Timoteu kuaꞌan tsa xiꞌin Pablo xiꞌin Silas
16
Saa tsa ñuu nani Derbe xiꞌin ñuu nani Listra, san jaꞌa io en nu xininchisa ñaꞌan xi Jesús nani Timoteu, d̶aꞌa en ñadeꞌe ñuu Israel en ña xininchisa, doko s-tata nu kuu tsa Griegu; 2 kuu nu en ñayii guaꞌa xi ndidaa ku kiani ndo io Listra xiꞌin Iconio. 3 Pablo nchoj s-tsa sa Timoteu ya na kiꞌin nu xiꞌin tsa san kida circuncidara tsa nu sa saꞌa ndidaa ñayii Israel io ñuu yukua, kuan ndidaa tsa xini sa s-tata nu kuu tsa griegu juandiku vita kada circuncidar ka nu. 4 Yaꞌia tsa ndidaa ñuu, san sañaꞌan tsa xi ndidaa tsa kuu jnu xi ndidaa sa taꞌvichiion yodotuni sa ndatoꞌon ndidaa apóstol xiꞌin ndidaa tsa kuu jnuu xi io Jerusalén ndasa na kada tsa yaꞌa ndidaa tsa. 5 San duꞌua ndidaa congregación ya xininchisa ntseꞌe ka, san ndikii xu kaya ka ñayii xininchisa ñaꞌan xi Jesús.Na nuu en sa nanuu jnu Pablo san xini tsa en tsayee io ñuu nani Macedonia
6 San yaꞌia tsa Frigia xiꞌin Galacia, kuan ti se on Espíritu Santu sa kaꞌan tsa toꞌon yaꞌa Asia. 7 San kuyachi tsa Misia, nchu kiꞌin tsa Bitinia doko Espíritu ti kachi. 8 Danduu yachi yaꞌia tsa Misia san noo tsa Troas. 9 San niñu yukua, nanuu jnu Pablo xiti viaꞌna in en tsayee io Macedonia sakondaꞌvi tsa san sadaa tsa: Kuaꞌan ni Macedonia san chintsee ñaꞌan ni d̶a ndidaa da. 10 Kuenta tuꞌu xini Pablo sa nanuu jnu tsa, san ndatoꞌon da ndidaa da sa kiꞌin da Macedonia, kuan xiniguaꞌa da ndidaa da sa Ndios kana ñaꞌan ia sa na kaꞌan da ndidaa da s-toꞌon guaꞌa ia xi ndidaa ñayii io ñuu yukua.
Pablo xiꞌin Silas yeꞌe tsa vekaa en ñuu nani Filipos
11 Troas kukee da barku ndidaa da san kuaꞌan ndaa da Samotracia san nduu enka kii saa da Neápolis; 12 danduu kuaꞌan da ndidaa da Filipos, sa kuu en ñuu kaꞌnu xuun Macedonia san kuu en colonia romana. San ío da keꞌen kii ñuu yukua. 13 San en sábadob kee da ñuu sa io yachi jnu yutsa io jukua, kuan sani-ini da ndidaa da sa jukua nataka ndidaa judiu sa kakataꞌvi tsa xi Ndios. Kukoo da ndidaa da jukua san kaꞌan da s-toꞌon Ndios xi ndidaa ñadeꞌe xuku jukua. 14 Io en ñadeꞌe nani Lidia juan, ña yaꞌa diko ña titsaa kuu púrpura io ña ñuu nani Tiatira. Ña yaꞌa xininchisa ña Ndios san nini ña ndidaa sa kaꞌan Pablo, kuan Ndios kída sa na kunini ña. 15 San sendutsa Lidia nee veꞌe ña, danduu kána ñaꞌan ña xeꞌe ña san sadaa ña:
—Tu sani-ini ni sa xininchisa da ku Toꞌo ndo Jesucristu san na kiꞌin ndo xeꞌe da ndidaa ni san kendoo ni. San kída juerza ña sa na kendoo da ndidaa da.
16 San ichi kuaꞌan da ndidaa da sa kakataꞌvi da xi Ndios, saa en nudeꞌe kuachi kuu nu esclava san neꞌe nu en tachi kuiꞌia sa kida sa na nakinituni nu, san xu niꞌi ntseꞌe s-toꞌo nu tuini sa saꞌa chiion xu kada nu. 17 San nuyaꞌa sakuita nchiko ñaꞌan nu d̶a nduu da Pablo ya san kána nu san kachi nu:
—Ndidaa Ñayii yaꞌa kidachiion ña xi Ndios kaꞌnu ntseꞌe, san kachi toꞌon ña na modo nanitaꞌvi ndo.
18 San keꞌen kii duꞌua xu ku kuu nu. Pablo ti kuyakui ka tsa, san naxikokagua tsa san sadaa tsa xi tachi yaꞌa:
—Xiꞌin sa tastuni Jesucristu, taꞌvichiion ntsu sa na kee yo xiti nudeꞌe xan. San dii ni ora yukua kée tachi kuiꞌia.
