Bernabé xiꞌin Saulo kesaꞌa tsa xiꞌin x-chiion tsa naa misioneru
13
San congregación io ñuu Antioquía io uu profeta xiꞌin Maestru tsa nani Bernabé, Simón tsa kaꞌan tsa Níger xi, Lucio tsa kuu ñuu Cirene, Manaén tsa saꞌnu xiꞌin Herodes xiꞌin Saulo. 2 Neni chiñuꞌu tsa ndidaa tsa Ndios xiꞌin ñonchitsa tsa, san Espíritu Santu sadaa:—Ndineꞌe Bernabé xan xiꞌin Saulo xan kuan kada nu chiion kána ñaꞌan ntsu jnu sa kada nu.
3 Danduu kuenta tuꞌu ñonchitsa tsa ndidaa tsa, san saꞌan tsa sa kakataꞌvi tsa ndidaa tsa xi Ndios sa saꞌa tsa yaꞌa ndidaa tsa, san sakindodo ñaꞌan tsa ndidaa tsa ndaꞌa tsa, san tsándaꞌa ñaꞌan tsa.
Ndidaa tsa xininchisa ñaꞌan xi Jesús io Chipre
4 Espíritu Santu tsandaꞌa ñaꞌan xi Saulo xiꞌin Bernabé san saꞌan tsa ichi sur san saa tsa Seleucia san jukua kukee tsa barku san kuaꞌan tsa Chipre. 5 San saa tsa Salamina san káꞌan tsa s-toꞌon Ndios ndidaa veꞌe sinagoga nataka ndidaa judiu. San ntsaka tsa Juan sa chintsee ñaꞌan s-tsa. 6 San ndinoo tsa nee isla ntsa Pafos, san naniꞌi tsa en bruju, en profeta naꞌntsa kuu tsa, san kuu tsa judiu san nani tsa Barjesús. 7 Tsa yaꞌa io tsa sa io gobernador nani Sergiu Paulo en tsayee kutuni xi. Tsa yaꞌa tsandaꞌa tsa sa na kiꞌin ku kana ñaꞌan xi Bernabé xiꞌin Saulo, kuan nchu kunini tsa s-toꞌon Ndios. 8 Doko bruju Elimas (kuan duꞌua nchu kachi sa nani tsa) ti nchoj s-tsa, san nchu dadana ñaꞌan tsa xi gobernador ya ndasa ma kininchisa tsa. 9 Danduu Saulo tsa kuu Pablo, chítu tsa Espíritu Santu, ntsáꞌa ñaꞌan guaꞌa tsa s-tsa yaꞌa 10 san sadaa tsa:
—Yoꞌo d̶aꞌa sakakuiꞌia meni sa naꞌntsa xiꞌin sa kuiꞌia ñoꞌon xanaa yo, san xini uꞌu yo ndidaa ñayii kida sa ndaa, naku saꞌntsadagua yo sa ndaa kida Ndios. 11 Vita san Ndios kada ia sa ma tuu ka jnu yo.
San kikii ni kunaa jnu tsa, san kesaꞌa tsa dakaka ndaꞌa tsa san nduku tsa andu na ketuu ñaꞌan s-tsa nuꞌun. 12 Danduu xíni Gobernador sa taꞌan san xíninchisa tsa, san kíxi sa dayuꞌu ñaꞌan s-tsa sa xini tsa sa kída Ndios.
Pablo xiꞌin Bernabé io tsa ñuu nani Antioquía en xuun Pisidia
13 Pablo téen tsa en barku san kée tsa Pafos xiꞌin nduu tsa kuaꞌan xiꞌin tsa san saa tsa ntsaa Perge distritu Panfilia; doko Juan naxikokagua tsa Jerusalén san dandoo ñaꞌan tsa s-tsa yaꞌa nduu tsa. 14 Yaꞌia tsa ndidaa tsa Perge, san saa tsa Antioquía distritu Pisidia. San en sábado,a kuyii tsa veꞌe sinagoga, san sakuntsaku tsa nduu tsa. 15 Ndidaa tsa kuu jnu xi veꞌe sinagoga kuenta tuꞌu kaꞌvi tsa ley xiꞌin ndidaa sa chídotuni ndidaa x-profeta Ndios, tsandaꞌa tsa sa nakadaa s-tsa:
—Xanii, tu io en toꞌon dadana ñaꞌan ni xi ndidaa ñayii xuku jaꞌa san kaꞌan ni.
