Diñoro dyo ku
Maheveru
Yesu po Mwana Nyambi
1
Kukare, Nyambi wa ambire rorungi, karo ko makuñwa oangi kakwakukethza kwakwathsañuruetu. 2 Uno honi mo ano mayuwa o mahurerero na a amba ku kwetu ka Mwane, aye oyu a hangurire Nyambi kwikara shwana wenu yoihe, karo kenthzi aye, Nyambi wombire enu yoihe. 3 Aye Mwana yodiyo diyeye dyo kutethzima kwa Nyambi nedi ekara shemwa Nyambi, yodiyo na kwata enu yoihe ko diywi dyenthzi dyodikoro. Ou a manine ku tu kenithsa kwivi yetu, wa thzire mu wiru no ku kekara ku dyoko dyo rudyo dya Nyambi Shokuru mu wiru. 4 Eyi yaa monithsa ci Mwana naa tendiwa o mukuru kupita tungeru, inene dithzina edi naa piwa po dikuru kupita mathzina o tungeru.Mwana po mukuru ku tungeru
5 Inene kapi ku tungeru aka a amberapo Nyambi ci:
“O mwanange,
rero ni na piruka Tata woe”?
Nji karo ci:
“Kenge na kwikara Tata wenthzi,
karo kenge a kwikara Mwanange”?
6 Unone Nyambi ou a retire mwedi wenthzi mu kaye wa ambire ci:
“Tungeru twa Nyambi totuhe tu mu rombere.”
7 Keyi yo tungeru aa amba ci:
“Aa tenda tungeru twenthzi eci mipepo,
karo aa tenda akwakukwamenthzi eci mirengi.”
8 Unone keyi ya Mwana aa amba ci:
“Ngunja thzoe, Nyambi, thza diyere na diyere,
Waa tumina ko muramu owawa.
9 Waa shima owawa no ku thzimba omango.
Mweyo, Nyambi, aye Nyambi woe, na ku hangura,
ko ku ku wethsa maathzi o thsinyanyu kupita aenthzoe.”
10 Karo aa amba ci:
“Yowe Fumu, oyu wa shishire mushisho o kaye ku matatekero,
karo diwiru po ekwama yo moko oe.
11 Kenge ya ku pwa, unone owe kenge wa kwikara diyere.
Yoihe kenge ya ku kurupara eci thsito,
12 Kenge wa ku i funda eci vaki,
karo kenge ya ku cinjiwa eci eto.
Unone owe kenge wa kwikarerera kengeyo,
karo myaka thzoe mbera ka thzi pu.”
13 Kapi ku tungeru aka a amberapo Nyambi ci:
“O wikare ku dyoko dyange dyo rudyo,
shime ku ka kuma apa na ku tendera akwethzimbo
yoe thsipura thsedyato yoe?”
14 Mweyo, tungeru po mipepo pohuma ethzi thzi kwamena Nyambi, karo thzaa tumiwanga ku na kwamena awa ku tambura kuyoyithsiwa.