Mu dithse mutanga wa Nyambi
5
Honi naa koñomeka akuru o kereke mu kaci kenu, ame ko kwikara mukuru o kereke eci awo, no mbangi o makando a Krisitu, karo naa citapera mu kutethzima oku kwa ku hokoriwa. 2 Mu dithse nawa mutanga wa Nyambi ou naa mi pa. Mu u mamere ko kushima kwenu kadi ko ku ooteriwa, kadi ko ku fota ku wanenapo thsimweya, unone ko kushima kwenu ku kwamena Nyambi, eci edi a fota Nyambi. 3 Mwa tumina awa na mu piwa ku nyunga, unone mwikare muro ouwa ku mutanga. 4 Aye Mudithsani Shokuru ou a ku hokoka, kenge mwa ku tambura mushukwe o kutethzima o kukana kwipa. 5 Mofoci, namwe mwa mishumba mu cihuthse kushi thzakuru. Mwaheno mu cihuthse kushi thzo munu no munu o ku mu kwamena pofoci, inene ku na ñoriwa ci,“Nyambi wa ku rwithsa akwamununa,
unone aa monithsa thsihemo kwakwa ku cihuthsa kushi.”
6 Mweyo, mu cihuthse kushi mushi thzo dyoko dya Nyambi dyoshokoro ci a ku mi thzineke ko thsikati ethsi thsi na roera.
7 Mu pe ecithzekera yenu yoihe kwa Nyambi, inene aa mi nyunga.
8 Mu cihenge no ku kuñwera. Mukwathsithzimbo thsenu, aye shamaonga aa thza o thzinguruka eci nyime oyu vuruma ku fotafota o ku papaura. 9 Mu mu kanene, karo mu tanare mu thsitawo thsenu, inene mu na dimuka ci aenthzenu akwakutawa mu kaye kokahe, nawo aa pita mu makando aa mu pita. 10 Uno honi, munyima thzo kunyanda kamanana, aye Nyambi o thsihemo thsothsihe, oyu naa mithsera ku kutethzima kwenthzi ko diyere mwa Krisitu, aye thsinda kenge a ku mi huthsera, a ku mi tanarithse, no ku mi pa okoro, karo a ku mi shishe pa mushisho oukoro. 11 Okoro wikare wenthzi diyere na diyere. Ameni.
Kuvumenena ko mahurerero
12 Ni na mi ñorera edi diñoro ko wipi ko ku ni kwathsa Silasi, oyu ni pa ombangi ku kwenu ci muenthzetu o ku rurama. Eanekera yange pa ku ñora edi diñoro po ku mi koropithsa no ku mi tanarithsa ci eyi mu pitamo po yashemwa, karo yaekara imweya yo thsihemo thsa Nyambi. Mwimane omu mu thsihemo ko ku tanara.