16 Danduu ndukuin Pablo san ndaneꞌe tsa ndaꞌa tsa ndasa na kunini ñayii, san sadaa tsa:
—Ndidaa ñayii Israel xiꞌin ndidaa ñayii yuꞌu ñaꞌan xi Ndios nchisa ku nini ni sa na kaꞌan da. 17 J-Ndios ndidaa ñayii io Israel ndekaxi ia ku tadeꞌe ndo. San kídakaꞌnu ia ñuu yaꞌa, san ndidaa ñayii yaꞌa kúu ñayii juera ñuu Egipto,b san xiꞌin sa tastuni ia kineꞌen ia ñuu yaꞌa juan.c 18 San uvidiko kuia kuyakui ñaꞌan ia xi ndidaa tsa yaꞌa desiertu;d 19 Danduu datani ia usa xuun Canaán,e san sañaꞌan ia ñuꞌu yukua s-tsa yaꞌa ndidaa tsa.f 20 San kuenta kumi yodo cientu kuia, sañaꞌan ia tsa saꞌntsa kuachig ntsa kuenta tsandaꞌa ia Samuel tsa kuu tsa xu kaꞌan x-kuenta ia. 21 Danduu xíka ñayii reyh san Ndios sañaꞌan ia Saúl tsa kúu d̶aꞌa Cis, en tsayee s-tribu Benjamín,i uvidiko kuia tástuni tsa. 22 San díta ia tsa yaꞌa,j san sani ia David sa kuu tsa rey, tsa kachi ia xi: “Ntsaꞌa ntsu sa David d̶aꞌa Isaí kuu nu en nuyee taꞌan-ini ku kuanaa ntsu nu kida sa nchoj ntsu.”k 23 San Ndios kachi ia sa en xayii David kixi sa kada sa nanitaꞌvi ñuu Israel, san ia yaꞌa kuu Jesús. 24 Antika sa kixi ia, Juan káꞌan tsa xi ndidaa ñayii, sa na nata-uꞌu ta sa saꞌa x-kuachi tsa, san na kuendutsa tsal duꞌua sadaa tsa xi nee ñuu Israel. 25 Danduu tuꞌu kída Juan sa kida tsa san kachi tsa: Ti kuu da tsa sani-ini ni;m kuan sata da vaxi en ia kaꞌnu ka san nisa ti nitaꞌvi da sa dandatsa da xeen nchisa ia.n
26 Xanii, d̶aꞌa Abraham xiꞌin ndidaa ñayii ti kuu d̶aꞌa Abraham doko xininchisa ñaꞌan xi Ndios: Sa nitaꞌvi yaꞌa vaxi sa kuj ntso ndidaa ndo. 27 Kuan ndidaa ñayii io Jerusalén xiꞌin ndidaa tsa tastuni, ti na kininchisa tsa Jesús san ti choꞌon doꞌo tsa toꞌon chidotuni ndidaa tsa xu kaꞌan x-kuenta Ndios sa kaꞌvi ndiden sabado,o san da xinotaꞌan tsa kuenta da kuidokuachi tsa ia. 28 San ti naniꞌi tsa nisa en sa da kuidokuachi ñaꞌan tsa sa nandeꞌe sa kuu ia, san xíka tsa xi Pilatu sa na kaꞌni ñaꞌan tsa.p 29 San kída Jesús ndidaa sa táꞌvichiion xi ia sa yodotuni sa taꞌan ia, noneꞌe ñaꞌan s-tsa cruz san chiꞌiñaꞌan s-tsa en yavi kaꞌnu nchii en kagua.q 30 Doko Ndios kída ia sa nandoto Jesús sa io ndidaa ndii. 31 San nanuu ia kuaꞌa ntseꞌe kii xi ndidaa tsa xu kee Galilea xu kiꞌin Jerusalén xiꞌin ia,r san ndidaa tsa yaꞌa kaꞌan ndaa vita jnu ndidaa ñuu. 32 Juandiku dan ndidaa da kaꞌan da toꞌon guaꞌa yaꞌa jni ndidaa ni, sa sadaa Ndios sa kada ia xi ndidaa ndii ku tadeꞌe ndo ío diꞌna, 33 jaꞌa daxinotaꞌan Ndios ku ntso ndidaa ndo tsa kuu d̶aꞌa ndidaa tsa yukua, san ndaneꞌe ia Jesús, kuan duꞌua yodotuni salmo ku uu: Ku daꞌa ntsu kuu yoꞌo; vita kídaguaꞌa ñaꞌan ntsu xo.s 34 Ndios sa kaꞌan ia sa ndaneꞌe ñaꞌan ia xi Jesús san ma kuemani ia sa tsaꞌyu xikikoño Jesús, duꞌua kachi ia: Taj ntsu ndidaa sa guaꞌa ío xi David.t
