Nyambi Tata wetu
12
Mweyo, pakuninga ci tu na thzingurukiwa ku mungi o mambangi, tu thsienu yoihe eyi i na tu remena, karo tu thsienu thsivi ethsi thsi na tu rambera. Tu cirenu ko muooto shime ku ka kuma ku mamaneneno o rakaraka ethzi thzi na tu taterera. 2 Tu kengererenu kwa Yesu, aye mutateki no mukwakwononona thsitawo thsetu. Inene mukaci ko thsinyanyu ethsi thsa mu tatererire, wa cithzuire pa mbinda, karo ka a fire honyi ku fera pa mbinda. Pano honi nekara ku rudyo ro ngunja thza Nyambi. 3 Mu anekere Yesu, oyu wa cithzuire orwithsi ku tunderera kwanu wevi, ci katere mwa ku aye nji ku huka munyima. 4 Mu ndwa thzenu thzo ku kanena thsivi ka na mu kumupo mu thsikati thso kuninga ci shime ku paiwa. 5 Ene mu na vurama maywi otanarithso aya a mi amberire Nyambi eci munu oyu thsiurura anenthzi? Wa ambire ci,“Mwanange, wa tendithsa dipome yoihe a ku orora Fumu,
karo wa huka munyima yoihe a ku thsiurura.
6 Inene Fumu wa ku orora oyu a shima,
no ku humbithsa oyu a na tambura ci mwanenthzi.”
7 Mu cithzue mwikarupa inene mwaa ororiwa. Mu i shimbe ci Nyambi oyu mi tenda kengeyo. Ene kwaa di mwana oyu wa kana ku ororiwa kwa tata wenthzi nji? 8 Ngeci Nyambi ka a mi ororangire eci edi a na ororanga anenthzi wahe, apo mu dimuke ci kadi mwanenthzi shemwa unone mwana o mu muhonyi. 9 Kadi eyo pohuma, unone twekarire natata wetu o pano pashi awa tu ororire, karo twa wa remekire. Ene kadi twaa roera ku cihuthsa nene kushi thza Tataa wetu o ku wiru ci tu yoye?
10 Atata wetu o pano pashi na tu orora thsikati thsothsipu kokuthza komu na monena ci nga dyo tu na roera ku yoya. Uno honi Nyambi aye aa tu orora ku tu kwathsa ci nga tu ciere mukenu wenthzi. 11 Mu thsikati thso ku ororiwa, munu ka a ciyuvangire nawa, unone aa yuvanga kukora. Uno honi munyima yaa reta ima yo thsiyaro nowawa kowa na fundithsiwa modi dikuñwa.
12 Mweyo, mu yerure moko enu aa a kunthza, karo mu tanarithse manwi enu aa a nderathzoka. 13 Mu orore makuñwa edyato yenu ci thsikunga thsa kurukab, unone thsi pore.
Mwa kana thsihemo thsa Nyambi
14 Mu koñomeke ku yoya ko thsiyaro nanu wahe no ku yoya mwoyo oukenu, inene o kukana kukena ka ku mona Fumu. 15 Mu mamere ci kwa waniwa ku kwenu oyu wa ku kwanga ku tambura thsihemo thsa Nyambi, karo mu mamere ci kwa tunguka mu kaci kenu mutungu o ndurungera no ku reta okaru, no ku thsireka anu owangi. 16 Mu mamere ci kwa waniwa ku kwenu o ruthziho nji shiremeka Nyambi eci Isau oyu wa urithsire oroero wenthzi o wedi ko mudyero ofoci. 17 Mu na dimuka namwe ci munyima thzeyi, Isau ou a fotire ci a tambure ethso thsiyauthzi kwa tata wenthzi, tata wenthzi wa mu kanenine. Ka ya tawire ci a cere eyi a tendire shaanga ci wa direrire nene ethso thsiyauthzi.
18 Ka na mu kumu ku thsinu thso ku twethsa ku kwatiwa, nji ku ndau thzo mudiro ou u yuuma, nji mirema, nji thsithsike, nji kakundukundu nji dyungu, eci edi yekarire ku Maisiraele pa mukinya wa Sinai. 19 A yuvire muvumo o torombita no diywi dyo ku yapithsa nene ku ninga ci mane awa a di yuvire a rombire Nyambi ci a amba karo. 20 Inene ka twethsire ku cithzua thsiraerera thso ku ninga ci: “Shaanga thsikondwama nga athsopo thsi kunyuna ku mukinya, thsaa roera ku povauriwa no mawe ku thsipaa.” 21 Eyi ya monaharire ya yapithsire nene ku ninga ci mane shaanga Mushe wa ambire ci: “Ni na yapa no ku tutuma!”
22 Uno honi amwe po na mu keya ku Mukinya wa Sione, athso thsikuña thsa Nyambi oyu yoya, aye Yerusalema o ku wiru, no ku tukore na tukore to tungeru mu thsiciwano thso thsinyanyu. 23 Na mu keya ku thsiciwano thsedi a Nyambi awa a na ñoriwa mathzina o mu wiru. Karo na mu keya kwa Nyambi aye mukwakuratura anu wahe no ku mipepo thzanu owawawa awa na tendiwa o kwononoka. 24 Na mu keya kwa Yesu mukwakwimanena thsiyuvano thsothsipe, karo na mu keya kunyinga ou wa shamauriwire, ou u amba yoiwa kupita onyinga wa Abele.
25 Mu mamere ci katere mu kane oyu amba! Inene ngeci waya a kanine ku teerera ya Mushe aye kanganda ko pano pashi ka parire, atwe ne ngepi twa ku para ngeci twaa kana oyu tu nomenithsa ku tunderera ku wiru? 26 Nyambi uya a ambire pa Mukinya wa Sinai diywi dyenthzi dya ngangamithsire kaye. Uno honi, pano naa kumbwethza ci: “Kenge na ku hukera ku ngangamithsa kaye, karo kadi kaye pohuma unone no diwiru kengeyo.” 27 Pa ku amba ci “ku hukera” yaa monithsa nawa ci eyi yombiwire yoihe kenge ya ku ngangamithsiwa no ku tundithsiwa, ci yo kukana ku twethsa ku ngangamithsiwa ya ku thsiare.