Nataka ndidaa ñayii xininchisa ñaꞌan xi Jesús ñuu Jerusalén
15
Uu tsa kee Judea saꞌan tsa Antioquía san dadana ñaꞌan tsa xi ndidaa ku kiani ndo: Tu makada circuncidara ni kuenta chidotuni Moisés,b san ma nanitaꞌvi ni. 2 Pablo xiꞌin Bernabé natoꞌon tsa xiꞌin ndidaa tsa yaꞌa san ndidaa tsa kachi sa na kiꞌin Pablo ya xiꞌin Bernabé ya xiꞌin uu ka tsa xininchisa ñaꞌan xi Jesús nakiꞌin tsa Jerusalén san na ndatoꞌon tsa jaꞌa xiꞌin ndidaa tsa tsandaꞌa Jesús xiꞌin tsa kuu jnu xi io jukua.3 San congregación kuan tsándaꞌa ñaꞌan s-tsa yaꞌa nduu tsa kuaꞌan tsa, san yaꞌia tsa ñuu nani Fenicia xiꞌin ñuu nani Samaria, san nakani tsa sa kuaꞌa tseꞌe ñayii ti kuu ñuu Israel xíninchisa ñaꞌan xi Jesús; san ku-iꞌni ntseꞌe ndidaa ku kiani ndo io jukua.
4 San kuenta saa tsa Jerusalén, saꞌan tsa sa io congregación xiꞌin apóstol xiꞌin ndidaa tsa kuu jnuu xi san nakani tsa ndidaa sa kida Ndios xiꞌin tsa. 5 Doko uu fariseu tsa xininchisa ñaꞌan xi Jesús ndukuin tsa san sadaa tsa:
—Nandeꞌe sa kada circuncidarc tsa, san na taꞌvichiion s-tsa sa na kada tsa sa kachi ley.
6 San danduu nataka ndidaa apóstol xiꞌin ndidaa tsa kuu jnu xi sa ndatoꞌon tsa nasa kuu sa kada tsa. 7 Naꞌa ntseꞌe ndatoꞌon tsa ndidaa tsa san ti kutuni-ini san Pedru ndukuin tsa san sadaa tsa:
—Xanii, dini ndidaa ni xini ni sa ntsa diꞌna Ndios ndekaxaꞌan ia d̶a ndasa nakaꞌan da toꞌon guaꞌa yaꞌa xi ndidaa ñayii ti kuu ñuu Israel san na kininchisa tsa ndidaa tsa.d 8 San Ndios, ia xini ndidaa sa ñoꞌon ku kuanaa ndo, xíniguaꞌa ñaꞌan ia xi kuaꞌa ñayii ti kuu ñuu Israel juandiku sañaꞌan ia Espíritu Santue duꞌua kuenta taxi ia ku mendo ndidaa ndo;f 9 kuan Ndios ti ntsaꞌa ia ncha ndaa ndidaa ñayii yaꞌa, kuan ndadandoo ia xanaa tsa ndidaa tsa kii xininchisa tsa Jesús. 10 San vita naku xitotuni ni ndidaa ni Ndios, san nchoj ni sa tsa yaꞌa ndidaa tsa na kada tsa en sa vixi, sa nisa mee ndo ndidaa ndo, san nisa ku tadeꞌe ndo ti kachi kada. 11 Kuan sa saꞌa sa xíninchisa ndo sa kída Jesucristu juandiku nanitaꞌvi ndo san duꞌua ni ndidaa tsa ti kuu ñuu Israelg tuku.
12 San ndidaa tsa yaꞌa sádi tsa xuꞌu tsa. San nini tsa sa kaꞌan Bernabé xiꞌin Pablo, san nakani tsa modo senchiion ñaꞌan Ndios s-tsa nduu tsa sa na kada tsa ndidaa señal xiꞌin milagru kida Ndios xi ndidaa ñayii ti kuu ñuu Israel. 13 Tuꞌu kaꞌan tsa yaꞌa nduu tsa, Jacobo kaꞌan tsa san sadaa tsa:
—Xani, kunini ni na kaꞌan da: 14 Simón ya nakani tsa sa Ndios ntsaa kuenta kesaꞌa kaꞌan toꞌon guaꞌa ya xi ndidaa ñayii ti kuu ñuu Israel kunda-ini ñaꞌan ia xi ndidaa ñayii yaꞌa san duꞌua kida ia en ñuu na kadakaꞌnu ñaꞌan xi ia. 15 San dini ndidaa toꞌon yaꞌa kuu sa chidotuni ndidaa tsa kaꞌan x-kuenta Ndios, sa yodotuni:
16 Na tuꞌu jaꞌa san ndij nituku ntsu
san ndada ndaa ntsu xeꞌe David, kuan ndugua.
