Arongithsi o mbango
2
Unone ku kare nako kwa keyangire akwakukethza o mbango, eci dyodi kwa ku keya arongithsi o mbango mu kaci kenu. Kenge a ku retamo muvudi erongithsa yo kwipa yo kwipithsa, kuninga ci mane kenge a ku hamura Ñathsire wo oyu na a wa uru, ku ciretera athsinda kunongithsiwa ko wanguwangu. 2 Owangi kenge a ku shupwera ongurunde wo, mukaci kowa arongithsi, dikuñwa dyoshemwa kenge dya kwipithsiwa dithzina. 3 Mukaci ko rununa rwo, awa arongithsi o mbango kenge a ku mi pukura ko maywi onyanyami. Unone Nyambi naa wa ratura kare, karo kunongithsiwa kwo ka ku rarire.4 Inene Nyambi ka andwire tungeru otu twa tendire thsivi, unone wa tu konthzerire mu dihere no ku twanga ko madyenge o mirema thzothzikuru, mo twa kwikara shime ku kuma mu diyuwa dyo raturo. 5 Karo Nyambi ka andwire kaye ko kare ou a retire dimina kwanu owamango, unone wa ungurire pohuma Nuwe mukwakuhonga owawa namweya o mutanu naidi. 6 Karo Nyambi kuma a raturire mambongi a Sodoma na Gomora ko ku a ñotokithsa ko mudiro, ku monithsa akwakukana ku tawa muro keyi ya ku tendahara kukwo. 7 Karo kuma a amwenine pohuma Lota mukwerume o muwawa oyu wa cinyengangire mukaci kongurunde wanu a shiremeka murao. 8 Oyu munu o muwawa, wa yoyire diyuwa no diyuwa mu kaciko, wa korangire nene ku mucima wenthzi ouwa ou a monangire no ku yuva etenda yo yoimango. 9 Shaanga apa idi kengeyo, Fumu aye na dimuka dyo ku amwena anuenthzi kwiereka, no ku turekera anu o dipethso humbithso shime ku ka kuma mu diyuwa dyo raturo. 10 Eyi po ya shemwa, nenepo kwanu awa a na shupwera ecikumbwethza yoimango yerama, no ku yengwera okoro.
Kokeshu no maranduru, awa arongithsi ka yapire ku shwahura akwakutethzima o ku wiru. 11 Unone shaanga tungeru, otu tu di nokoro nene o ku piterera, ka tu raturangire ko matuka awo o kutethzima pa meho a Fumu.
12 Unone awa anu aa cipitura eci eyama yo kupira maano, eyi yerekiwerire ku kwatiwa no ku paiwa. A epithsa dithzina enu eyi a na kana ku yuvithsithsa. Nawo kenge a kunongithsiwa eci eyama. 13 Kunyandithsiwa odiyo muyambo wo mwikwama yo yoimango. Aa cikoranga ku tenda yoimango mutenya wa marumba. Aa fithsa honyi no ku reta ku shwahuriwa mu kaci kenu, karo aa cikora kwangera o kwa dya nenu. 14 Meho o a na yara mirembe, kadi akwa ku thsia ku tenda thsivi. Aa hongawera mu thsivi awa na kana ku tanara. Micima thzo na thzi cirongithsa rununa. Na kutiwa.
15 Na tundu mu dikuñwa dyo ku oroka no ku shupwera dikuñwa edi a endire Balaami Mwana Beori, oyu wa shimine nene madi aa a wanine pa ku tenda omango. 16 Unone wa kutururiwire mukaci kekwama yenthzi yoimango. Shaanga ci thsindongi thsa diyerire thsi amba, thsa ambire ko diywi dyo munu ku kanithsa oyo mukwakukethza ci a tenda yothzaruki wenthzi.
17 Awa anu aa cipitura eci manowa o kupira meyu, karo aa cipitura eci mbundwi ethzi thzi endithsiwa ku dyungu. Awopo a na turekeriwa mirema thzothzikuru. 18 Inene akwamununa, karo a amba enu yotomba. Kongurunde wecikumbwethza yerama, aa hongaura awa a para kowa a yoya mu dikuñwa dyo kwipa. 19 Aa kumbwethza anu ci kenge a kurukuruka, unone awa amba kengeyo po apika yokwipa. Inene munu yomuhe aa pikuriwa ku thsinu thsothsihe ethsi thsi na mu othzo. 20 Inene ngeci anu awa na para kumango o kaye ko ku dimuka Fumu no Muyoyithsi wetu Yesu Krisitu, awopo a hukera mumango no ku othziwa, awo anu o kengeyo mukarero wo o ku mamaneneno kenge wa kwipa nene kupita pa kutanga. 21 Nga yekarire nawa ci nga a diyerire ku dimuka dikuñwa dyowawa, kupita ku tanga ku di dimuka no ku pa muongo thsiraerera thsothsikenu ethsi na piwa. 22 Eyi a amba aa maambo o shemwa na i tendahara ku kwo, o ku amba ci: “Mbwa na hukera oshanje wenthzi,” karo dimweya dyaa amba ci: “Nguru oyu na yoiwa marowa na hukera ku cirowekamo.”