Taureta Musa
Kitabu sabaɲɔgɛ
Lewi bɔnsɛnu la sariya
Sarika bintannɛŋɛ
1
Alatala ka Musa kele a la hɔrɔma dingira tɔ, a ko:
2 «A fɔ bani Isirayila kaanu ye, i ko, ka min be diren sarika bɔɔla nde Alatala ye, fɔ wo tigi ni saaka, baa ka wo ma ninge le bɔɔ.
3 Ka a taranta a be kolofen banba le bɔɔla sarika bintannɛŋɛ la, wo butɔ fɔ a ni ma ningi tuura le la lanjuru yo bele min na. A ni wo nati Alatala la hɔrɔma dingira dondula tɔ, alako nde Alatala ni a jigan.
4 Sarika bɔɔlá ni a bole sa kolofeŋɛ kun tɛma, alako nde Alatala ni wo sarika jigan, a ni ma a kunsara la a la junube la ko la.
5 Wo tuura ni faga nde Alatala ɲala. Harona la deŋɛ sarika lakelanu, anu ni wo tuura base nati, anu ni a wussɛ sarika bintandula sɔngɔnu ma, min be Ala la hɔrɔma dingira dondula tɔ.
6 Sarika bɔɔlá ni wo tuura boso a ni a makuntu.
7 Harona la den sarika lakelanu ni lɔgɛ sa sarika bintandula kunma, ka ta labita.
8 Anu mɛn ni subu kuntenu, anun a kuŋɛ nun a dula kɛndeŋɛnu sa ta tɔ sarika bintandula kunma.
9 Kɔnɔ a tetekenu nun a kɛŋɛnu kan, wonu ni lako je la. Jɔnɔn sarika lakelá ni wo bɛ bintan sarika bintandula kunma. Wonu bɛ mu sarika bintannɛŋɛ le la min kuɲɛ di nde Alatala ye.
10 Ka a taranta a be kolofen lanma le bɔɔla sarika bintannɛŋɛ la, wo butɔ fɔ a ni ma saaka kontoŋɛ le la, ka wo ma sikule lanjuru yo bele min na.
11 Sarika bɔɔlá ni wo kannatɛgɛ sarika bintandula kɛnna tele yɛlɛ bolo mara mafanna, nde Alatala ɲala. Harona la den sarika lakelanu, anu ni a base jigan, ka a wussɛ sarika bintandula sɔngɔnu ma.
12 Sarika bɔɔlá ni a makuntu. Sarika lakelá kan, a ni a sube, nun a kuŋɛ, nun a dula kɛndeŋɛ sa lɔgɛnu kunma ta tɔ sarika bintandula kunma.
13 Kɔnɔ a tetekenu nun a kɛŋɛnu kan, sarika lakelá ni wonu lako je la. Jɔnɔn a ni wo bɛ madɛn sarika bintandula kunma, a ni a bintan. Wonu bɛ mu sarika bintannɛŋɛ le la min kuɲɛ di nde Alatala ye.
14 Ka a taranta a be kondeŋɛ le bɔɔla sarika bintannɛŋɛ la nde Alatala ye, wo butɔ fɔ a ni ma legetere ka wo ma gabue la.
15 Sarika lakelá ni a nati sarika bintandula tɔ, a ni a kannatɛgɛ ka a kuŋɛ sa ta tɔ a ni bintan. A mɛn ni kondeŋɛ madigin ka a base sa sarika bintandula sɔngɔ ma.
16 A ni a jɔkɔlɛ nun a butɔ feŋɛ bɔɔ, a ni wo lafili tele yɛlɛ tɔ, ta buguta be madɛnna ka min na, sarika bintan feŋɛ kɛnna.
17 Wo kɔma, a ni konden tɔɛ fara, hali a ma a gabataŋɛnu lafatan ɲɔgɔn na, a ni a bintan ta la, a ni ma sarika bintannɛŋɛ la min kuɲɛ di nde Alatala ye.»