Mansa Ala la saa Siyɔn
48
Kora la deŋɛnu la beete do le ka, beete min be bɔɔla kulɛ mayɛlɛreŋɛ la.
2 Alatala kolo, a bɛnta mɔ ni mɔ Marige Ala matɔgɔ
a la saa tɔ, a la kɔnkɔ saniyandeŋɛ kunma.
3 Ala la kɔnkɛ, a mayɛlɛren, a majabuta;
dunuya bɛ be sɛɛwala a la ko la.
Siyɔna kɔnkɛ be mayɛlɛren iko Safoni kɔnkɛ,
a be maren Mansa Banba la saa le la.
4 Ala be mɛnnila a la miliŋɛ ma,
a bata a yɛtɛ ma a kantalá la.
5 A fɛlɛ ba, dunuya mansanu bɛ wulita,
anu madɛnta Siyɔn kɛlɛ koe la.
6 Kɔnɔ anu to ka wo saa makantareŋɛ yen, anu kaabɛta,
anu yigitɛgɛta, anu borita.
7 Kilaŋɛ nun sɛrɛŋɛ ka anu bita ɲɔ,
iko muse tini wuli kanala;
8 iko fɔɲɔ banba to ka Tarisi kaanu la kulun banbanu makuntu.
9 Alatala dunuya bɛ da mansa ka koenu min ma a la saa tɔ,
mɔ bata a mɔɛ, mɔ bata a yen.
Mɔ Marige Ala si wo saa lasabati le kudai.
I sulen.
10 Ee Ala, mɔ be mɔ mirala i la fonisireya banba le ma
i la batu bon banba butɔ.
11 Ee Ala, i tɔgɛ be bɔɔren ki min na,
i be tantula ɲɔgɔnna le dunuya bɛ tɔ.
I be i la mansaya mala teleŋɛ tun de la.
12 Wo butɔ, Siyɔn mɔgɛnu bata sɛɛwa;
Juda saanu bata ɲagalin i la kiiti telendeŋɛnu la.
13 Wole Ala la mɔgɛnu,
wo Siyɔn namilin ka a tatta tunkenu kɔnti.
14 Wo ni a tatta nun a dula makantareŋɛnu lasaga koola,
alako wo ni wo ɲamakaran wo la deŋɛnu ye,
15 wo ko: «Ala min mu mɔ Marige Ala la abada,
wo si mɔ doni le han aligiyama.»