Na kininchisa ñaꞌan tsa nani Saulo xi Jesús
(Hch 22.6-16; 26.12-18)
9
Neni Saulo, káꞌan tsa sa kaꞌni tsa ndidaa tsa xininchisa ñaꞌan xi ku Toꞌo ndo, san saꞌan tsa jnu dutu kunaꞌnu, 2 san xíka tsa tutu sa kiꞌin tsa veꞌe sinagoga io ñuu nani Damasco ku teen tsa ñayii san kuntsaka ñaꞌan tsa nuꞌu Jerusalén, sani-ini tsa san teen tsa ndidaa tsa xininchisa ñaꞌan xi Jesús, ñadeꞌe, tsiee andu kuu mee. 3 San neni niꞌno ichi tsa kuaꞌan, kuyachi tsa jnu ñuu nani Damasco, táꞌan sa kikii ni dayeꞌe en sa sandutsa ntseꞌe ntsa andivi. 4 San ndúgua tsa san tsáku s-tsa en tsa káꞌan s-tsa san sadaa:—Saulo, Saulo, naku xiko ñaꞌan yo kuntsu.
5 San tsa yaꞌa sadaa tsa:
—Andu kuu ni Toꞌo?
San sadaa ia:
—Ntsuꞌu kuu Jesús tsa xiko yo, datakueꞌe yo mee yo sa tuu yo kaa deen xan mee yo.
6 Danduu Saulo oni kidi ñaꞌan s-tsa kuan yuꞌu ntseꞌe tsa san sadaa tsa:
Toꞌo nasa nchoj ni sa kada da?
San ia kuu ku Toꞌo ndo sadaa tsa:
—ndukoo, san kuyii ñuu xan, san kachi toꞌon yo nasa kuu sa kada yo.
7 San ndidaa tsa kuaꞌan xiꞌin Saulo yuꞌu ntseꞌe tsa san ti kachi ka kaꞌan tsa. Sa ndakuiti kuu sa tsaku s-tsa sa káꞌan, doko ti xíni tsa nisa en ñayii. 8 Danduu ndukuin Saulo san ntsaꞌa tsa doko kuaa tsa. San teen tsa ndidaa tsa ndaꞌa Saulo ya san ntsaka ñaꞌan tsa kuaꞌan ñuu Damasco. 9 San uni kii ti xíni tsa nisadana, san ti saj s-tsa xiꞌin ti xiꞌi tsa nisadana.
10 Io en tsa xininchisa ñaꞌan xi Jesús ñuu Damasco nani tsa Ananías, san nanuu en sa nanuu jnu tsa san sadaa Jesús s-tsa:
—Ananías. San sadaa tsa:
—adi da yaꞌa Toꞌo.
11 San sadaa ia:
—Ndukuin san kuaꞌan calle nani ladu kuaꞌa san nanduku xeꞌe nu nani Judas san ndukutoꞌon ami io Saulo nu kuu ñuu nani Tarso; kuan adi nu xikataꞌvi xi Ndios, 12 san nanuu jnu nu san xini nu en nu nani Ananías yii veꞌe san sakindodo ñaꞌan nu ndaꞌa nu ndasa na natuu jnu nu.
13 Danduu Ananías sadaa tsa:
Toꞌo, kuaꞌa ñayii kaꞌan nása kuu tsa yaꞌa xiꞌin ndidaa sa kuiꞌia kída tsa xi ndidaa ñayii xininchisa ñaꞌan jni io Jerusalén. 14 San ntsa jaꞌa tastuni tsa sa saꞌa ndidaa dutu kunaꞌnu ndasa na teen tsa ndidaa ñayii kukaꞌnu-ini ñaꞌan jni.
