Ruti 3

Ruti ki koe lɔŋɛ tɔ

Lun do, Nayomi ka a fɔ a la den kayireŋɛ la muse ye, a ko: «N mamareŋɛ, n be diren ɲinire mala i ye, alako i ni sabatidula sɔtɔ, i ni to hɛra tɔ. 2 I ka a lɔn, i tota walila Bɔsu min bata i nun a la walilá musenu, mɔ bareŋɛ le mu a la. Awa bi wura la ale Bɔsu si taga le fondi mafedula a la lɔŋɛ tɔ. 3 Wo butɔ, taga i ko, i ni i sunsan, i ni kuta majabureŋɛnu sa i ma, i ni jigi lɔŋɛ tɔ. Kɔnɔ i kana i yɛtɛ labɔɔ a ma, han a ni dɔmɔre nun ji miŋɛ ban. 4 Ka a be tagala sadula, a be sala ka min na, i ni ɲɔ manditɛ. Wo tɛmuɛ, i si taga a la butin kuta donden bɔɔ a kɛŋɛnu ma, i ni sa a kɛn sa dula. Ale yɛtɛ si ko do fɔ i ye, i si naa min ma.» 5 Ruti ka a jaabi, a ko: «I ka min bɛ fɔ n ɲɛ, n si a bɛ ma.»

6 A tagata han a keta lɔŋɛ tɔ; a bitan muse ka a yamɔri ki min na, a ka a bɛ ma ɲɔgɔnna le. 7 Bɔsu ka dɔmɔre ma, a ka je min, a juse sɛɛwata. A tagata sa a la fondi joore kɛnna. Ruti nata dɔyi dɔyi, a ka butin kuta bɔɔ a kɛŋɛnu ma, a sata a kɛn sadula. 8 Sue la kereŋɛ tɛma, ale kaye kunɛnta, a marakunta. A ka a firifiri, a ka muse yen saren a kɛn sadula! 9 A ka a fɔ, a ko: «Ile ɲɔmɔ le?» A ka a jaabi, a ko: «Nde le mu, Ruti, i la walilá. N be naren de, ka i si nɔ n na fute kitila, bayi ile le mu denbaya mandilá la.» 10 Bɔsu ka a fɔ, a ko: «N na, Alatala mu i barajila. I la kɛ kanunteya kaɲin a fɔlɔnɛŋɛ ko, bayi i ma kamaren fondo tigenu jokki, ka wo ma a fondobɔnɛnu. 11 N na, i kana hanmɛ kɔtɛ. I be min bɛ maɲininkaren, n si a bɛ ma i ye, bayi jama bɛ ka a lɔn musu ɲinma le mu i la. 12 Iyon tɔɲa le, denbaya mandilá do le mu n na, kɔnɔ denbaya mandilá do tugun be ɲɔ, min na barenya sutu nde tɛŋɛ ko. 13 I ni ki yan kɛ sue. Sinan saguma, ka denbaya mandilá doe sɔnta i mandila, awa. Ka a ma sɔn, wo tɛmuɛ nde si i mandi. N bata wo lahire jigan i ye Alatala ɲala. To yan, i ni sa han saguma.» 14 Awa, Ruti sata a kɛn sadula han ɲɔ lakɛnɛ banba.

A nata wuli jonna yannun mɔgɛnu be ɲɔgɔn talɔnna, bayi Bɔsu bele diren mɔgɔ ni a lɔn ka a fɔla Ruti nata le nun lɔŋɛ tɔ. 15 Bɔsu ka a fɔ Ruti ye, a ko: «I la kuta kunmanɛŋɛ lafonti i ni a bita a ɲinma la.» Ruti ka a bita a ɲinma la. Bɔsu ka kilo mugan fonde suman, a ka a sa Ruti la kuta tɔ, a ka a sigi a kunma. Wo kɔma, Bɔsu donta saa tɔ. 16 Ruti kan tagata, a keta a bitan muse Nayomi bata. Nayomi ka a fɔ a ye, a ko: «N mamareŋɛ, a mata kama le?» Awa, Bɔsu ka min ma Ruti ye, Ruti ka a bɛ ɲamakaran Nayomi ye. 17 A mɛn ka a fɔ, a ko: «A ka kɛ kilo mugaŋɛ fonde le dii n ma. A ko n ma, aa n te nɔ saagila n bitan muse ma fenfen bele n bolo.» 18 Nayomi ka a fɔ, a ko: «N mamareŋɛ, fɔ i ni to yan han i ni a lɔn kɛ koe be banna ki min na. Bayi, kɛ kaye te lakara fanni kɛ koe ma bɔɔ a la bi.»