19 Doko xíni ndidaa s-toꞌo nudeꞌe ya sa ma kada ka sa niꞌi tsa ndidaa tsa tuini xiꞌin nu, san teen tsa ndidaa tsa Pablo xiꞌin Silas san ndiñuꞌu ñaꞌan tsa, san ntsaka ñaꞌan tsa ndidaa tsa kuaꞌan jnu ndidaa tsa tastuni io ñuu. 20 San saa tsa jnu ndidaa tsa tastuni san sadaa tsa:
—Tsayee yaꞌa nduu tsa kuu tsa ñayii Israel san chiyutu tsa ku kiun ndo, 21 san neꞌe tsa costumbre sa ti guaꞌa sa kininchisa ndo xiꞌin sa kada ndo kuan romanu kuu ndo!
22 Danduu ndidaa ñayii io ñuu yaꞌa nataka jnu tsa. San ndidaa tsa tastuni, ndata tsa d̶oꞌno tsa yaꞌa san taꞌvichiion tsa sa na kaniaꞌa s-tsa nduu tsa xiꞌin en vara. 23 San tuꞌu kaniaꞌa ntseꞌe tsa, chiñaꞌan tsa vekaa s-tsa yaꞌa nduu tsa san táꞌvichiion tsa xi tsa ntsaa vekaa sa na kuntsaa ñaꞌan guaꞌa tsa. 24 Tsa yaꞌa kída tsa sa táꞌvichiion s-tsa, san chiñaꞌan tsa veꞌe yiki io ntsa xiti vekaa san chodama tsa saꞌa tsa yaꞌa nduu tsa xiꞌin ubi yutu kaꞌnu.
25 Kuu ndaa dagua niñu, Pablo xiꞌin Silas kaꞌan tsa xi Ndios xiꞌin xita tsa xi Ndios, san ndidaa ka tsa yeꞌe vekaa nini tsa. 26 Danduu kikii ni kíxi en sa kanda niꞌi ntseꞌe, san ntsa sa dama saꞌa vekaa kanda. San nono ni nakaan ndidaa ndieꞌe xi, san cadena nuꞌni tsa ndidaa tsa nayaa. 27 Tsa ntsa vekaa ndikuu xanaa tsa san xini tsa sa ndidaa ndieꞌe vekaa nuna juandiku kineꞌen tsa x-espada tsa san sa io sa kaꞌni tsa mee tsa, kuan sani-ini tsa sa ndidaa tsa yeꞌe vekaa kuaꞌan. 28 Doko Pablo kána tsa san sadaa tsa:
—Kuntsatu ni ma duꞌua kada ni jni, kuan adi da yaꞌa ndidaa da.
29 Xíka tsa en kandil san xino tsa kuyii tsa, san oni kidi ñaꞌan s-tsa saa tsa sa io tsa yaꞌa nduu tsa, san sa kuinxiti tsa jnu Pablo xiꞌin Silas. 30 Kineꞌen ñaꞌan tsa ndikeꞌe san sadaa tsa:
—Nasa kada da ndasa na nanitaꞌvi da.
31 Tsa yaꞌa sadaa tsa:
—Kininchisa ni ku Toꞌo ndo Jesús san nanitaꞌvi ni xiꞌin ndidaa ñayii io xeꞌe ni.
32 San kaꞌan tsa s-toꞌon Ndios s-tsa yaꞌa xiꞌin ndidaa ñayii io xeꞌe tsa. 33 San dii ni niñu yukua tsa ntsaa vekaa, nakatsa tsa sa takueꞌe s-tsa yaꞌa nduu tsa, san danduu sendutsa tsa xiꞌin ndidaa ñayii io xeꞌe tsa. 34 San ntsaka ñaꞌan tsa xi Pablo ya xiꞌin Silas ya saꞌan xeꞌe tsa san sañaꞌan tsa sa saj s-tsa yaꞌa nduu tsa kuan ku-iꞌni ntseꞌe tsa sa nee veꞌe tsa xíninchisa ñaꞌan xi Ndios.
35 San kuenta yéꞌe, ndidaa tsa tastuni tsandaꞌa tsa uu oficial sa na kadaa tsa: Dayaa nduu nu xan. 36 San tsa ntsaa vekaa sadaa tsa toꞌon yaꞌa xi Pablo:
—Ndidaa tsa tastuni táꞌvichiion tsa sa na kineꞌen ñaꞌan da jni; ti kee ni san kunuꞌu ni xiꞌin Ndios.
37 Doko Pablo sadaa tsa:
—Dan nduu da kuu da romanu san kaniaꞌa tsa ndidaa tsa d̶a san ti danaꞌma ñaꞌan tsa, san chiñaꞌan tsa vekaa d̶a nduu da san nisa ti kachi toꞌon tsa nasa xidokuachi da, san vita nchu kineꞌen ñaꞌan yuꞌu tsa doko ma kada, nakij mee tsa kineꞌen ñaꞌan tsa.
38 San ndidaa oficial ya sadaa tsa toꞌon yaꞌa xi juez, san yuꞌu tsa yaꞌa ndidaa tsa kuenta tsaku s-tsa sa nduu tsa yaꞌa kuu tsa romanu. 39 Saꞌan tsa sa io tsa yaꞌa san xika tsa sa kaꞌnu-ini. San tuꞌu kineꞌen ñaꞌan tsa, san sakondaꞌvi tsa jnu Pablo xiꞌin Silas sa na kee tsa ñuu yaꞌa. 40 Danduu kee tsa vekaa san kunuꞌu tsa xeꞌe Lidia; san xíni tsa ndidaa ku kiani ndo, san sadaa tsa sa na ndukuntsee ndidaa tsa yaꞌa xiꞌin sa xininchisa tsa, san danduu kuaꞌan tsa.