15 San sadaa Jesús:
—Kuaꞌan kuan nuyaꞌa ndekaj ntsu sa kuenchiion ntsu sa kuneꞌe nu ku toꞌon ntsu xi ndidaa ñayii ti kuu nacion Israel xiꞌin jnu kuaꞌa rey xiꞌin ndidaa d̶aꞌa Israel ya. 16 Kuan ntsuꞌu dadana ñaꞌan ntsu natandu nandeꞌe sa taꞌan nu sa saꞌa ntsu.
17 Ananías kuaꞌan tsa san kuyii tsa veꞌe; san kukoꞌon ñaꞌan tsa san sadaa tsa:
—Saulo, xanii, ku Toꞌo ndo Jesús ia nanuu jnu ni ichi vaj ni, ia yukua tsandaꞌa ñaꞌan d̶a sa na nduguaꞌa jnuu ni xan, xiꞌin na niꞌi ni Espíritu Santu.
18 San kikii ni koꞌio sa koꞌio nduchinuu tsa kuenta ka ti-ichi ka, san na tuu jnu tsa; san ndukoo tsa san sendutsa tsa. 19 San tuꞌu saj s-tsa ita-stila san nduntsee tsa. Saulo ío tsa uu kii xiꞌin ndidaa tsa xininchisa ñaꞌan xi Jesús, io Damasco.
Saulo kaꞌan tsa s-toꞌon Ndios ñuu nani Damasco
20 San danduu kesaꞌa tsa kaꞌan tsa s-toꞌon Jesús ndidaa veꞌe sinagoga, san kachi tsa sa Jesús kuu d̶aꞌa Ndios. 21 San ndidaa tsa tsaku xi yuꞌu tsa sa kachi tsa:
—Adi tsa yaꞌa kuu tsa xu kuiko ñaꞌan xi ndidaa tsa xininchisa ñaꞌan xi Jesús ñuu Jerusalén kuan ña? San chiion yukua vaj tsa jaꞌa sa kuntsaka tsa ñayii kiꞌin jnu ndidaa dutu kunaꞌnu.
22 Saulo on ka on ka kaꞌan tsa sa Jesús ku Cristu, san ndidaa judiu io Damasco ti kachi ka kaꞌan tsa sa duꞌua sadaa Saulo.
Saulo kexio tsa ndaꞌa ndidaa judiu
23 Yaꞌia kuaꞌa ntseꞌe nika kii, ndidaa judiu ndatoꞌon tsa ndidaa mee tsa sa kaꞌni ñaꞌan tsa; 24 doko sa sani-ini tsa niꞌitoꞌon Saulo. San ndidaa judiu xu ku ntsaa tsa ndieꞌe ñuu nduu xiꞌin niñu sa ten ñaꞌan tsa sa kaꞌni ñaꞌan tsa. 25 Danduu ndidaa tsa xininchisa ñaꞌan xi Jesús soꞌno ñaꞌan tsa xi Saulo en yeka kaꞌnu san noneꞌe ñaꞌan tsa niñu ichi nuna pared yeꞌe korra ñuu.a
Saulo io tsa Jerusalén
26 Kuenta sáa tsa Jerusalén, nchu nataꞌan tsa xiꞌin ndidaa ka tsa xininchisa ñaꞌan xi Jesús; doko ndidaa tsa yaꞌa yuꞌu ñaꞌan tsa, kuan ti xininchisa tsa sa kuu tsa en tsa xininchisa ñaꞌan xi Jesús. 27 Doko Bernabé sa na tañaꞌan tsa san ntsaka ñaꞌan tsa kuaꞌan jnu ndidaa tsa tsandaꞌa Jesús. San nakani tsa sa xíni tsa Jesús ichi kuaꞌan tsa xiꞌin sa kaꞌan tsa xiꞌin ia, san kaꞌan tsa sa kuu Jesús san ti xu yuꞌu tsa. 28 San io tsa ndidaa tsa jukua san duꞌua xu kee tsa xiꞌin xu nayii tsa Jerusalén, 29 xu kaꞌan tsa stoꞌon guaꞌa ia san ti xu yuꞌu tsa san natoꞌon tsa xiꞌin ndidaa ñayii Israel kaꞌan griegu, doko ndidaa tsa yaꞌa nchu kaꞌni ñaꞌan tsa s-tsa. 30 Kuenta niꞌitoꞌon ndidaa tsa kukaꞌnu-ini ñaꞌan xi Jesús, san ntsaka ñaꞌan tsa ntsaa Cesarea san tsandaꞌa ñaꞌan tsa ñuu nani Tarso.
