Anu nanuwo
3
Mofoci, namwe mwambuyama mu cihuthse kushi thzanuwenu, ci ngeci amweya kukwo kadi akwa ku yuvera diywi dya Nyambi, a twethse ku retiwa mu thsitawo ko mikarero thzothziwa thzanuwo ko kukana ku amba diywi. 2 Kenge a ku cimonena kukena kwenu no mikarero thzenu thzo direma.3 Owa wenu wa tunderera kwiciyenga yo peuru, yo kupitura eci mirukero thzo kucithsiathsia thzo huki, nji epako yo gauda, nji evata yoiwa. 4 Unone owa wenu wikare o mu kaci, ao owa u shipu, o kuwamucima, o mupepo o ku tutwara, ao oukuru mu thsivaka pa meho a Nyambi. 5 Inene kenge dya ciyengangire ambuyama owakenu o kukare awa a kuruperire Nyambi. Kuma a cihuthsangire kushi thzanuwo, 6 eci Sara, aye oyu wa yuverire Aburahama no ku mwithsa ci fumu wenthzi. Mwana Sara o wambuyama ngeci amwepo mu kwama eyi i na roera ko kukana ku yapa thsimweya.
7 Mofoci namwe mwakwerume, mu yoye nawa nanuwenu ko ku dimuka ci akwa ku faratera kupita amwe. Mu wa remeke, inene kenge mwa ku tambwera mofoci thsipa thsa Nyambi thso thsihemo thso mwoyo oupe. Mu tende kengeyo ci kwekara thsinu thsimweya ethsi nga thsi kwangithsa erombero yenu.
Kunyandera ku kwama yoiwa
8 Ko ku manenena, mwaheno mwikare no mucima ofoci no kwikara no ñekeñeke. Mu cishime oandu namweya eci ana o dira dyofoci, karo mwikare no ñekeñeke no ku cihuthsa kushi. 9 Mwa huthsera omango nomango nji matuka no matuka. Uno honi mu huthsere omango ko thsiyauthzi, inene eyi yodiyo na a mithsera Nyambi, ci mu wane thsiyauthzi. 10 Inene ku na ñoriwa ci,
“Yomuhe o ku fota ku cikora mwoyo,
no ku fota ku mona mayuwa oawa,
a nyunge rudimi rwenthzi kwinu yoimango,
karo a nyunge miromo thzenthzi ku ku amba yo kwangera.
11 A tunde kumango a kwame yoiwa.
A fotafote thsiyaro ko mucima wenthzi ouhe.
12 Inene meho a Fumu aa tanekera kowa owawawa,
karo matwi enthzi aa teerera erombero yo,
unone Fumu aa pa muongo awa a tenda yoimango.”
13 Edye oyu nga mi yuvithsa kukora ngeci mwaa shima nene ku tenda yoiwa? 14 Uno honi shaanga yamwe mu nyandera yoiwa, kenge mwa kwikara no thsiyauthzi. Mwa yapa munu nji ku cithzekera thsimweya. 15 Uno honi mwikare no direma kwa Krisitu Fumu mu micima thzenu. Mu ciroithsere thsikati thsothsihe ku tawa awa a mipura mukaci kokurupero ou mu di nao. 16 Uno honi mu i kwame ko kuwamucima no direma. Mwikare no mumoneno ouwa, ci awa a mipithsa mathzina mukaci ko mikarero thzenu thzothziwa mwa Krisitu nga a ene. 17 Inene ku di nawa ku nyandera etenda yoiwa, ngeci yodiyo eshima ya Nyambi, kupita ku nyandera etenda yoimango.
18 Krisitu naye wa nyanderire evi rofoci karo ro mahurerero, aye o muwawa ku nyandera o dipethso, ci a mi rete kwa Nyambi. Wa paiwire kwirama unone mu Mupepo Nyambi wa mu pire mwoyo karo. 19 Ko mupepo wa thzire ku ka honga mipepo ethzi thzi di mu kamenga. 20 Ethzo po mipepo thzowa a kanine ku yuvera Nyambi kukare, Nyambi wa tatererire ko ku kwatamucima mo aya mayuwa a umbire Nuwe areka. Anu o mutanu nahatu pohuma awa a yoyithsiwire ko aya meyu o dimina. 21 Aya meyu nedi thsimonithso thso korovethzo ethzi thzi mi yoyithsa pano honi, kadi ko ku tundithsa dithziro perama, unone thzo ku romba Nyambi mumoneno oukenu ko kupinduka kwafu kwa Yesu Krisitu, 22 aye oyu naa thzi mu wiru no ku kekara ku dyoko dyo rudyo dya Nyambi, ku endithsa tungeru, eyi i di nokoro neyi yoshokoro.