Pablo xiꞌin Bernabé io tsa ñuu nani Iconio
14
Saa Pablo xiꞌin Bernabé ñuu nani Iconio san kuyii tsa nduu tsa veꞌe sinagoga nataka ndidaa judiu san kaꞌan tsa s-toꞌon Ndios san kuaꞌa ntseꞌe judiu xiꞌin Griegu xíninchisa. 2 Doko ndidaa judiu ti xininchisa kida tsa sa na kini uꞌu ñaꞌan ñayii ti kuu ñuu Israel xi ku kiani ndo ya nduu tsa. 3 Doko Pablo xiꞌin Bernabé naꞌa io tsa kaꞌan tsa s-toꞌon Ndios san xu káꞌan tsa san ti xu dayuꞌu ñaꞌan s-tsa, kuan xu kukaꞌnu-ini tsa ku Toꞌo ndo san xu kada ia sa na kuu kaꞌan tsa j-gracia ia xiꞌin sa na kada tsa señal xiꞌin milagru. 4 Ñayii ñuu yaꞌa taꞌntsadagua: dagua tsa io j-ladu ndidaa ñayii Israel san dagua tsa io j-ladu ndidaa tsa tsandaꞌa Jesús. 5 Ndatoꞌon ndidaa ñayii Israel xiꞌin tsa tastuni xiꞌin ndidaa ka tsa ti kuu ñuu Israel sa chidoyuu ñaꞌan tsa, 6 San niꞌitoꞌon Pablo xiꞌin Bernabé san kee tsa kuaꞌan tsa Listra xiꞌin Derbe, xuun Licaonia, xiꞌin ndidaa ka ñuu io yachi. 7 San jukua káꞌan tsa s-toꞌon guaꞌa Ndios.Sañaꞌan tsa ndidaa tsa yuu xi Pablo en ñuu nani Listra
8 Listra ya ío en tsayee ti xu kachi kaka. 9 Tsayaꞌa tsaku s-tsa sa kaꞌan Pablo ya, Pablo ya nantsaꞌa ñaꞌan tsa san xíni tsa sa xininchisa tsa yaꞌa sa guaꞌa ni nduguaꞌa tsa. 10 San niꞌi sadaa tsa:
—Ndukuin.
San tsa yaꞌa ndukuin kono tsa san xíka tsa. 11 San xini ndidaa ñayii sa kída Pablo ya, san kana tsa ndidaa tsa san kaꞌan tsa daꞌan licaónica:
—uu ndios noo sa io ndo, san nduu tsa ñayii.
12 San danani ñaꞌan tsa ndidaa tsa xi Bernabé Zeus san xi Pablo Hermes, kuan tsa yukua kuu tsa káꞌana. 13 Danduu dutu io x-veñuꞌu Zeus sa io ndikeꞌe ñuu, ntsaka tsa ndikutu xiꞌin itavili saa ntsaa ndieꞌe, san dutu ya xiꞌin ndidaa ñayii ñuu nchú chiñuꞌu ñaꞌan tsa xi nduu tsa yaꞌa. 14 Kuenta tsaku xi nduu apóstol Bernabé ya xiꞌin Pablo, san ndáta tsa d̶oꞌno tsa san kuyii tsa sa xuku ndidaa tsa yaꞌa san kána tsa:
15 — Naku nchukada ni ndidaa ni jaꞌa? Ñayii kuu da tuku; adi Ndios kuu da. Vaj da ki kaꞌan da toꞌon guaꞌa jni ndidaa ni xiꞌin vaj da ki kachi toꞌon da sa na na kininchisa ni Ndios xiꞌin na dandoo ni ndidaa sa kida ni ya, san kininchisa ni Ndios kídaguaꞌa andivi, mar xiꞌin ndidaa sa io. 16 Ndidaa ñayii io diꞌna, Ndios dandoo ia sa na kada tsa yukua nasa nchoj mee tsa; 17 doko dadana ñaꞌan ia sa guaꞌa ia ku ndo ndidaa ndo, kuan ndikii tsandaꞌa ia davi ntsa andivi ku ndo, san duꞌua kida sa nakoo sa kaj ndo xiꞌin na ku-iꞌni ndo.
18 San sadaa tsa ndidaa toꞌon yaꞌa xi ñuu ya doko taꞌa nika sa chiñuꞌu ñaꞌan tsa xi Pablo xiꞌin Bernabé kuan sani-ini tsa sa ndios kuu tsa.
19 Ntsaa Antioquía xiꞌin Iconio kixi uu judiu, sa chitoꞌon tsa diki ndidaa tsa io Listra san chidoyuu ñaꞌan tsa xi Pablo ya san sani-ini tsa sa xiꞌi Pablo ya juandiku ñuꞌu ñaꞌan tsa kineꞌen ñaꞌan tsa ndikeꞌe ñuu. 20 Ndidaa tsa xininchisa ñaꞌan xi Jesús táka tsa sa katuu Pablo san ndukuin tsa san kunuꞌu tsa ñuu. San nduu yutsa kee tsa kuaꞌan tsa xiꞌin Bernabé ñuu nani Derbe.
21 San tuꞌu kaꞌan tsa toꞌon guaꞌa san kuaꞌa ntseꞌe ñayii xininchisa ñaꞌan xi Jesús, san naxikokagua tsa nduu tsa kunuꞌu tsa ñuu nani Listra, ñuu nani Iconio xiꞌin ñuu nani Antioquía, 22 sa koto ñaꞌan tsa nduu tsa xi ndidaa tsa xininchisa io ñuu yaꞌa, san sadaa tsa sa na ndukuntsee tsa kuan na kutuꞌua ka tsa xiꞌin na kininchisa ka tsa. San sadaa tsa: Nandeꞌe sa taꞌan ntseꞌe ndo dana yii ndo sa tastuni Ndios ñayii. 23 San ndekaj s-tsa tsa kuu jnuu xi sa na ntsaꞌa ñaꞌan xi ndiden en x-congregación Ndios, san tuꞌu xikataꞌvi tsa xiꞌin ñonchitsa tsa, san nachoꞌon tsa ndidaa tsa yaꞌa ndaꞌa Ndios ia xininchisa tsa ndidaa tsa.
Pablo xiꞌin Bernabé naxikokagua tsa ñuu nani Antioquía
24 San yaꞌia tsa Pisidia san saa tsa Panfilia; 25 danduu saꞌan tsa Perge tuꞌu kaꞌan tsa s-toꞌon Ndios Perge, danduu kuaꞌan tsa ñuu nani Atalía. 26 San jukua kukee tsa barku san kunuꞌu tsa ñuu nani Antioquía, ñuu yaꞌa kuu ñuu xíkataꞌvi tsa xi Ndios sa na chintsee ñaꞌan ia xi Pablo xiꞌin Bernabé sa saꞌa chiion kída tsa nduu tsa. 27 San nasaa tsa nduu tsa san nadataka tsa congregación io ñuu yaꞌa, san nakani tsa ndidaa sa kída Ndios xi ñayii, sa saꞌa tsa nduu tsa xiꞌin nakani tsa sa kuaꞌa ñayii ti kuu ñuu Israel kesaꞌa xininchisa ñaꞌan xi Jesús. 28 San naꞌa kendoo tsa xiꞌin ndidaa ñayii xininchisa ñaꞌan xi Jesús.