Diñoro dyo Muthsidi dya
Peturu
Kuvumenena
1
Yame no Simoni Peturu, ngamba no kanganda ka Yesu Krisitu.Naa ñorera awa na piwa thsitawo thsothsikuru mu thsivaka thso kucipitura nethsi thsetu kowawa wa Nyambi no Muyoyithsi wetu Yesu Krisitu.
2 Thsihemo no thsiyaro ikare nenu kongi ko ku dimuka Nyambi no Yesu Fumu wetu.
Kwithsiwa no kuhanguriwa ko Makrisitu
3 Kokoro onyambi wenthzi, Nyambi naa tu pa enu yoihe eyi i na fotahara mu mwoyo o thsitawo ko ku mu dimuka, aye oyu naa twithsera mu kutethzima no muwa wenthzi. 4 Mweyo, Nyambi na a tu pa ekumbwethzo yoikuru mu thsivaka karo yoikuru, ci tu twethse ku ciera ku mukarero onyambi, no ku thsevuka yokwipa yo mu kaye eyi i retiwa kecikumbwethza yo thsivi.
5 Mukaci keyi, mu kwame momuhe omu mu na twethsera ci ku thsitawo thsenu mu vungithseko owa, karo kuwa mu vungithseko odimukero. 6 Kudimukero mu vungithseko kucinyunga, ku kucinyunga mu vungithseko othzui, kuthzui mu vungithseko mwoyo o thsitawo. 7 Ku mwoyo o thsitawo mu vungithseko ku cishima naenthzenu, karo ku ku cishima naenthzenu mu vungithseko thsishimo ku munu yomuhe. 8 Inene ngeci amwepo mwikara neyi enu kongi, kenge ya ku mi retera ci mwa vapa nji ku kana kwima ima mu ku dimuka kwenu Fumu wetu Yesu Krisitu.
9 Uno honi yomuhe o kupira eyi enu, wa ku monena po pepi, karo kapuputwa, o na vurama ci naa kenithsiwa kwivi yenthzi yo kare.
10 Mweyo, aenthzange, mu kwame momuhe omu muna twethsera ku tanarithsa kwithsiwa no kuhanguriwa kwenu, inene ngeci amwepo mu tenda kengeyo, mbera ka mu u. 11 Karo kenge mwa ku tamburiwa ko direma ou mwa kwingena mu Kutumina ko diyere kwa Fumu no Muyoyithsi wetu Yesu Krisitu.
12 Mweyo, kenge ni mi vurukithsanga eyi enu thsikati thsothsihe, shaanga ci na mu i dimuka kare, karo muna tanara nene mushemwa ou mu di nao pano. 13 Naa mona ci kwaa roera ku mi vurukithsanga eyi enu uno ni yoya mweyino erama. 14 Inene ni na dimuka ci ni tamba ku thsia eyi erama, eci edi a ni tongwerire Fumu wetu Yesu Krisitu. 15 Karo kenge na ku kwama momuhe omu ni na twethsera ci munyima thzo kufa kwange, mwa ku twethse ku vurukanga eyi enu thsikati thsothsihe.
Mambangi awa monine kutethzima kwa Krisitu
16 Inene ka twa shupwerire matangu o ku kwamiwa konyanyami ou twa mi tongwerire yo kukeya kokoro kwa Fumu wetu Yesu Krisitu, unone twa u cimonenine ko meho etu o ku di mu kutethzima kofumu wenthzi. 17 Inene ou a tamburire kwa Nyambi Tata direma no kutethzima, kwa yuvaharire diywi edi dya tundire mu Kutethzima Koshokuru, edi dya ambire ci: “Oyu po Mwanange oyu na shima, aye oyu na ni roerithsanga nene.” 18 Twa ciyuverire twathsinda edyo diywi dya tundererire ku wiru o ku tu di nenthzi pa mukinya o shokenu.
19 Karo tu di no diywi dyokethzi edi tu na kurupera nene, kenge nga mu tenda nawa ou nga mu di twarera maano, inene yaa cipitura eci kambarambara aka ka muneka mu ndau thzo mirema shime ku ka kuma ruura, karo Krisitu aye Dirungwe ayepo va mu micima thzenu. 20 Thso kutanga, mwaa roera ku dimuka ci kwithsa okethzi mu Mañoro ou wa keyire ko kuyuvithsithsa kwa mukwakukethza thsinda. 21 Inene okethzi ka wa keyire keshima yo munu, unone anu a ambire ku tunderera kwa Nyambi ko ku tangereriwa ku Mupepo Oukenu.