Ndada ndaa nituku ntsu ndidaa sa xita nu,
san ndaneꞌe nituku ntsu,
17 Ndasa ndidaa ñayii na kini ñaꞌan xi Ndios
xiꞌin ndidaa ñayii ti kuu ñuu Israel, ndidaa nu na kininchisa ñaꞌan kuntsu, duꞌua kachi Ndios:
18 Ntsuꞌu kuu Ndios nu ndidaa nu kuan duꞌua kachi ntsu ntsa kukagua ñuyii.h
19 Ndidaa ñayii ti kuu ñuu Israel xininchisa Ndios juandiku dan sani-ini da sa ti nandeꞌe sa taꞌvichiion ndo sa na kada tsa sa vixi yodotuni sa kada ndo ndidaa ndo, 20 guaꞌa ka tu na chidotuni san na tsandaꞌa s-tsa, sa ma kaj tsa comida kuguaꞌa sa chiñuꞌu tsa ndidaa idolo,i san ma en kada sakanuu xiꞌin xikikoño xij xiꞌin ma kaj tsa kiti tata xiꞌi niꞌno mee xiꞌin ma en kaxi niñi te.k 21 Nakaꞌan ni ndidaa ni sa naku vita dakuaꞌa ñaꞌan ley ndidaa xichi san ntsoo ndidaa ndo kaꞌan kundo ndiden kii ndexavi.l
22 San ndidaa apóstol xiꞌin tsa ku jnuu xi xiꞌin congregación ndekaj s-tsa uu tsa yee sa na kiꞌin tsa Antioquía xiꞌin Pablo xiꞌin Bernabé: san tsandaꞌa tsa Judas tsa kaꞌan tsa Barsabás xi xiꞌin Silas, tsa kuu tsa ku jnuu xi sa io ndidaa ku kiani ndo; 23 san tsa yaꞌa neꞌe tsa tutu yodotuni sa kachi:
“Tsaa da ndidaa da ni, dan tsandaꞌa Jesús xiꞌin tsa kunaꞌnu xiꞌin ndidaa ku kiani ndo ya, sa kuxi ndidaa ku kiani ndo ndidaa ñayii ti kuu ñuu Israel io Antioquía, Siria xiꞌin Cilicia, kaꞌan da xi. 24 Kuan niꞌitoꞌon da ndidaa da sa uu ñayii kee sa io da saꞌan sa io ni ndidaa ni doko dan ti tsandaꞌa ñaꞌan da ndidaa da, tsa yaꞌa ndidaa tsa dadana ñaꞌan tsa, kuan kachi tsa sa na kada circuncidarm ni xiꞌin na kada ni ndidaa sa taꞌvichiion ley, 25 san ndatoꞌon da ndidaa da sa tsandaꞌa da uu ku kiani ndo na kiꞌin xiꞌin Bernabé ya nduu tsa Pablo tsa xinimani da san na kiꞌin tsa sa io ni ndidaa ni xan, 26 Tsa yaꞌa saꞌntsa-ini tsa mee tsa sa saꞌa ku Toꞌo ndo Jesucristu. 27 Juandiku tsandaꞌa da Judas ya xiꞌin Silas ya, sa na kachi toꞌon ndaa tsa na modo io. 28 Kuan taꞌa-ini ñaꞌan Espíritu Santu xiꞌin dan ndidaa da sa ma koo ka sa vixi ka kada ni ndidaa ni sa kuxi ndidaa ni jaꞌa: 29 Ma eni kaxi x-koño kiti tata kuguaꞌa sa chiñuꞌu idolo, nisa niñi kiti xiꞌi nino mee xiꞌin sa ma koo ni xiꞌin ñadeꞌe ti tandaꞌa xiꞌin ni. Tu ti kida ni ndidaa jaꞌa sa guaꞌa ntseꞌe kida ni. Kada ntse-ini ni ndidaa ni.”
30 Danduu Bernabé, Pablo, Judas xiꞌin Silas kuaꞌan tsa ñuu nani Antioquía. Saa tsa ndidaa tsa jukua san nadataka tsa congregación san nakua ñaꞌan tsa carta; 31 San tuꞌu kaꞌvi tsa carta, san ku-iꞌni ntseꞌe tsa sa tsaku s-tsa ndidaa toꞌon kaꞌnu-ini yodotuni. 32 Judas tsa nani Barsabás xiꞌin Silas kuu tsa profeta tuku, sañaꞌan tsa toꞌon kaꞌnu-ini xiꞌin kida kaꞌnu tsa xanaa ndidaa tsa yaꞌa. 33 San ío tsa uu kii jukua san naxikokagua tsa san oni kukaꞌnu xanaa tsa kunuꞌu tsa sa io ndidaa ka tsa xininchisa tsandaꞌa ñaꞌan s-tsa. 34 Doko Silas sani-ini tsa sa guaꞌa ni kendoo tsa san kendoo tsa. 35 Juandiku Pablo xiꞌin Bernabé kendoo tsa Antioquía, san dadana ñaꞌan tsa s-toꞌon guaꞌa Ndios xiꞌin kuaꞌa ntseꞌe ka ku kiani ndo io jukua.
Pablo saꞌan nituku tsa viaji xiꞌin Bernabé jaꞌa ku viaji ku uu
36 Yaꞌia kuaꞌa kii, Pablo sadaa tsa xi Bernabé:
—Nakiꞌin ndo ku koto ndo ndidaa ku kiani ndo, tsa io ndidaa ñuu saꞌan ndo sa kaꞌan ndo s-toꞌon Ndios, na kuntsaꞌa ndo ncha kuu tsa ndidaa tsa.
37 Bernabé nchu kuntsaka tsa Juan tsa kaꞌan tsa Marcos xi; 38 doko Pablo ti semani tsa kuan dandoo ñaꞌan tsa kuenta io tsa Panfilia n san ntsa ora yukua ti saꞌan tsa chiion yukua. 39 San natoꞌon tsa juandiku Bernabé kuaꞌan tsa xiꞌin barku nduu tsa Marcos Chipre; 40 san tuꞌu nachoꞌon ñaꞌan ndidaa ku kiani ndo ya ndaꞌa Ndios xi Pablo xiꞌin Silas kuaꞌan tsa. 41 Ndinoo tsa Siria xiꞌin Cilicia, xu taꞌvichiion tsa sa na nduku ntsee ndidaa congregación.