Tsa nani Saulo xiko tsa ndidaa ñayii xininchisa ñaꞌan xi Jesús
8
San Saulo ku-iꞌni tsa sa xíꞌi Esteban.Kii yukua kesaꞌa tsa xiko tsa x-congregación Ndios io Jerusalén, san ndidaa ñayii xininchisa ñaꞌan xi Jesús taꞌntsadagua, dagua tsa kuaꞌan enka ndaꞌa ñuu Judea san dagua tsa kuaꞌan distritu Samaria san meni ka tsa tsandaꞌa Jesús kendoo. 2 Uu ñayii guaꞌa chiduj xaꞌan xi Esteban, san nata-uꞌu ntseꞌe tsa sa saꞌa tsa yaꞌa. 3 Danduu Saulo xu kuiko tsa congregación. Xu yii tsa veꞌe xiꞌin veꞌe, san xu kuñuꞌun tsa tsie ñadeꞌe san xu chiñaꞌan tsa vekaa.a
Felipe káꞌan tsa toꞌon guaꞌa yaꞌa ntsa ñuu nani Samaria
4 Doko ndidaa tsa xitsaniꞌno ndinoo tsa kaꞌan tsa toꞌon guaꞌa sa táꞌan Jesús ami xu kiꞌin tsa ndidaa tsa. 5 Felipe saꞌan tsa ñuu Samaria san káꞌan tsa s-toꞌon Jesús. 6 San xu tsaku xi ndidaa ñayii xiꞌin xu kini tsa ndidaa señal xu kada tsa yaꞌa, san ndidaa tsa xu kunini sa xu kaꞌan Felipe kuan xu nataꞌan ntseꞌe xanaa tsa ndidaa tsa. 7 Kuan kuaꞌa ntseꞌe ñayii xu kineꞌen tsa tachi kuiꞌia xi san ndidaa jaꞌa xu kana niꞌi ntseꞌe san kuaꞌa ntseꞌe ñayii ti kachi kaka xiꞌin tsa yakua xu nduguaꞌa kada Felipe; 8 san ndidaa ñayii ñuu yaꞌa xu ku-iꞌni ntseꞌe.
9 Doko io en tsayee nani Simón, tsa yaꞌa kida tsa magia san xu dandaa tsa kuaꞌa ntseꞌe ñayii io ñuu Samaria ya, san xu ku-iꞌni tsa sa kuu tsa en tsa kunaꞌnu. 10 Ndidaa tsa nini ñaꞌan ntseꞌe s-tsa yaꞌa, ntsa nuliin xiꞌin tsa naꞌnu, kachi tsa:
—Jaꞌa kuu sa naꞌnu kida Ndios.
11 Kuaꞌa ntseꞌe kuia dandaa ñaꞌan tsa nani Simón ya xi ndidaa ñayii xiꞌin ndidaa magia xu kada tsa. 12 Felipe sa kaꞌan tsa toꞌon guaꞌa sa tastuni Ndios ñayii xiꞌin sa nani Jesucristu, san ndidaa ñayii xíninchisa san sendutsa tsie xiꞌin ñadeꞌe. 13 Ntsa ndeꞌe tsa nani Simón xininchisa, san kuenta xininchisa tsa san sendutsa tsa san xu ndinoo tsa xiꞌin Felipe; san xu kini tsa ndidaa señal xiꞌin ndidaa milagru xu kada Felipe, san yuꞌu-ini tsa.
14 Ndidaa tsa tsandaꞌa Jesús io Jerusalén, niꞌi toꞌon tsa san ndidaa ñayii io ñuu Samaria xininchisa tsa s-toꞌon Ndios san tsandaꞌa tsa Pedru xiꞌin Juan sa na kiꞌin tsa nduu tsa jukua. 15 San tsa yaꞌa saꞌan tsa sa kakataꞌvi tsa xi Ndios sa saꞌa ñayii ñuu Samaria ndasa na niꞌi tsa Espíritu Santu. 16 Kuan vita niꞌi ka tsa nisa en tsa Espíritu Santu; kuan sendutsa ni tsa xiꞌin sa nani ku Toꞌo ndo Jesús. 17 Danduu Pedru xiꞌin Juan sakindodo ñaꞌan tsa ndaꞌa tsa, san niꞌi ndidaa tsa yaꞌa Espíritu Santu.
18 San xíni Simón san sakindodo ñaꞌan tsa yaꞌa ndaꞌa tsa san kíxi Espíritu Santu, san Simón ya nchu chaꞌvi tsa ndasa duꞌua na kada tsa tuku. 19 San sadaa tsa:
—Na chaꞌvi ñaꞌan da jni ndasa na taj ni sa na kuu kada da sa kida ni, kuan andu na kakindodo da ndaꞌa da ya sa na niꞌi Espíritu Santu ya tuku.
