Saꞌni ñaꞌan xi Jacobo san chiñaꞌan tsa vekaa xi Pedru
12
San ndidaa kii yukua rey Herodes teen tsa uu ñayii congregación sa kaniaꞌa tsa. 2 San soldadu tsa saꞌni ñaꞌan xiꞌin espada xi Jacobo xani Juan. 3 San xini tsa sa nataꞌan xanaa ndidaa judiu ku naꞌnu sa kída tsa jaꞌa, san ndatoꞌon tsa sa teen tsa Pedru. Jaꞌa taꞌan kii kida tsa viko ita-stila sa ti sakeꞌe levadura. 4 Ndidaa soldadu teñaꞌan tsa san chintsadi ñaꞌan tsa san i-ntsaa ñaꞌan kumi grupo soldadu kumi kumi soldadu ndiden en grupo, san sani-ini Herodes sa kineꞌen ñaꞌan tsa kii na tuꞌu viko pascua jnu ndidaa ñayii io ñuu san danaꞌma ñaꞌan tsa.a 5 Juandiku Pedru yeꞌe tsa vekaa san kuaꞌa ntseꞌe soldadu ntsaa ñaꞌan s-tsa, doko congregación io jukua xikataꞌvi ntseꞌe tsa xi Ndios sa saꞌa Pedru.Ndios kineꞌen ñaꞌan ia vekaa xi Pedru
6 Kuenta sa io sa kineꞌen ñaꞌan Herodes xi Pedru san niñu yukua Pedru xidi tsa san nuꞌni tsa xiꞌin ubi cadena san nuꞌni ntsaa tsa ubi soldadu, san ndidaa ka soldadu xuku tsa ndieꞌe vekaa san ntsaa tsa. 7 Kikii ni nanuu en x-ángel Ndios san dayeꞌe ntseꞌe ni ka xiti vekaa. San dandoto ñaꞌan xi Pedru kukoꞌon ichi din tsa san sadaa:
—Ndukoo san nakuiꞌno d̶oꞌno yo san nakiꞌni nchisa yo xan.
San duꞌua kída tsa. San danduu sadaa ángel:
—Naduku doo yo xan mee yo san kunchiko ñaꞌan kuntsu.
9 Pedru nchiko ñaꞌan tsa san nisa ti sani-ini tsa tu sa ndaa kuu sa kida ángel kuan. Sani-ini tsa sa nanuu en sa nanuu jnu tsa. 10 Yaꞌia tsa sa io ubi par soldadu san saa tsa ndieꞌe kaa kaꞌnu saa ntsa ndikeꞌe san meni nakaan, ntsaka taꞌan tsa xiꞌin ángel kuan kée san xíka tsa uu calle, danduu nduñuꞌu ni ángel kuan san meni ka Pedru kuan kunuꞌun. 11 Danduu Pedru sakuituni xanaa tsa san kachi tsa:
—Vita xini ndo sa Ndios tsandaꞌa ia x-ángel ia sa na dita ñaꞌan tsa ku ndo ndaꞌa Herodes xiꞌin sa nchu kada ndidaa judiu ku ndo.
12 Danduu saꞌan tsa xeꞌe María, j-nana Juan tsa kaꞌan tsa Marcos xi, san kuaꞌa ntseꞌe ñayii xuku xikataꞌvi. 13 San kaꞌan Pedru kuan ndieꞌe kaꞌnu, san en nudeꞌe nani nu Rode saꞌan nu sa ntsaꞌa nu andu kuu. 14 San nakini nu sa Pedru kuu tsa, san ku-iꞌni ntseꞌe nu san ti nakaan nu ndieꞌe, kuan ndeꞌe ka kunuꞌu nu ku kadaa nu sa Pedru kuu tsa in ndieꞌe. 15 San ndidaa tsa yaꞌa sadaa tsa:
—Kueꞌe d̶iki yo. Doko nuyaꞌa intsee ni nu sa Pedru kuu tsa. Danduu tsa yaꞌa kachi tsa ndidaa tsa:
—En x-ángel Pedru kuu.
16 Doko Pedru kaꞌan ni on tsa in tsa ndieꞌe; san nakaan san xini ñaꞌan s-tsa san yuꞌu ntseꞌe tsa ndidaa tsa. 17 San kida Pedru seña xiꞌin ndaꞌa tsa sa na kadi tsa yaꞌa xuꞌu tsa ndidaa tsa, san nakani tsa sa kída Ndios, na modo kineꞌen ñaꞌan ia vekaa. San sadaa tsa:
—Nakani ni jaꞌa xi Santiagu xiꞌin ndidaa ka ku kiani ndo.
San kee tsa sa kuaꞌan tsa enka xichi.
18 San yeꞌe ñuyii, san ndidaa soldadu yuꞌu ntseꞌe tsa san sani-ini tsa na modo kída sa nduñuꞌu Pedru kuan. 19 Doko Herodes, nánduku ñaꞌan tsa sa ti na niꞌi ñaꞌan tsa, tuꞌu ndukutoꞌon tsa xi soldadu, san táꞌvichiion tsa sa nakaꞌni ñaꞌan xi ndidaa tsa i-ntsaa ñaꞌan xi Pedru. Danduu kee tsa distritu Judea sa kuaꞌan tsa Cesarea san jukua kendoo tsa.
Duꞌua táꞌan sa xiꞌi Herodes
20 Herodes diko-ini ntseꞌe tsa ñayii io Tiro xiꞌin Sidón doko ndidaa ñayii yaꞌa ndatoꞌon sa kiꞌin tsa kukaꞌan tsa xiꞌin Herodes; san kaꞌan tsa xiꞌin Blasto en tsa kunaꞌnu ntseꞌe io xi Herodes san xíka tsa paz, kuan ñuu tastuni Herodes xu diko ndidaa sa nandeꞌe xi ndidaa ñayii yaꞌa. 21 San en kii Herodes toꞌo ntseꞌe ndukutu tsa san sakuntsaku tsa sa kaꞌan tsa xi ñuu. 22 San ndidaa ñayii ñuu ya kána san kachi:
—S-tachi Ndios kuu jaꞌa adii s-tachi ñayii.
23 San kikii ni en x-ángel Ndios dátakueꞌe ñaꞌa xi Herodes, kuan ti kidakaꞌnu tsa Ndios. San kiꞌvi tsa tikudi san kitiaꞌa dándeꞌe ñaꞌan te.
24 Doko s-toꞌon Ndios kuvaa san ndidaa xichi xu kaya ñayii xininchisa ñaꞌan xi Jesucristu.
25 Bernabé xiꞌin Saulo tuꞌu kídachiion tsa Jerusalén, san kunuꞌu tsa ñuu Antioquía san ntsaka tsa Juan tsa nani Marcos.