Dyo ku roerithsa Nyambi
13
Mu twarerere mu ku cishima oandu eci ana o dira dyofoci. 2 Mwa vurama ku tambura nawa enda mu myanda thzenu, inene ko ku tambura enda, anu amweya a tamburire tungeru ko kukana ku i dimuka. 3 Mu vuruke awa di mu kamenga, eci mo mu di namwe. Karo mu vuruke awa tendiwa omango, eci yaa tendiwa mwirama yenu.4 Maruo a remekiwe kwanu wahe, karo odidi o maruo wa thsirekiwa. Inene Nyambi kenge a ku ratura akwaruthziho nakwamirembe. 5 Mwa shima nene madi mu myoyo thzenu, karo mu rakwe eyi mu di nayo, inene Nyambi wa ambire ci:
“Mbera ka ni ku thsii;
karo mbera ka ni ku thsierera.”
6 Mweyo, twaa twethsa ku amba kondume ci,
“Fumu yodiyo mukwathsi wange,
ka na ku yapa!
Thsine ethsi nga a ni tenda munu?”
7 Mu vuruke aendithsi enu awa tangire ku mi rongithsa diywi dya Nyambi. Mu anekere eyi na i tundu pa muyoyero wo, karo mu temunune thsitawo thso. 8 Yesu Krisitu ka a wana mamiru, dyodi na ekara yana, no rero dyo a di, karo dyaa kwikara diyere.
9 Mwa pambanithsiwa kwirongithsa yayo yo kucithsiathsia, inene ku di nawa ci micima thzenu thzi tanarithsiwe ku thsihemo, kadi kwidya yedika eyi i ninga ci ka i kwathsire thsimweya awa na i shupwera.
10 Tu di no katara keyambero apa a na kana ku roera ku dya awa a na kwamena mu tende thzerombero.
11 Inene mupurisita shokuru aa twaranga onyinga weyama mu Ndau thzo Shokenu Nene kwikara thsiyambero thso thsivi, unone erama yeyo eyama yaa tumekeriwanga pora thzo thsirombo. 12 Mofoci, no Yesu naye wa fererire pora thzo thsikuña ku kenithsa anu kwivi yo konyinga wenthzi. 13 Mweyo, tu thzenu ku kwenthzi pora thzo thsirombo tu ka shimbe natwe matuka aa a cithzuire. 14 Inene ka tu di no thsikuña thso diyere muno mu kaye, unone twaa taterera thsikuña ethsi thsi keya.
15 Mweyo, tu twarererenu ku tupura thsiyambero thso ku shangara Nyambi ka Yesu, tu citawerenu dithzina dyenthzi ko tunwa twetu. 16 Mwa vurama ku tenda yoiwa no ku kwathsa awa a na piri, inene eyo yodiyo eyambero eyi i roerithsa Nyambi.
17 Mu yuvere aendithsi enu no ku cipaka kushi thzo, inene aa nyunga myoyo thzenu, karo aa roera ku citawera kwa Nyambi keyi yekwama yo. Mu kwame eyi ci myoyo thzo thzikare thzo thsinyanyu kadi thzo thsishiro, inene eyo nga ka ya ku mi kwathsa thsimweya.
18 Mu tu romberere, inene tu na dimuka shemwa ci mimoneno thzetu thziwa, karo twaa cikumbwethza ku yoya mwoyo o direma thsikati thsothsihe. 19 Naa koñomeka ku mi romba ci mu ni romberere kwa Nyambi ci na ku huke wanguwangu oko ku kwenu.
Kufiyawera
20 Nyambi o thsiyaro oyu na a pindura Fumu wetu Yesu kwafu, aye Mudithsani Shokuru o mangu, konyinga wenthzi ou u tanarithsa thsiyuvano thso diyere, 21 a mi pe enu yoihe yoiwa ci nga mu twethse ku tenda eshima yenthzi. Karo a tende mu mwetu ka Yesu Krisitu yo ku mu roerithsa. Kutethzima kwikare ku kwenthzi diyere na diyere! Ameni.
Maywi o mamaneneno
22 Andengenu, naa mi adikanena ci mu teerere nawa aa maywi otanarithso aa ni na mi ñorera, shaanga ci kuma ni naa mi ñorera ko wipi. 23 Naa mi dimukithsa ci muenthzetu Timoti na a punithsiwa mu kamenga. Ngeci waa ku na kume wangu kuno, kenge na ku keya nenthzi ku na mi mona.
24 Mu ni vumenenene aendithsi enu wahe nakwakutawa wahe. Akwakutawa o ku Itali aa mi vumenena.
25 Thsihemo thsa Nyambi thsikare nenu mwahe.