Nadiko xi ndidaa ñayii io Tesalonica
17
Yaꞌia tsa Anfípolis xiꞌin Apolonia, saa tsa Tesalonica, sa ío en veꞌe sinagoga nataka ndidaa judiu. 2 San kuenta senchiion tsa, Pablo kuyii tsa veꞌe nataka ndidaa tsa yaꞌa, san uni sábadoa ndatoꞌon tsa xiꞌin tsa yaꞌa ndidaa tsa ndidaa sa yodotuni s-toꞌon Ndios, 3 san nakani tsa sa Cristu nandeꞌe sa taꞌan ia xiꞌin sa kuu ia san ndikuu xanaa ia san ndukoo ia sa io ndidaa ndii.—San Jesús, yaꞌa kaꞌan da jni ndidaa ni, kuan ia yaꞌa kuu Cristu.
4 Dagua tsa yaꞌa xíninchisa tsa san nakuaka taꞌan tsa xiꞌin Pablo ya xiꞌin Silas ya: San kuaꞌa ntseꞌe griegu xíninchisa tuku xiꞌin kuaꞌa ntseꞌe ñadeꞌe kutuni xi. 5 Doko dagua judiu ti xininchisa kída kuadu tsa, danduu dataka tsa uu ñayii kuiꞌia san chitoꞌon tsa d̶iki ñayii ñuu yaꞌa. San sayii tsa xeꞌe Jasón, kuan nanduku tsa Pablo xiꞌin Silas sa kuntsaka ñaꞌan tsa kiꞌin jnu ñuu. 6 Doko ti naniꞌi tsa tsa yaꞌa nduu tsa, san ñuꞌu ñaꞌan tsa xi Jasón ya xiꞌin dagua ka ku kiani ndo ya jnu ndidaa kustixa, san ndidaa ñayii kana:
—Ndidaa tsa nadama sa xininchisa ñayii ndasa na taꞌntsa dagua, saa tsa jaꞌa tuku. 7 San xeꞌe Jasón ya io tsa. San ndidaa tsa yaꞌa ti kida tsa sa taꞌvichiion Cesar, kuan kaꞌan tsa sa Jesús kuu rey, san adii Cesar.
8 San ndidaa ñayii ñuu xiꞌin ndidaa kustixa kesaꞌa tsa ndiꞌi xanaa tsa sa tsáku s-tsa ndidaa jaꞌa. 9 Doko chaꞌvi ndasa na dayaa ñaꞌan xi Jasón xiꞌin ndidaa ka tsa xininchisa ñaꞌan xi Jesús.
Pablo xiꞌin Silas io tsa ñuu nani Berea
10 Danduu ti intsatu ka ndidaa ku kiani ndo ya san niñu soꞌno ichi ñaꞌan tsa xi Pablo xiꞌin Silas sa na kiꞌin tsa ñuu nani Berea; san sáa tsa yaꞌa nduu tsa veꞌe sinagoga nataka ndidaa judiu. 11 Ndidaa judiu yaꞌa guaꞌa ka modo tsa sa kuxi ndidaa tsa io Tesalonica, san guaꞌa ntseꞌe i-nini tsa ndidaa tsa san ndikii xu kaꞌvi tsa s-toꞌon Ndios san guaꞌa ntseꞌe xu kunini tsa tu sa ndaa kuu sa kaꞌan Pablo xiꞌin Silas. 12 San kuaꞌa ntseꞌe tsa yaꞌa xíninchisa ñaꞌan xi Jesús; san xininchisa kuaꞌa ñadeꞌe kunaꞌnu kuu griegu ñuu yaꞌa xiꞌin kuaꞌa ntseꞌe tsayee. 13 Doko kuenta nitoꞌon ndidaa judiu io Tesalonica sa s-toꞌon Ndios kaꞌan Pablo xi ndidaa ñayii io ñuu Berea, saꞌan tsa ntsa jukua sa chitoꞌon tsa d̶iki ndidaa ñayii io jukua ndasa na kuiko tsa Pablo. 14 Doko ndidaa ku kiani ndo ndukama ntseꞌe tsa san kineꞌen tsa Pablo san tsandaꞌa ñaꞌan tsa sa io yachi mar doko Silas xiꞌin Timoteu kendoo tsa ñuu Berea. 15 Ndidaa tsa saꞌan sa ntsaka ñaꞌan xi Pablo Atenas naxikokagua tsa san neꞌe tsa toꞌon ku ndixi sa na kiꞌin ni Silas xiꞌin Timoteu san ma kukue tsa san ntsa jukua sadaa tsa sa naniꞌi taꞌan tsa ndidaa tsa.