20 Danduu Pedru sadaa tsa:
—Antsaya kuaꞌan xiꞌin s-tuini yo xan, kuan sani-ini yo sa xiꞌin s-tuini yo kueen yo sa tastuni taxi Ndios 21 Ti niꞌi taꞌvi yo sa niꞌi yo, kuan xanaa yo xan ti io ndaa jnu Ndios.b 22 Guaꞌaka natauꞌu sa saꞌa xi sa kuiꞌia kída yo, san kaka xi Ndios gua koo ia sa kaꞌnu-ini sa saꞌa xi sa ñoꞌon xanaa yo xan, 23 kuan meni sa kuadu ñoꞌon xanaa yo, san ti nchu dandoo yo kuachi.
24 Danduu sadaa Simón:
—Kaka ni sa saꞌa da xi Ndios, ndasa nisa en sa kachi ni ma taꞌan da.
25 San kuenta tuꞌu kaꞌan tsa s-toꞌon Ndios ñuu Samaria, san Pedru xiꞌin Juan naxikokagua tsa ku nuꞌun tsa Jerusalén. San ichi kunuꞌu tsa kaꞌan tsa toꞌon guaꞌa ya xi kuaꞌa ntseꞌe ndaꞌa ñuu io distritu Samaria.
Felipe ndatoꞌon tsa xiꞌin en tsa io en chiion kaꞌnu ñuu Etiopia
26 En x-ángel Ndios káꞌan xi Felipe san sadaa:
—Ndukuin san kuaꞌan ichi sur ichi desiertu yaꞌia saꞌan Jerusalén san saa ñuu nani Gaza.
27 San ndukuin tsa sa kuaꞌan tsa. San naniꞌintaꞌan tsa xiꞌin en eunuco en tsa io chiion naꞌnu yeꞌe ndaꞌa xi ndidaa ndituꞌu sa kuika io xi reina nani Candace, ndée tsa sa chiñuꞌu tsa Ndios ntsaa Jerusalén, 28 san kunuꞌu tsa kaniꞌno tsa x-carreta tsa, san kaꞌvi tsa sa chidotuni Isaías x-profeta Ndios. 29 San Espíritu sadaa xi Felipe:
—kuaꞌan yachi ntsaa jnu carreta xan.
30 San xino Felipe saꞌan yachi tsa, san tsaku s-tsa sa tsa yaꞌa kaꞌvi tsa sa chidotuni Isaías x-profeta Ndios. Danduu sadaa tsa:
—Sakuituni xanaa ni sa kaꞌvi ni xan ña?
31 San tsa yaꞌa sadaa tsa:
—Ñaꞌan ti sakuituni xanaa da kua ti en dadana ñaꞌan da.
San sakondaꞌvi tsa jnu Felipe sa na kaa tsa carreta san na kuntsaku tsa nduu tsa.
32 San sa kaꞌvi tsa kuu toꞌon yaꞌa:
Naa en ndikachi, ntsaka ñaꞌan s-tsa sa kuu tsa
xiꞌin na en corderu lin ti ndaꞌyu te ora datsa te duꞌua kída tsa,
ti na kaan tsa xuꞌu tsa.
33 San sakuntsaa ñaꞌan s-tsa xiꞌin da kuido ñaꞌan kuachinañu s-tsa san ti en saꞌntsadagua.
Andu ndaa s-toꞌon xayii tsa,
kuan saꞌni ña.c
34 San ndukutoꞌon eunuco xi Felipe:
—kachitoꞌon ni, andu kuu sa ndaa tsa yaꞌa ya s-toꞌon xi, kaꞌan tsa xi mee tsa ña kaꞌan tsa xi enka ñayii?
35 Felipe, sadaa tsa sa nchukachi toꞌon yaꞌa, san sadaa tsa s-toꞌon guaꞌa Jesús. 36 San neni kuaꞌan tsa ichi san yaꞌia tsa sa io ndutsa, san eunuco sadaa tsa:
—Jaꞌa io ndutsa. Guaꞌa ni kuendutsa da ña nasa ka kida da?
37 Felipe sadaa tsa:
—Tu xininchisa yo xiꞌin nee xanaa yo san guaꞌa ni kuendutsa yo.
San kaꞌan tsa san sadaa tsa:
—xininchisa da sa Jesucristu kuu Daꞌa Ndios.
38 San táꞌvichiion tsa sa na kukuin carreta. San ku kukee tsa nduu tsa xiti ndutsa danduu Felipe dakuendutsa ñaꞌan tsa. 39 San nána tsa xiti ndutsa, san x-espíritu Ndios kída sa nduñuꞌu Felipe. San ti xíni ñaꞌan ka eunuco kuan, san kunuꞌu tsa san ku-iꞌni ntseꞌe tsa. 40 Felipe nanuu tsa ñuu nani Azoto, san yaꞌia tsa kuaꞌan ichi yukua, san kaꞌan tsa s-toꞌon guaꞌa Ndios xi ndidaa ñuu io jukua ntsa nasaa tsa ñuu Cesarea.