Jakovo 1

Diñoro dya

Jakovo

Kuvumenena

Yame no Jakovo, mupika Nyambi na Fumu Yesu Krisitu, naa ñorera amwe mwa mikuta thzo dikumi na thzidi thza Isiraele ethzi na thzi panthzaanena mu matunga Anukenge. Naa mi vumenena.

Thsitawo nonyanyami

2 Andengenu, mu nyanyuke nene iereka yo mishovoshovo o ku i na mi keyera, 3 inene mu na dimuka ci ngeci thsitawo thsenu athsopo thsi erekiwa yaa reta ci othzui wenu u kure. 4 Mu thsie othzui wenu u kure, ci mwikare o kwononoka no ku kwanenena ko kupira thsimweya thso ku fotahara.

5 Ngeci kwaa di ku kwenu oyu na foto onyanyami, a u rombe kwa Nyambi, kenge a u mu pa, aye mupe na panga anu wahe ko kupira ku kumathzeka. 6 Uno honi o ku na rombo ku kwenthzi, waa roera ku tawa kadi ku tamangera, inene o ku tamangera po aa cipitura eci diñithsingi edi di endithsiwa no ku yerauriwa ku mupepo. 7 Munu o kengeyo a anekera ci kenge nga a tambura thsinu kwa Fumu, 8 inene o di no micima thzidi, ka a tenamine mwinu yoihe eyi a kwama.

Ohepwe no rufumo

9 Mukwakutawa o hepwe aa roera ku nyanyuka Nyambi o ku na mu cimbura. 10 No fumanyi naye aa roera ku nyanyuka Nyambi o ku na mu huthsa kushi, inene fumanyi kenge a ku nonga eci matemo o mu murundu. 11 Inene diyuwa yoihe di kambeka no ku pya, thsimena thsaa rera no matemo aa kurumukako nowa wao waa pwa. Dyaa kwikara no fumanyi naye, kenge a ku nonga nenu yenthzi yoihe eyi a koña.

Iereka nothzui

12 Wa thsiyauthzi munu o ku twethsa ku cithzua mwiereka, inene yoihe a tanara, iereka ou ya ku pita kenge a ku wana muyambo o mwoyo o diyere, ou a kumbwethzire Nyambi awa a na mu shimi.

13 Munu yoihe a tumauriwa a amba ci: “Nyambi oyu ni tumaura,” inene Nyambi tumba a tumauriwa kumango, karo aye ka a tumaurangire munu. 14 Unone munu no munu aa tumauriwa kecikumbwethza yenthzi yoimango eyi i mu hongawera ku ku kwama omango. 15 Mweyo honi, ecikumbwethza yaereka thsivi, thsivi yoihe thsi kura thsaereka kufa.

16 Aenthzange awa na shima, mwa ciangera mwathsinda. 17 Thsipa thsothsihe thsothsiwa no kwononoka thsaa tunda ku wiru kwa Nyambi, Tata oyu wa kwamine myethzi thzothzihe thzo diwiru, aye ka a wana mamiru eci mithzimbimbi ethzi thzi thza o thsiuruka. 18 Keshima yenthzi, wa tu pire mwoyo ko diywi dyo shemwa ci nga twikare mutomwa ku yumbiwa yenthzi yoihe.

Ku yuva no ku tenda

19 Aenthzange awa na shima, mu dimuke eyi, munu yomuhe a yakame ku teerera, unone a katape ku amba no ku anthzipa. 20 Inene oanthzi o munu tumba u reta owawa ou a fota Nyambi. 21 Mweyo, mu tunde kwinu yo dithziro no kumango ouhe. Mu tambure ko ku cihuthsa kushi diywi edi na a kunu Nyambi mu micima thzenu, inene dyaa twethsa ku yoyithsa myoyo thzenu.

22 Mwa teereranga pohuma diywi dya Nyambi, unone mwaa roera ku tenda eyi di amba, inene ngeci ka mu tendire kengeyo mwaa ciangera mwathsinda. 23 Inene o ku teerera pohuma diywi dya Nyambi, unone kadi wa ku kwama eyi di amba, aa cipitura eci munu o ku cikenga thsihanga thsenthzi mu thsiponi. 24 Uno honi yoihe a mana ku cimona no ku thza, popo aa vurama edi ekara. 25 O ku kengerera nawa mu murao o kwononoka o ku twethsa ku rukurura munu, ayepo u hengeka ko kukana ku yuva pohuma no ku vurama, unone aa tenda eyi a na yuvu, oyo munu kenge a ku tambura thsiyauthzi kwa Nyambi mweyi a tenda.

26 Ngeci munu ayepo cishimba ci o di no thsitawo, unone aa kwanga ku kwata rudimi rwenthzi, aa ciangera yothsinda, karo thsitawo thsenthzi thsa tumbako. 27 Thsitawo thso shemwa thso kupira katamwethzi pa meho a Nyambi Tata wetu po: ku nyunga athsiana no mafakathzi mu makando o, no ku cinyunga kumango ouhe o mu kaye.