Kuyoyera Nyambi
4
Mweyo, pakuninga ci Krisitu wa nyandire mwirama yenthzi, namwe mu citanarithse ko kwikara no muanekerero o kucipitura nou wenthzi, inene yomuhe oyu na a nyanda mwirama na cinuka ku thsivi. 2 Mukaci keyo, tumba yoyo mwoyo wo ouhe o pa kaye ku koña ecikumbwethza yoimango yonu, unone aa yoya omu a na shimena Nyambi. 3 Inene ku manyima mwa shimbire thsikati thsothsire o ku mu tenda eyi a na tendanga mahedeni, ongurunde, ecikumbwethza yerama, otakwa, mashambirera o mirembe, mashambirera o ku nwa mawarwa, no kurombera ekupuro kokumango nene.4 Mweyo mahedeni aa komoka yoihe mu kana ku cipakererano mu kuhambakana kwo mu ruthziho no mu mwoyo o kaye, mweyo, aa mipithsa mathzina. 5 Unone kenge a ku citawera athsinda pa meho a Nyambi, aye oyu na ciroithsera ku ratura ayumi nafu. 6 Eyo ngeyi wa hongiwerire Muthzimbu Ouwa noku kwafu, ci shaanga ci a raturiwire mwirama eci edi a di anu wahe, unone ci nga a yoye mu mupepo eci edi a di Nyambi.
7 Kupwa kwenu yoihe pepi ku di. Mweyo, mu cihenge no ku kuñwera ci mu twethse ku rombera. 8 Nenepo mu twarerere ku cishima oandu ko shemwa, inene thsishimo thsaa thsika evi yoingi. 9 Mu tambure amweya mu manthzio enu ko kukana ku tatoka.
10 Munu no munu ku kwenu a cikwathsithse thsipa ethsi naa mu pa Nyambi ku kwamena amweya, eci angamba owarurami o thsihemo thsa Nyambi mo ku cithsiathsia. 11 Ngeci munu aa amba, a ambe eci oyu amba maywi a Nyambi. Oyu kwamena amweya, a tende kengeyo kokoro ou naa mu pa Nyambi, ci Nyambi a shangariwe mwinu yoihe ka Yesu Krisitu. Kutethzima nokoro ikare yenthzi diyere na diyere! Ameni.
Ku nyandera thsitawo
12 Ashimiwa ange, mwa komoka yoihe i mi keyera iereka yo makando ku na mi ereka, eci thsinu ethsi mu na kana kwiirera. 13 Uno honi mu nyanyuke uno mu ciera mu makando a Krisitu, ci nga mwa kwikare no thsinyanyu thsothsikuru mu diyuwa edi kwa ku hokoriwa kutethzima kwenthzi.
14 Ngeci mwaa tukathzaniwa mukaci ko dithzina dya Krisitu, mu di no thsiyauthzi, inene Mupepo o kutethzima wa Nyambi pa penu u di. 15 Uno honi kwekara shaanga munu yofoci ku kwenu o kunyanda mukaci ko kwipaa munu, kwithza, nji okeremi, nji kwingenangena mwiamba yanu. 16 Uno honi, yoihe mu nyanda pa kwikara Makrisitu, mwa fa honyi, unone mu shangare Nyambi pa kwithsiwa ko dithzina dya Krisitu. 17 Inene thsikati thsi na kumu thso kuninga ci raturo thza Nyambi thzi tateke, karo kenge thza ku tateka nanua Nyambi. Ngeci o thza ku tateke netu, ngepi ya kwikara kowa na kana ku yuvera Muthzimbu Ouwa? 18 Eci edi ku na ñoriwa ci,
“Ngeci ikaru owawawa ku yoyithsiwa,
ngepi ya kwikara kowa a na kana ya Nyambi noku kwanu wevi?”
19 Mweyo, awa a nyanda mukaci ko ku kwama eshima ya Nyambi, a twarerere ku kwama yoiwa, karo a pake okurupero wo ouhe kwa Mumbi wo o ku rurama.