Pedru nakua ñaꞌan tsa kuenta xi ndidaa tsa xininchisa ñaꞌan xi Jesús io Jerusalén
11
Ndidaa tsa tsandaꞌa Jesús xiꞌin ndidaa tsa xininchisa ñaꞌan xi ia, tsa io distritu Judea niꞌi toꞌon sa ndidaa ñayii ti kuu judiu téen tsa s-toꞌon Ndios. 2 San kii saꞌan Pedru Jerusalén, ndidaa tsa kuu ñuu Israel nduden s-tsa, 3 san sadaa tsa:—Naku sáꞌan ni sa io ndidaa ñayii ti kuu judiu san sáj ni xiꞌin tsa?
4 Danduu Pedru kesaꞌa tsa nakani tsa vini vini, san sadaa tsa:
5 —Neni xikataꞌvi da xi Ndios ñuu Jope, san nanuu en sa nanuu jnu da: San xini da en titsaa kaꞌnu ntseꞌe, san nonoo andivi san yiteen ndi kumi ladu x-punta xi san nonoo ichi io da. 6 San ntsaꞌa guaꞌa da nasa ñoꞌon xiti xi san xini da nadataꞌan nadatuꞌu kitivii, kiti io kumi ndaꞌa xi xiꞌin kiti yuku xiꞌin kiti ndiñuꞌu mee xiꞌin kiti xiko jnu tachi. 7 Danduu tsáku da en tsa kaꞌan sa kachi tsa: “Ndukuin Pedru; san kaꞌni san kaxi.” 8 Doko dan sadaa da: “Ma kaj da Toꞌo kuan ti on saj da sa ti guaꞌa sa kaj da.” 9 Danduu kaꞌan ni tuku guelta ku uu da san kachi: “Sa ndadandoo Ndios ma kachi yo sa kuu sa kuiꞌia.” 10 San jaꞌa taꞌan uni guelta, san ndidaa kúndaa ni tuku andivi. 11 San danduu saa uni tsayee veꞌe ío da, tsandaꞌa ñaꞌan s-tsa sa nakiꞌin ku kuaka ñaꞌan da sa na kiꞌin da ntsa Cesarea; 12 san Espíritu kachi sa nakiꞌin da xiꞌin tsa ndidaa tsa sa ma kani-ini da. San ndi iñu ku kiani ndo yaꞌa saꞌan xiꞌin da san sayii da xeꞌe Corneliu. 13 San nakani tsa da sa xíni tsa en ángel in jnu tsa san sadaa s-tsa: “Tsandaꞌa ñayii nakiꞌin ñuu Jope san na kuntsaka ñaꞌan xi Simón tsa nani Pedru kuaan na kixi. 14 Tsa yaꞌa kaꞌan tsa toꞌon sa nanitaꞌvi yo xiꞌin ndidaa ñayii io xeꞌe yo.” 15 San kesaꞌa da kaꞌan da, san saa Espíritu Santu sa io tsa ndidaa tsa, kuenta kida ku ntso ndidaa ndo diꞌna. 16 San nakaꞌan da sa kachi ku Toꞌo ndo sa kachi ia: “Juan dakuendutsa ñaꞌan nu xiꞌin ndutsa doko yoꞌo niꞌi yo sa tastuni Espíritu Santu.”a 17 Juandiku tu Ndios sañaꞌan ia s-tsa yaꞌa ndidaa tsa sa taxi ia ku mee ndo ndidaa ndo kuenta guaꞌa xininchisa ñaꞌan ndo xi Jesucristu, andu ku dan sa na kaꞌnu da Ndios?
18 San kuenta tsáku s-tsa toꞌon yaꞌa san kukadi tsa san kidakaꞌnu tsa Ndios san kachi tsa:
—Ndios kida ia sa na nata-uꞌu ndidaa ñayii ti kuu ñuu Israel ndasa na niꞌi tsa ñuyii ma ndeꞌe.
Ndidaa ñayii xininchisa ñaꞌan xi Jesús io ñuu Antioquía
19 Ti yaꞌia kuaꞌa kii sa xiꞌi Esteban, san kesaꞌa ndidaa ñayii xiko ñaꞌan xi ndidaa tsa xininchisa ñaꞌan xi Jesús,b doko kuaꞌa ntseꞌe tsa xino tsa san kuaꞌan tsa Fenicia, Chipre xiꞌin Antioquía, san ti en kaꞌan tsa xi maska sa ndidaa ni tsa kuu ñuu Israel kaꞌan tsa xi. 20 Doko uu tsayee xininchisa ñaꞌan xi Jesús io Chipre xiꞌin Cirene saa tsa ñuu Antioquía san sadaa tsa xi ndidaa Griegu toꞌon guaꞌa ya, sa Jesús kuu s-toꞌo ndidaa sa io. 21 San Ndios io ia xiꞌin tsa yaꞌa ndidaa tsa, san kuaꞌa ntseꞌe ñayii xíninchisa ñaꞌan xi Jesús, san dandoo tsa ndidaa sa xu kininchisa tsa.
22 San ndidaa jaꞌa nitoꞌon congregación io Jerusalén, san tsandaꞌa tsa Bernabé ndasa na kiꞌin tsa Antioquía. 23 Kuenta xíni tsa yaꞌa ndidaa sa naꞌnu kída Ndios san ku-iꞌni ntseꞌe tsa, san sadaa tsa s-tsa yaꞌa ndidaa tsa, sa na kuin ndaa tsa xiꞌin na ndukuntsee tsa xichi Ndios. 24 Kuan Bernabé kuu tsa en ñayii guaꞌa san chitu tsa Espíritu Santu xiꞌin xininchisa ntseꞌe ni ka tsa. San kuaꞌa ntseꞌe ka ñayii xíninchisa ñaꞌan xi Ndios sa saꞌa sa dadana ñaꞌan Bernabé.
25 Danduu kuaꞌan Bernabé ñuu nani Tarso ku nanduku tsa Saulo, san naniꞌi ñaꞌan tsa sa ntsaka ñaꞌan tsa kuaꞌan Antioquía. 26 San nee kuia nataka tsa ndidaa tsa jukua xiꞌin congregación, san dadana ñaꞌan tsa nduu tsa xi kuaꞌa ntseꞌe ñayii. San ndidaa ñayii nchiko ñaꞌan xi Jesús danani ñaꞌan s-tsa Cristianu diꞌnanuu guelta ñuu Antioquía.
27 San ndidaa kii yukua kee uu profeta Jerusalén san kuaꞌan tsa Antioquía. 28 San kuenta nataka tsa ndidaa tsa ndukuin en tsa nani Agabo,c san chíntsee ñaꞌan Espíritu Santu san káꞌan tsa sa koo en doko kaꞌnu ntseꞌe nee ñuyii. Ndidaa jaꞌa taꞌan x-kuiꞌia Emperador romanu nani Claudio. 29 Danduu ndidaa tsa xininchisa ñaꞌan xi Jesús io Antioquía ndatoꞌon tsa sa tsandaꞌa tsa sa na chintsee ñaꞌan xi ndidaa ñayii kundaꞌvi xininchisa ñaꞌan xi Jesús io Judea xiꞌin kuenta guaꞌa io s-tsa ndidaa tsa. 30 San duꞌua kída tsa, tsandaꞌa tsa sa kuxi ndidaa tsa kuu jnu xi nataka jukua, ndasa na dasa tsa san Bernabé xiꞌin Saulo neꞌen kuaꞌan.