Diñoro dya Paulu kwa
Filimoni
Kuvumenena
1
Edi diñoro dyaa tunda ku kwange ame no Paulu, ame no thsinthzinda mukaci ka Krisitu Yesu, noku kwa muenthzetu mukwakutawa Timoti. Twaa ñorera Filimoni muenthzetu oyu twa shima, karo oyu tu na kwamena Yesu Krisitu pofoci nenthzi, 2 mofoci kengeyo na ndumbuthzetu Apiya no Arikipo muenthzetu dishwarare, karo no ku kereke ethzi thzi na ciwanenanga mu nthzio thzoe. 3 Thsihemo no thsiyaro ya Nyambi Tata wetu na Fumu Yesu Krisitu ikare nenu.Thsishimo thsa Filimoni no thsitawo thsenthzi
4 Thsikati thsothsihe naa kandereranga kwa Nyambi wange yoihe ni ku romberera Filimoni, 5 inene naa yuvanga yo thsishimo thsoe kwakwakutawa wahe no thsitawo thsoe kwa Fumu Yesu. 6 Naa rombera ci ku kwamena koe pofoci netu mu thsitawo ku ku retere odimukero o kuyara wenu yoihe yoiwa eyi tu di nayo mukaci ka Krisitu. 7 Shadi, thsishimo thsoe na thsi ni retera thsinyanyu thsothsikuru nohengawethzo, inene thsihemo thsoe na thsi yooyerithsa micima thzanua Nyambi.
Paulu aa adikanenena Onesimasi
8 Mweyo, shaanga ci ni di nondume mwa Krisitu o ku ku tumina ci o kwame eyi o na roera ku kwama, 9 ni na hangura ku ku adikanena mukaci ko ku cishima kwetu, ame no Paulu, mukuru o mukwerume, karo no thsinthzinda mukaci ka Krisitu Yesu.
10 Naa ku adikanena mukaci ka mwanange Onesimasi, oyu wa tatekire kwikara mwanange mu thsitawo o ku ni di mu madyenge. 11 Pa kutanga ka na a kwathsa thsimweya ku koe, pano honi aa kwathsa nene ku koe noku ku kwange. 12 Naa mu huthsa ku koe, aye mucima wange shemwa.
13 Ni na foto ci nga ni na u cipakera ci a ni kwamene kuno mu dithzina dyoe uno ni di mu madyenge mukaci ko Muthzimbu Ouwa. 14 Unone ka na ni foto ku kwama enu owe ko kukana ku i tawa, ci yoiwa eyi nga o kwama yekara yo ku ooteriwa, unone o i kwame keshima yoe. 15 Eyi ngwa yodiyo a tundithsiwerire ku koe kamanana ci nga a kwikare woe diyere. 16 Ka a di honi eci mupika ku koe, unone aa pita mupika, nekara honi muenthzoe mukwathsitawo o ku shimiwa, nenepo ku kwange. Kenge na ekara honi o mukuru mu thsivaka ku koe pakuninga ci mupikoe, karo muenthzoe mukwakutawa kwa Fumu Yesu.
17 Mweyo, ngeci waa ni shimba ci no muenthzoe mu thsitawo, o mu tambure eci edi nga o ni tambura. 18 Ngeci ko i di eyi na a kwipithsera nji ku ku korota, o ni pe oo murandu. 19 Ame no Paulu naa ñora eyi ko dyoko dyange. Kenge na ku i kura. Ka ku roerire ci shime ni ku vurukithse ci owe no ni korota mwoyo woe.
20 Ii, shadi, naa adikana o ni kwathse kengeyo mu dithzina dya Fumu Yesu. O yooyerithse mucima wange ko kwikara muenthzange mwa Krisitu.
21 Ni na dimuka shemwa ci uno ni ñora kengeno, kenge wa ku tenda kengeyo mane ku piterera omu ni na rombera. 22 Ku na thsiara thsofoci, o ni roithsereko maturero, inene ni di nokurupero ci kerombero yenu kwa Nyambi ni tamba ku huthseriwa ku kwenu.
Kuvumenena ko mamaneneno