoo tsa Aquila xiꞌin Priscila san kuaꞌan tsa veꞌe sinagoga san ndatoꞌon tsa xiꞌin ndidaa judiu. 20 Ndidaa tsa yaꞌa sakondaꞌvi tsa sa na kendoo tsa uu ka kii, doko ti kachi tsa, 21 san sadaa tsa:
—Nandeꞌe sa koo da Jerusalén viko vaxi; ndij nituku da jaꞌa tu Ndios na kachi ia.
Dandoo ñaꞌan tsa san kée tsa ñuu Éfeso. 22 San noo tsa barku ñuu Cesarea san saꞌan tsa sa koto tsa congregación io Jerusalén san danduu kunuꞌun tsa ñuu Antioquía. 23 Pablo ío tsa uu kii ñuu Antioquía, san danduu saꞌan tsa sa koto tsa ndidaa ñayii xininchisa ñaꞌan xi Jesús io Galacia xiꞌin Frigia san kidakaꞌnu tsa xanaa ndidaa ñayii xininchisa ñaꞌan xi Jesús san sadaa tsa sa na ndukuntsee ndidaa tsa yaꞌa.
Apolos kaꞌan tsa s-toꞌon Ndios ñuu nani Efeso
24 En judiu nani Apolos io tsa ñuu nani Alejandría saa tsa ñuu nani Efeso en tsayee xini kaꞌan kuu tsa, san xini ntseꞌe tsa s-toꞌon Ndios. 25 Apolos ya guaꞌa ntseꞌe dakuaꞌa tsa xichi Ndios san guaꞌa ntseꞌe dakuaꞌa ñaꞌan tsa xi ndidaa ñayii sa kuu Jesús doko sa xini ni tsa kuu sa dakuendutsa Juan. 26 Kesaꞌa tsa kaꞌan tsa veꞌe sinagoga san ti yuꞌu tsa, san tsaku xi Priscila xiꞌin Aquila san kineꞌen ñaꞌan deen tsa nduu tsa, san dadana ñaꞌan ndeꞌe tsa sa kuu s-toꞌon Ndios. 27 Apolos nchu kiꞌin tsa Acaya, san ndidaa ku kiani ndo ya se mani tsa san tsaa tsa en tutu xi ndidaa tsa xininchisa ñaꞌan xi Jesús sa na nakuaka ñaꞌan tsa. San saa Apolos Acaya san chintsee ñaꞌan ntseꞌe tsa xi ndidaa ñayii xininchisa ñaꞌan xi Jesús ñuu yaꞌa. 28 Kuan jnu ndidaa judiu ndatoꞌon tsa san ti en kachi naxikoneꞌe sa yodotuni s-toꞌon Ndios, kuan sadaa ndaa tsa sa Jesús kuu Cristu.