Mɔgɛ la mɔgɔ banbaya te a latanga faga ma
49
Kora la deŋɛnu la beete do le ka, beeti bɔɔlanu la kuntige ye.
2 Wole adamadeŋɛ bɛ ni kɛ lamɔɛ,
wole dunuya jama bɛ ni wo tolomasɔ.
3 Sɔdula lanma tige nun sɔdula banba tige,
fondobɔnɛ nun fondo tige, wo bɛ ni wo tolomasɔ.
4 N be hakkilimaya kumanu le fɔla wo ye,
mira min be n juse tɔ, wo bɛ be maren hakkili ɲinma le la.
5 N be n yili toren sandanu ma,
n si kuma luggɛreŋɛnu kɔtɔ ɲatabɔ kɔra kulɛ tɔ.
6 Bɔ, n be nala kilanna ɲagankata luŋɛ la fenna,
n jaguenu la ko koroŋɛ be n namilinna tɛmuɛ min tɔ?
7 Anu be laaren anu la bannaya le la,
anu be anu yɛtɛ matɔgɔla anu la harige banba sɔtɛ le la.
8 Kɔnɔ mɔgɔ yo te nɔ a mɔgɔɲɔgɛ kunkala,
mɔgɔ yo te nɔ a yɛtɛ kunka diila Ala ma.
9 Mɔgɛ nɛɛ kunka koe bɛlɛ,
i te nɔ a sɔŋɛ diila abada.
10 I la simaya si mɛ le ba kudai,
han i ni to i ma gabure sɔtɔ?
11 Adun, mɔ be a yenden yati, hakkilima si faga, hakkilibɔnɛ si faga,
iko mɔgɔ fufafue to si faga,
i ni bɔɔ yan, i ni i harige to mɔgɔ gbɛtɛ bolo.
12 I la gabure si ma i kiri boŋɛ la kudai;
i si to ɲɔ abada,
hali i ka dugu siyama tɔgɔ sa i yɛtɛ la.
13 Mɔgɛ la mɔgɔ banbaya te a latanga faga ma;
a la ko si dan iko sube.
14 Minnu be laaren anu yɛtɛ la, anu la kila le ka,
anu kulɛ di minnu ye, wonu tugun si anu jokki le faga la.
I sulen.
15 A be lagiriren anu ye anu ni faga iko saakanu;
saya ni ma anu la gbɛngbɛnná la.
Telenbaganu ni nɔɛ sɔtɔ anu kunma jonna.
Anu bale ni toli; aligiyama ni ma anu todula la.
16 Kɔnɔ Ala si n nɛ kunka;
saya tini be giripɛla n ma, a ni n jigan, a ni n nakisi.
I sulen.
17 Mɔgɛ tini ma banná la, ka a la fondo tigiya koloyata,
wo kana i kilan a la.
18 Bayi, a tini be fagala, a te fenfen doni a fɛ;
a la harige te nɔ a masɔla aligiyama.
19 Hali mɔgɛ be wasaren a la dunuya tatɛgɛ tɔ,
hali a ka tɔgɔ belebele sɔtɔ a la fondo sɔtɛ sabu la,
20 tekku le, fɔ a ni taga aligiyama, iko a benbanu tagata ki min na,
anu te dunuya yen bitugun.
21 Mɔgɛ la mɔgɔ banbaya kolo kiyoki, kɔnɔ ka a hakkili bele,
a la ko si dan iko sube.