Mikarero thzakwakutawa
3
O vurukithse akwakutawa ci a cihuthse kushi thzakwakutumina naendithsi, a wa yuvere, no ku ciroithsera thsikati thsothsihe ku tenda yoiwa. 2 Ka roerire kwipithsa dithzina dyo munu yupi nji yupi, a tunde ku dikanyi, ekare o kuwamicima, no ku cihuthsa kushi kwa munu yomuhe.3 Inene natwe pa kutanga shime twaekara etomba no kukana ku yuvera, shime twa angeriwa no ku pikuriwa kwicikumbwethza necikora. Twa yoyire komango no mbamba, ku thzimbiwa no ku cithzimba namweya.
4 Uno honi thsihemo no thsishimo thsa Nyambi Muyoyithsi wetu ou ya monaharire, 5 wa tu yoyithsire, kadi kekwama yowawa eyi twa kwamine, unone ko ñeke thzenthzi. Wa tu yoyithsire ko ku yoiwa ko kwerekiwa ope no ku tendiwa ope ko Mupepo Oukenu. 6 Nyambi wa tu pire Mupepo Oukenu kongi mwa Yesu Krisitu Muyoyithsi wetu. 7 Wa tendire kengeyo ci ko thsihemo thsenthzi nga tu twethse ku tendiwa owawawa, ci nga twa ku tambure mwoyo o diyere ou tu na kurupera. 8 Edi diambo po dya shemwa. Naa fota ci o tanarithse ku rongithsa eyi enu ci wahe awa a na tawa kwa Nyambi nga a twethse ku cipa athsinda kwikwama yoiwa. Eyi enu po iwawa nene karo yaa kwathsa munu yomuhe.
9 Uno honi o tunde ku makanyi otomba no mahumo no makanyi no ku cianthzipera mukaci ko murao, inene eyo ka i kwathsire thsimweya, karo ya mbango. 10 Ngeci anu aa reta kucitepatepa mu kaci kenu, o wa nomenithse ro kutanga noru ro muthsidi, munyima thzeyo, wa vanda yo karo. 11 Inene mu na dimuka ci anu o kengeyo na tundu mushemwa karo anu wevi, aa ciratura athsinda.
Eraerera yo mamaneneno no kuvumenena
12 Ou na ku ku tumena Aritemasi nji Tikike, wa ku kwame momuhe omu wa ku twethsera ku keya ku kwange mu Nikopolosi, inene na ni hangura ku kekaramo kufu yomuhe. 13 O kwame momuhe omu o na twethsera ku yokororithsa Zenasi mukwakutongonona murao o Thsijuda na Apolosi mu ruendo rwo. O mone ci aa piwa yoihe eyi i na fotahara kukwo. 14 Anuetu nawo aa roera ku cirongithsa ku tenda ekwama yoiwa, ci a twethse ku kwathsa mwinu eyi i na fotahara ko wanguwangu, karo ka roerire ku yoya mwoyo o kupira ima.
15 Wahe awa a di nange kuno aa mi vumenena. O tu vumenenene awa a na tu shimi mu thsitawo.
Thsihemo thsa Nyambi thsikare nenu mwahe.