Duꞌua táꞌan kuenta ío Pablo ñuu nani Atenas
16 San neni ntsatu Pablo xi Silas xiꞌin Timoteu ñuu Atenas san uꞌu ntseꞌe taꞌan tsa sa xíni tsa sa yedika kuaꞌa ntseꞌe idolo nee ñuu yukua. 17 Juandiku, ndatoꞌon tsa xiꞌin ndidaa judiu io veꞌe sinagoga xiꞌin ñayii xininchisa ñaꞌan xi Ndios nchisa xiꞌin ñayii xu yaꞌia jnu yaꞌvi. 18 San dagua filosofo epicúreo xiꞌin estoico ndatoꞌon xiꞌin tsa. San uu tsa kachi:
—Nasa kuu sa kaꞌan tsa naꞌntsa yaꞌa.
San dagua tsa kachi:
—Kuenta kaa tsa kaꞌan s-toꞌon enka Ndios ti xini ndo kaa tsa.
Kuan toꞌon xu kadaa tsa kuu toꞌon guaꞌa xaꞌan Jesús xiꞌin sa nandoto ia. 19 Danduu ntsaka ñaꞌan tsa ndidaa tsa kuaꞌan jnu Areópago san sadaa tsa:
—Nchu ni toꞌon ka da ndidaa da nasa kuu ndidaa toꞌon saa dadana ñaꞌan ni xan. 20 Kuan ndidaa toꞌon kaꞌan ni ti on tsaku da, juandiku nchukini da ndidaa nasa nchukachi.
21 Kuan ndidaa ñayii io Atenas, xiꞌin ndidaa ñayii xu kiꞌin ñuu yukua atuu ka chiion xu kada tsa meni sa xu nataka tsa sa ndatoꞌon tsa adi sa kunini tsa sa saa yaꞌia.
22 Pablo kukuin tsa dagua dagua Areópago san kachi tsa:
—Ndidaa dini ñayii io Atenas: Ntsaꞌa da sa ntseꞌe chiñuꞌu ni ndios ndidaa ni. 23 Kuan kuenta yaꞌia da xuun ni san xini da en sa yedika san yodotuni: sa kuxi Ndios ti xini ndo. Ndios kidakaꞌnu ni ndidaa ni san kachi ni sa ti xini ni, ia yukua ku ia kaꞌan da jni ndidaa ni.
24 Ndios yaꞌa, kídaguaꞌa nee ñuyii xiꞌin ndidaa sa io. Kuu ia s-toꞌo andivi xiꞌin ñuꞌu ya, san ia yaꞌa ti io ia veꞌe kuguaꞌa xiꞌin ndaꞌa ñayii, 25 San nisa ti nandeꞌe sa chidika ñaꞌan ndidaa ñayii xi ia, kuan ia yaꞌa ku ia sañaꞌan ñuyii xiꞌin tachi xi ndidaa sa io.b
26 San kída guaꞌa ia endini tsie, san endini tsie kída ia sa na kaya kuaꞌa ntseꞌe ñayii, kuan ndasa nakoo ndidaa ñayii ñuyii. San ia yaꞌa tástuni sa duꞌua nakoo ñayii ndiden ñuu, 27 kuan ndasa na nanduku ñayii Ndios, kuan ami kuu mee naniꞌi ndo Ndios. Kuan kuadi io xika ia sa io ndo ndidaa ndo; 28 kuan ia yaꞌa kida sa io ndo, nchito ndo xiꞌin kani ndo. Kuan duꞌua kachi tsa kanandodo io xuun ni ya: Sa ndaa nchisa sa kuu ndo d̶aꞌa Ndios. 29 Tu kuu ndo d̶aꞌa Ndios, ma kani-ini ndo sa Ndios kuu ia kuenta oro, adi plata adi yuu dandenaꞌa ñayii, kuan ti kaa ia kuenta sani-ini ñayii. 30 Ndidaa ñayii ío diꞌna, ti dánuu ia ndidaa sa kuiꞌia xu kada ndidaa ñayii yukua, doko vita san taꞌvichiion ia xi ndidaa ñayii, sa na nata-uꞌu ñayii sa saꞌa ndidaa kuachi kida ñayii; 31 Kuan ntsatu en kii ndakakuachi ia xi ñayii ñuyii, xiꞌin sa ndaa, sa saꞌa Jesús ia tsandaꞌa ia, san Ndios ndekaxaꞌan xi Jesús sa na ku kuu ia, ia saꞌntsa kuachi xi ndidaa ñayii, san jaꞌa dadana ñaꞌan ia sa Jesús kuu ia saꞌntsa kuachi, kuenta kída ia sa nandoto Jesús sa io ndidaa ndii.
32 Doko kuenta tsaku s-tsa ndidaa tsa sa kaꞌan Pablo ya, sa nandoto ndidaa ndii, san dagua tsa sakuntsaa ñaꞌan, doko dagua tsa kachi:
—Kunini ñaꞌan ntsu yo en ka kii.