Diñoro dyo Kutanga dya
Johani
Diywi dyo mwoyo
1
Aye oyu wekarireko ku tunda ku matatekero, oyu na tu yuvu no ku mona. Twa u cimonenine ko meho etu no ku mu kwata ko moko etu, aye Diywi dyo Mwoyo. 2 Aye mwoyo wa hokoriwire ku kwetu, twa mu monine, karo twaa pa ombangi keyi yenthzi no ku mi rawera aye mwoyo o diyere. Wekarire na Tata, pano honi na a hokoriwa ku kwetu. 3 Twaa mi rawera namwe eyi na tu mono no ku yuva, ci namwe nga mwikare no thsiciwano netu. Karo thsiciwano thsetu po na Nyambi Tata na Mwane Yesu Krisitu. 4 Eyi twaa i ñora ci thsinyanyu thsetu thsi kwanenene.Kuyoya mu mwethzi
5 Ou odiyo muthzimbu na tu yuvu ku kwenthzi, pano honi twaa u mi rawera: Nyambi po mwethzi, mu mwenthzi mwithsa mirema shaanga kamanana. 6 Ngeci twaa amba ci tu di mu thsiciwano na Nyambi, uno honi o ku tu enda mu mirema, apo twaangera, karo ka tu kwamine oshemwa. 7 Unone ngeci twaa enda mu mwethzi, eci edi a di Nyambi mu mwethzi, apo tu di no thsiciwano namweya, karo onyinga wa Yesu Mwane waa tu kenithsa ku thsivi thsothsihe.
8 Ngeci twaa amba ci ka tu di no thsivi, twaa ciangera twathsinda, karo ka tu di noshemwa. 9 Uno honi ngeci atwepo tu citawera evi yetu, aye mururami karo muwawa, kenge a tu tetera evi yetu no ku tu kenithsa kumango ouhe. 10 Ngeci atwepo tu amba ci ka twa tenda thsivi, apo twaa monithsa Nyambi ci wa kwangera, karo diywi dyenthzi ka di di mu mwetu.