35 Duꞌua yodotuni enka salmo sa kachi: Ma kuemani ni sa tsaꞌyu xikikoño ia kuu ia ii.u 36 Kuan tuꞌu xinokuachi tsa xi ndidaa sa nchoxi Ndios san David xiꞌi tsa, san kuyii nduj s-tsa sa yenduxi s-tadeꞌe tsa san tsáꞌyu xikikoño tsa. 37 Doko Jesús ia ndaneꞌe Ndios ti tsaꞌyu xikikoño ia. 38 Juandiku xanii, tediki ni sa sa saꞌa Jesús kaꞌan sa niꞌi ni sakaꞌnu-ini sa saꞌa x-kuachi ni ndidaa ni. 39 Kuan xiꞌin ley ti ndundoo x-kuachi ni ndidaa ni, doko ndidaa ñayii nakininchisa ñaꞌa xi Jesús ndundoo ñayii. 40 Guaꞌa ni kuan na taꞌan ni ndidaa ni sa kachi ndidaa x-profeta Ndios:
41 Ntsaꞌa, ndidaa yoꞌo nu kaꞌan kuiꞌia xiꞌin ndidaa nu sakuntsaa ñaꞌan, san nduñuꞌu;
kuan sa io sa kada ntsu en sa kaꞌnu kada ntsu
san ma en yo kininchisa kuani na nakani en ñayii xo ndidaa yo. Duꞌua sadaa Pablo.v
42 Danduu kee tsa yaꞌa nduu tsa veꞌe sinagoga san sakondaꞌvi tsa io jaꞌa ndidaa tsa sa enka sábadow na kaꞌan nituku tsa ndidaa toꞌon yaꞌa. 43 San tuꞌu ndutsa ndidaa ñayii nataka jukua san kuaꞌa judiu xiꞌin prosélito nchiko ñaꞌan kee xi Pablo xiꞌin Bernabé, san sadaa Pablo xiꞌin Bernabé sa na ndukuntsee tsa xiꞌin sa xininchisa tsa Ndios.
44 San enka sábadox kuenta nee ñuu nataka sa kunini s-toꞌon Ndios. 45 San xíni ndidaa judiu ndidaa ñayii nataka san kída kuiño tsa san chodaka tsa ndidaa toꞌon kaꞌan Pablo xiꞌin káꞌan kuiꞌia tsa. 46 Doko Pablo ya xiꞌin Bernabé ya ti dayuꞌu ñaꞌan s-tsa san sadaa tsa: Nandeꞌe sa diꞌna ka dini ndidaa ni kaꞌan da s-toꞌon Ndios ya xi; doko ti nchu kunini ni san sani-ini ni sa ti nitaꞌvi ni sa kiꞌin ni ñuyii ma ndeꞌe, san vita na kiꞌin da sa io ndidaa ñayii ti kuu judiu. 47 Kuan duꞌua táꞌvichiion tsa Toꞌo: Sáni ñaꞌan ntsu sa na kada yo, sa na kukuituni xanaa ndidaa ñayii ti xini ñaꞌan ku ntsu, ndasa na niꞌi toꞌon nee ñuyii.y
48 San tsaku xi ndidaa ñayii ti kuu judiu xuku jukua san ku-iꞌni ntseꞌe tsa ndidaa tsa san kidakaꞌnu tsa Ndios, san xíninchisa ndidaa ñayii ndekaxi Ndios sa niꞌi vida ma ndeꞌe. 49 San duꞌua kuvaa s-toꞌon Ndios ndidaa ñuu yaꞌa. 50 Doko ndidaa judiu ya chitoꞌon tsa d̶iki uu ñadeꞌe ku naꞌnu xiꞌin tsayee kunaꞌnu san kída tsa sa na kuiko ñaꞌan xi Pablo ya xiꞌin Bernabé ya san xíko ñaꞌan tsa s-tsa yaꞌa nduu tsa. 51 Danduu Pablo xiꞌin Bernabé kídi tsa tiachi ndaꞌa saꞌa tsa kuan jaꞌa nchu kachi sa ti en nchu kunini ñaꞌan s-tsa,z san kuaꞌan tsa ñuu Iconio. 52 San ndidaa tsa xininchisa ñaꞌan xi Jesús ku-iꞌni ntseꞌe tsa, san chítu tsa Espíritu Santu.