31 Danduu ndidaa congregación io Judea, Galilea xiꞌin ñuu Samaria kadivini io tsa ndidaa tsa. San xu kutuꞌua tsa, san kuu yeñuꞌu tsa xi Ndios, san Espíritu Santu xu chintsee ñaꞌan s-tsa sa na kaya ka ñayii xininchisa.
Nduguaꞌa en tsayee nani Eneas
32 Pedru ndinoo tsa ndidaa xichi, san saꞌan tsa sa koto tsa ndidaa ñayii ndáda ii ia io ñuu nani Lida. 33 Jukua naniꞌi tsa en tsayee nani Eneas, en tsa natii san ti kachi kaka tsa san sa ku una kuia kukagua tsa. 34 Sadaa Pedru:
—Eneas, Jesucristu ndadaguaꞌa ñaꞌan ia jni ndukoo ni san ndaki ni xito ni xan.
San nonoo ni ndukoo tsa, 35 san xíni ñaꞌan ndidaa ñayii io Lida xiꞌin ñayii io Sarón, san xíninchisa tsa ndidaa tsa Jesús.
Duꞌua taꞌan sa nandoto en ñadeꞌe nani Tabita
36 San io en ña xininchisa ñaꞌan xi Jesús ñuu nani Jope nani ña Tabita, sa nchukachi Dorcas. Ña yaꞌa xu kada ña mediini sa guaꞌa xiꞌin xu kuañaꞌan ña tuini xi ñayii kundaꞌvi. 37 San ndidaa kii yukua kuꞌu xan, san xiꞌi ña. San tuꞌu ndoo ña saki tuu ñaꞌan xan en veꞌe io ntsaa nino. 38 Guaꞌani sa ñuu nani Lida io yachi xiꞌin ñuu nani Jope, san niꞌitoꞌon ndidaa tsa tsandaꞌa Jesús sa Pedru io tsa jukua san tsandaꞌa tsa ubi tsayee sa na ku kadaa tsa:
—En favor ma kukue ni sa kij ni sa io da ndidaa da.
39 Danduu Pedru ndukuin tsa san kuaꞌan tsa xiꞌin ndidaa tsa yaꞌa. San saa tsa, san kuyii tsa veꞌe io nino san jukua nataka ndidaa ñakee san ndaꞌyu ntseꞌe ña san dadana ñaꞌan ña ndidaa titsaa xiꞌin daꞌma sa xu kiku Dorcas neni xu kuntsaku ña ndidaa ña. 40 Pedru sadaa tsa sa nakee ña ndidaa ña, san kee ña san sa kuinxiti Pedru san xikataꞌvi tsa xi Ndios san nantsaꞌa tsa sa katuu ndii san sadaa tsa:
—Tabita, ndukoo.
San nakaan ña nduchinuu ña san xíni ña Pedru san ndukoo ña. 41 San teen tsa ndaꞌa ña san ndaneꞌe ñaꞌan tsa xan. Danduu kana tsa ndidaa ka tsa xininchisa io jukua xiꞌin ndidaa ñakee, san ndidaa tsa yaꞌa xíni sa nandoto ña. 42 Jaꞌa niꞌitoꞌon nee ñuu nani Jope, san kuaꞌa ntseꞌe ñayii xíninchisa ñaꞌan xi Jesús. 43 Pedru kendoo tsa kuaꞌa ntseꞌe kii ñuu Jope, xeꞌe en tsa nani Simón tsa kuu tsa kidandoo ñee.