Thsikumbwethzo thso kukeya kwa Fumu
3
Ashimiwa ange, edi diñoro ni na mi ñorera pano dyodiyo dyo muthsidi. Momu widi wao kuma na ni ereka ku pindura eanekera yenu yoshemwa keyi na ni mi vurukithsa. 2 Naa fota ci mu vuruke maywi aa a ambire akwakukethza owakenu ku kare no thsiraerera ethsi thsa tundire kwa Fumu no Muyoyithsi wetu ko ku cikwathsithsa tunganda twenu.3 Thso kutanga mu dimuke ci mu mayuwa o mahurerero kenge kwa ku keya akwamushepuruthzi, awa a ku shepurura oshemwa no ku shupwera ecikumbwethza yo yo thsivi. 4 Kenge a ku amba ci: “Kuma a kumbwethzire ci kenge a ku ka huka, kupi a di? Akwathsañuruetu a fa kare unone enu yoihe shimbi yekarera dyodi yekarire ku tatekera apa kombiwerire kaye.”
5 Awa anu aa civuramithsa pohuma ñenya ci ko ku tumina ko diywi dyenthzi, ku kare Nyambi wombire diwiru, karo kaye ka tundererire mu meyu no ku ka thzingurukithsa meyu. 6 Karo koa meyu, kaye ko kare kepithsiwire ku dimina dyodikuru. 7 Unone kedyo diywi, diwiru dyo rerodino no kaye ko rerodino yaa turekiwera mudiro, yaa turekiwera diyuwa dyo raturo no kunongithsiwa kwanu o kukana ku tawa.
8 Unone ashimiwa ange, mwa vurama ci kwa Fumu diyuwa dyofoci dyaa cipitura eci myaka thzo kakore kofoci (1,000), karo myaka thzo kakore kofoci (1,000) thzaa cipitura eci diyuwa dyofoci. 9 Fumu ka a katapithsire eyi a kumbwethzire, eci edi a anekera amweya ci aa katapa. Unone aa mi tenda ko ku kwata mucima, inene ka a fotire ci ku nonge shaanga munu yofoci. Aye aa fota ci anu wahe a cere. 10 Diyuwa dya Fumu kenge dya ku keya eci mwithzi. Mwedyo diyuwa diwiru kenge dya ku pwa ko muvumo oukuru o ku yapithsa, o ku pitura eci mushika o mvura. Yo ku wiru yoihe kenge ya ku ñotoka ku mudiro, kaye neyi i dimo yoihe kenge ya kwipa.
11 Pakuninga ci enu yoihe kenge ya kwipithsiwa kenge ne, mwaa roera kwikara anu o ngepi? Mwaa roera ku yoya mwoyo oukenu no mwoyo o thsitawo, 12 uno mu taterera diyuwa dya Nyambi no ku yokororithsa kukeya kwadyo. Inene mwedyo diyuwa diwiru kenge dya ku tumekiwa, enu yo mu wiru kenge ya ku nyongoroka ku kupya. 13 Unone kokuthza ko thsikumbwethzo thsenthzi, twaa taterera diwiru dyodipe no kaye kokape, omu kwa tunga owawa.
14 Mweyo, ashimiwa ange, pakuninga ci mwaa taterera eyi ci i tendahare, mu kwame momuhe omu mu na twethsera ci a ku na mi wane o ku mu di o kupira katamwethzi nji thso ku mi shomorora pa meho a Nyambi, karo o ku mu yoya ko thsiyaro.
15 Mu dimuke ci kukwatamucima kwa Fumu wetu po kuyoyithsiwa, eci dyodi a mi ñorerire mushimiwa wetu muenthzetu Paulu naye kokuthza ko mathsaano aa a mu pire Nyambi. 16 Aa ñoranga kengeyo mu mañoro enthzi oahe aa a na ñoranga. Mu mañoro enthzi mo i di enu imweya yoikaru ku i yuvithsithsa, eyi a na tengururanga anu awa a na kana ku dimuka thsimweya nowa a na kana ku tanara mu thsitawo, eci dyodi a na tendanga ku Mañoro amweya. Anu awa tenda kengeyo po aa cithsera athsinda kunongithsiwa.
Maywi a Peturu o mahurerero
17 Mweyo, amwe ashimiwa ange, pakuninga ci na mu nomenithsiwa cimo, mu mamere ci mwa ku yembururiwa ku kumbunja kwanu a shiremeka murao no ku yawa kutanara kwenu. 18 Unone mu kure mu thsihemo no mudimukero wa Fumu no Muyoyithsi wetu Yesu Krisitu. Ku kwenthzi kwikare kutethzima thsino thsikati no diyere! Ameni.