Ruti
Kitabue le ka, min be annabi Dauda benbanu la ko fɔren
Elimelika la denbaya la tɔɔrɛ
1
Fɔlɔ nun, kiiti salanu donu be bani Isirayila kaanu kunma. Wonu wagate kɔnkɛ donta jamanɛ la. Awa, kaye do bɔɔta Betilɛmu saa lanma tɔ, Juda jamanɛ tɔ. Ale nun a la muse nun a la den kayiren fila, anu ni taga wagate do ma Mowaba duge tɔ. 2 Ale kaye tɔgɔ le Elimelika, a la muse tɔgɔ Nayomi, a la den kayiren fila tɔgɔ Mayilɔn anun Kiliyɔn. Anu mu Efarata kaanu le la, anu bɔɔta Betilɛmu saa tɔ, min be Juda duge tɔ. Anu la kereŋɛ Mowaba duge tɔ, anu tota ɲɔ. 3 Wo kɔma, Nayomi la kaye Elimelika nata faga; muse nun a la den fila tota ɲɔ. 4 Wo den fila nata Mowaba kaa musenu sigi. Musu dɔndɔ tɔgɔ Oropa, a filaɲɔgɛ tɔgɔ Ruti. Anu sabatita ɲɔ, fayida han san tan. 5 Mayilɔn nun Kiliyɔn tugun nata faga, Nayomi dɔrɔn tota: a bele a la kaye la, a bele a la den fila la.6 Awa, Nayomi ka a mɔɛ Mowaba duge tɔ, ka a fɔla Alatala bata hinnɛ a la jama la: a bata dɔmɛ dii anu ma. 7 Wo butɔ, a nun a la deŋɛnu la musenu bɔɔta anu be ka min na nun, Mowaba duge tɔ. Anu ka kila bita saagi koe la Juda jamanɛ tɔ. 8 Anu be kila tɔ, Nayomi ka a fɔ a la deŋɛnu la musenu ye, a ko: «Wo saagi wo nɛɛnɛnu bata. Ala mu kanunteya yitala wo la iko wo ka kanunteya yita mɔ la furenu nun nde la ki min na. 9 Ala mu kayi dugu ɲinma diila wo fila bɛ ma, wo si sabati ka min na jususa butɔ.» Nayomi ka anu sunbu, anu dita anu kulɛ mayɛlɛreŋɛ la, 10 anu ka a fɔ a ye: «Ade! Mɔ nun ile le be tagala i bata jamanɛ tɔ.» 11 Nayomi ka a fɔ, a ko: «N mamareŋɛnu, wo saagi. Fen de be a maren wo be diren n jokkila? Nde si nɔ den kayireŋɛ donu sɔtɔla bitugun ba, wo si sigi minnu ye? 12 N mamareŋɛnu, fɔ wo ni saagi wo bata. N bata mamakɔtɔya, n te nɔ kaye do sɔtɔla. Hali n ɲan ka kaye do sɔtɔ nun bi sue tɔ, ka a taranta n ka deŋɛnu sɔtɔ, 13 wo si nɔ wo deŋɛnu kɔnɔnna ba han anu ni koloya? Wo si nɔ balanna sigila kaye donu ye han n na deŋɛnu ni koloya ba? N mamareŋɛnu, wo te nɔ wo la. Koe min bata nde masɔtɔ, a bɛlɛ wo tɛŋɛ ko: Alatala bata n bita.» 14 Oropa nun Ruti mɛn ka anu kulɛ mayɛlɛ, anu ka dire tafɔlɔ. Oropa mɛn ka a bitan muse sunbu saara koe la, a tagata. Kɔnɔ Ruti kan kitita a la.
15 Wo butɔ, Nayomi ka a fɔ, a ko: «Ruti, a fɛlɛ i siina Oropa saagita a la mɔgɛnu bata, a bata saagi a la kuyenu ma; ile tugun ka a jokki.» 16 Kɔnɔ Ruti ka a fɔ, a ko: «I kana n karahan bɔɔ koe la i kɔma, i kana n nagbata saagi koe la i kɔma. I be tagala ka min na, nde tugun be tagala ɲɔ le. I kidula, nde tugun kidula le mu. I la mɔgɛnu mu n na mɔgɛnu le la. I la Ala mu n na Ala le la. 17 I be fagala ka min na, nde tugun fagadula le mu, n be mandila ɲɔ le. Ka n ka i boloka, Ala mu i hakkɛ bɔɔla n tɔ, fɔ ka faga le ka mɔ lafatan.» 18 Nayomi to ka a yen Ruti bata a nátá a ni a jokki, a ka kuma koe dan a ye. 19 Anu fila bɛ tagata han anu keta Betilɛmu.
Anu la kereŋɛ ɲɔ, a mata saa bɛ ye tɛrɛnna la anu yen koe la. Musenu tota a fɔla: «Ee, Nayomi ma ka ba?» 20 Nayomi ka a fɔ anu ye, a ko: «Wo kana n kele bitugun Nayomia. Kɔtɛ wo n kele Mara, bayi Ala sɛnbɛ tige bata n na dunuya takunte labɛlɛya n ma koola. 21 N bɔɔta le yan, n bolenu be faren nun. Alatala ka n tanati fenfen bele n bolo. Wo be n kelela fenna Nayomi? Alatala to bata a ɲamatelen n ma, Ala sɛnbɛ tige mɛn bata ɲagankata sigi n ma.»
22 Awa, Nayomi saagita a bata ɲɔgɔnna le ka bɔɔ Mowaba duge tɔ, anun Ruti, a la den kayireŋɛ la muse Mowaba kaa. Anu be kela wagate min tɔ Betilɛmu, wo ka a taran fondi tere tɛgɛ kunfɔlɛ bata ke.