Ruti 2

Ruti la taga sɛnɛ tɔ

Wo ka a taran, Nayomi la kaye Elimelika bareŋɛ do be ɲɔ, a mu kuntige le la, a mɛn mu banna le la. Elimelika bɔnsɛ le mu a la, a tɔgɔ Bɔsu.

2 Lun do, Ruti Mowaba kaa ka a fɔ Nayomi ye, a ko: «N boloka, n ni taga sɛnɛ tɔ, fondi tɛgɛlanu be tɔnsɛ minnu tola, n ni taga anu matɔnbɔn anu kɔma. N si mɔgɔ do sɔtɔ le min si hinnɛ n na.» Nayomi ko: «Awa n mamareŋɛ, taga.» 3 Ruti tagata sɛnɛ do tɔ fonde tɔnsɛnu matɔnbɔndula walilanu kɔma. Alatala to dita a kɔla, a ka a kun sɔ Bɔsu la sɛnɛ le ye, Elimelika wo bareŋɛ.

4 A ma mɛ, Bɔsu nata bɔɔla Betilɛmu. A ka walilanu kɔntɔn, a ko: «Wo nuwali, Ala mu wo dɛmanna.» Walilanu ka a labita, anu ko: «Ala mu ile tugun barajila.» 5 Bɔsu ka fondi tɛgɛlanu la kuŋɛ maɲininka, a ko: «Ɲɔmɔ le la muse mu wo sunkutuŋɛ la?» 6 Fondi tɛgɛlanu la kuŋɛ ka a jaabi, a ko: «Wo sunkutuŋɛ Mowaba kaa le mu, min nun Nayomi nata kabɔɔ Mowaba. 7 A ka mamayande ma, a ko aa fondi tɔnsɛnu minnu be toren fondi kitenu tɛma, a be diren wo donu matɔnbɔnna fondi tɛgɛlanu kɔma. Bɔɔla a nata saguma a butinta, han kɔtɛ a be walila fɔ a to be a sulenna ka bage tɔ.» 8 Wo kɔma, Bɔsu ka a fɔ Ruti ye, a ko: «N na, i tolomasɔ a ɲinma la, fɔ i ni to yan n na walila musenu kɔma, hali i ma taga fonde tɔnsɛnu matɔnbɔn sɛnɛ gbɛtɛ tɔ bitugun. 9 I ɲa lataga sɛnɛ ma, kayenu be min tɛgɛren; i ni musenu jokki. N bata n na walilanu yamɔri anu kana ko ma i la. Ka ji sɔgɛ bata i bita, i si taga je min dunbe tɔ, walilanu ka min sori nun.» 10 Wo kɔma, Ruti kimisirinta, a ka a kunsin duge ma; a ka a fɔ Bɔsu ye, a ko: «Nde bele lɔnden, i hinnɛta n na ko la kama le han i ka n lɔn? Adun nde mu luntaŋɛ le la.» 11 Bɔsu ka a jaabi, a ko: «I la kaye la fagareŋɛ i ka min bɛ ma i bitan muse ye, anu ka a bɛ ɲamakaran n ɲɛ. I ka i baaba nun i nɛɛnɛ anun i sɔtɔ duge aɲɛ ki min na, ka sɔ jama do kɔma i ma min fɔlɛ lɔn nun, anu ka wo bɛ ɲamakaran n ɲɛ. 12 Alatala mu i sɔŋɛ diila i la ko ɲinma la, i bata min ma wo sabue la. Alatala mu i sɔŋɛ lakamalila. Bani Isirayila kaanu be Ala min batula, i bata na i yɛtɛ taaku ale Ala la, a ni i kanta.» 13 Ruti ka a fɔ Bɔsu ye, a ko: «N tige, i bata hinnɛ n na. I bata n juse sa, nde i la jon muse, i bata n madiya i la kuma la. Adun nde bele toren iko i la walilá muse do.»

14 Awa, dɔmɔri ma tɛmuɛ la kereŋɛ, Bɔsu nata a fɔ Ruti ye, a ko: «I madon, i la dɛgɛ kunte lajigi lanmɛ tɔ i ni a dɔmɔ.» Ruti sigita fondi tɛgɛlanu kɛnna. Bɔsu ka fondo kolo yilandeŋɛ don a bolo; a ka a dɔmɔ han a fata, a ka a tɔɛ mandi. 15 Wo kɔma, Ruti nata wuli ka tataga mamatɔnbɔŋɛ ma. Bɔsu ka a la walilanu yamɔri, a ko: «Hali fondi kitenu tɛma wo ni a to, a ni mamatɔnbɔŋɛ ma, hali wo ma a dɔgɔya. 16 Wo si tɔnsɛnu donu yati laboe fondi kitenu tɛma, alako a ni anu matɔnbɔn. Wo kana a lamalu feu!» 17 Ruti tota mamatɔnbɔŋɛ mala Bɔsu la sɛnɛ tɔ han wura la. A ka min matɔnbɔn, a ka a botege. Fayida a ka kilo mugan nun fila sɔtɔ fonde la. 18 A ka a jigan, a nata don saa tɔ. A ka min matɔnbɔn a ka a yita a bitan muse Nayomi la. A ka a la dɔmɔ tɔɛ labɔɔ, a ka wo tugun dii Nayomi ma. 19 Wo butɔ, a bitan muse Nayomi ka a maɲininka, a ko: «I ka mamatɔnbɔŋɛ ma mina le bi? I walita mina le? Min ka i lɔn, Ala mu a barajila.» Awa Ruti walita ka min na, a ka wo ɲamakaran a bitan muse Nayomi ye, a ko: «N walita kaye do le la sɛnɛ tɔ, min tɔgɔ Bɔsu.» 20 Nayomi ka a fɔ a bitan muse Ruti ye, a ko: «Alatala mu a barajila, Alatala min be kanunteya yitaren mɔgɛnu la minnu be baluren anun minnu fagata. Kɛ kaye mu mɔ baren masutuŋɛ le la, mɔ la denbaya mandilá do le mu a la.» 21 Ruti Mowaba kaa ka a fɔ, a ko: «Wo kaye mɛn ka a fɔ n ɲɛ, aa n ni to a la walilanu kɔma han a la sɛnɛtɔfeŋɛ bɛ ni ban tɛgɛla.» 22 Nayomi ko a la deŋɛ la muse Ruti ma: «N mamareŋɛ, ka i be tola tagala ale la walilá musenu kɔma, wolo kaɲin, bayi ka i tagata sɛnɛ do tɔ, tumado mɔgɔ do si ko koroŋɛ ma i la.»

23 Awa, Ruti tota Bɔsu la walila musenu fɛ mamatɔnbɔŋɛ la han fondi tere banta tɛgɛla, anun sɛnɛtɔfeŋɛ do. Wo bɛ butɔ, Ruti sabatita Nayomi bata.