Diwe edi di yoya no mbunga thzothzikenu
2
Mweyo, mu thsie omango ouhe, no kwangera kokuhe, no mahetaheta, no mbamba no kwipithsa amweya mathzina kokuhe. 2 Mu cipiture eci tumbu, mu fote nene mahwe oakenu o Mupepo, ci nga a mi kurithse mu kuyoyithsiwa kwenu, 3 pakuninga honi ci na mu ereka owa o thsihemo thsa Fumu.4 Mu keye ku kwenthzi, aye diwe edi di yoya, edi a kanine anu unone na di hanguriwa kwa Nyambi no kwikara dyodikuru mu thsivaka ku kwenthzi.
5 Namwe mu nekara eci mawe aa a yoya, aa a umbiwa nthzio thzo mupepo, kwikara opurisita oukenu, ku tupura eyambero yo mupepo yo ku tamburiwa kwa Nyambi ka Yesu Krisitu. 6 Inene mu Mañoro ku na ñoriwa ci,
“Naa paka diwe mu Sione,
diwe dyo diunthzi dyo mu mbango, edi di na hanguriwa karo dikuru mu thsivaka,
yomuhe o ku mu kurupera,
ka a ku fithsiwa honyi.”
7 Uno honi ku kwenu amwe mu na tawa, edi diwe po dikuru mu thsivaka. Unone kowa a na kana ku tawa,
“Diwe edi na kana akwakuumba,
di na piruka diunthzi dyo mu mbango.”
8 Karo ku na ñoriwa ci,
“Edi po diwe edi di kuñukithsa anu,
karo edi di wa retera ci a we.”
Aa kuñuka inene ka yuverire diywi. Eyo modiyo a i shimenine Nyambi kukwo.
9 Uno honi amwe po mwanu o ku hanguriwa, opurisita o thsifumu, mbunga thzothzikenu, anua Nyambi. Mwaa hangweriwa ku raura ekwama yoiwa nene yoyu na a mithsi ku tunda mu mirema kwingena mu mwethzi wenthzi o ku komokithsa. 10 Pa kutanga ka mwekarire anua Nyambi, uno honi pano mwanua Nyambi. Pa kutanga ka mwa tamburire ñeke, uno honi pano na mu tambura ñeke.
11 Ashimiwa ange, naa adikana ku mi romba ci eci edi mu di ci mwenda, karo mwa matundakure muno mu kaye, mu tunde kwicikumbwethza yerama, eyi i rwithsa myoyo thzenu. 12 Mu yoye nawa mu kaci ko mahedeni, ci shaanga wowa mi capa eamba, nga a mone etenda yenu yoiwa no ku shangara Nyambi mu Diyuwa edi a ku keya.
Kuyuvera oendithsi
13 Mukaci ka Fumu, mu cihuthse kushi thzanu wahe awa na piwa oendithsi, ikare aye fumu muendithsi shokuru, 14 nji ku manguvuru awa naa tumu ku pa humbithso awa a tenda yoimango no ku shangara awa a tenda yoiwa.
15 Inene eshima ya Nyambi po ci nga mu kwame yoiwa ci mu tutwarithse kupira odimukero kwanu wetomba. 16 Mu yoye eci anu o kurukuruka, unone mwa cikwathsithsa kurukuruka kwenu ku thsika omango, mu yoye eci apika Nyambi. 17 Mu remeke munu yomuhe, mu shime akwakutawa amweya. Mu yape Nyambi, karo mu remeke fumu.
Muro o makando a Krisitu
18 Apika, mu cihuthse kushi thzañathsirenu, mu wa monithse direma dyodihe, kadi kowa owawa nowa o kuwamicima pohuma, unone nowa o ñore. 19 Inene mwaa roerithsa Nyambi yoihe mu kwama eyi mu na dimuka ci yaa roera, no ku cithzua mathsiwa o makando ko kupira ethsi na mwipithsa. 20 Thsine mwa ku wanapo yoihe mu cithzua pa ku mi furera eyi mu nepithsa? Uno honi ngeci mwaa cithzua mu makando, pa ku nyandithsiwera enu yoiwa eyi na mu kwama, apo honi po enu yoiwa pa meho a Nyambi.
21 Eyi yodiyo a mithserire Nyambi, inene Krisitu wa mi nyanderire, ku mi thsiera muro ci mu ende omu a endire. 22 “Ka a tendire thsivi, karo kwangera ka kwa waniwire mu kanwa kenthzi.” 23 Ou a tukathzaniwire ka a wa pirukire ku wa tuka, ou a nyandithsiwire ka a wa kanyine, unone wa pakire enu yoihe mu moko oyu na raturanga komu ku na roera. 24 Aye thsinda wa shimbire evi yetu mwirama yenthzi pa mbinda, ci nga tu fe ku thsivi no ku yoya kowawa. Ketwa yenthzi na mu porithsiwa. 25 Inene amwe kuma mwekarire eci mangu o ku yonga, uno honi pano na mu huka kwa Mudithsani no Mutangereri o myoyo thzenu.