Sugu kole tugureŋɛ sarika la ko
2
«Ka mɔgɛ be diren sarika bɔɔla nde Alatala ye min be maren sugu kole tugureŋɛ la, a ni bunten a ɲinma la. A ni tule sa a kunma a ni sorayi tugun sa tule kunma.
2 A ni a don Harona la deŋɛnu sarika lakelanu bolo. Sarika lakelá do ni sugu kolo munge bolo ɲa dɔndɔ kɔɔ, tule be saren min kunma, a nun sorayi, a ni wo bɛ sa ta tɔ, a ni bintan nde Alatala ye. Wo bolo ɲa dɔndɔ kɔɔreŋɛ ni ma tɔnkuma la wo sarika bɛ la ko tɔ. Sarika le mu min kuɲɛ di nde Alatala ye.
3 Sugu kolo munge tɔɛ min be tola, wo be mala Harona bɔnsɛ sarika lakelanu le tɛŋɛ la. A saniyanden han a tanbita a tɔ, bayi sarika min be bɔɔren bintanna nun nde Alatala ye, wo tɔɛ le mu.
4 Ka i be diren fondo bintannɛŋɛ bɔɔla sarika la nde Alatala ye, i ni wo ɲiɲa sugu kolo munge ɲinma le la lɛbini bele min tɔ. A ni lamulan tule tugun na. Dɛgɛ lɛbini bɔnɛ mɛsɛmanu tugun si nɔ le ɲiɲala, tule be madonden anu ma.
5 Ka a taranta i be dɛgɛ yilandeŋɛ le bɔɔla sarika la, i ni sugu kolo munge lamulan tule fɛ, kɔnɔ lɛbini yo kana sa a tɔ.
6 A tini ban yilanna, i ni a makuntu, tule mɛn ni sa a tɔ, a ni ma sarika la.
7 Ka a taranta i be dɛgɛ bintandeŋɛ le bɔɔla sarika la min be ɲiɲaren daga butɔ, i be sugu kolo munge lamulanna tule fɛ.
8 Awa, i bɛnta wo sugu kole sarika mɔɔle donila nde Alatala ye. A tini don sarika lakelá bolo, a ni a doni sarika bintandula.
9 Sarika lakelá ni do jigan min si ma tɔnkuma la wo sarika bɛ la ko tɔ, a ni wo bintan sarika bintandula kunma, a ni ma sarika la, min kuɲɛ di nde Alatala ye.
10 Sarika tɔɛ min be toren, wo be mala Harona bɔnsɛ sarika lakelanu le tɛŋɛ la. A saniyanden han a tanbita a tɔ, bayi sarika bintandeŋɛ min be bɔɔren nde Alatala ye, a tɔɛ le mu.
11 Awa, sugu kolo sarika min bɛ be bɔɔla nde Alatala ye, lɛbini yo kana to a tɔ. A ma bɛn wo ni sarika bintannɛŋɛ yo bɔɔ nde Alatala ye lɛbinɛ be min tɔ, ka wo ma kumɛ.
12 Wo si nɔ le lɛbinɛ nun kumɛ sala suge wolo fɔlɛnu kunma minnu be bɔɔla sarika la nde Alatala ye, kɔnɔ anu kana bintan sarika bintandula kunma de, bayi wo ma di n ɲɛ.
13 Kɔnɔ kɔɔkɛ kan ni sa wo la sugu kolo sarika bɛ tɔ, bayi wo bata ma lahire tɔnkuma la wole nun wo Marige Ala tɛma. Kɔɔkɛ ni sa wo la sugu kolo sarika bɛ ma.
14 Ka a taranta wo be sarika bɔɔla nde Alatala ye wo la sugu wolo fɔlɛ la, wo ni tɔnsɔ kole nama yilan,
15 wo ni tule nun sorayi sa a kunma, a ni ma sugu wole sarika la.
16 Sarika lakelá ni do jigan wo sugu wolo fɔlɛ nun tule ɲaama, a mɛn ni sorayi bɛ jigan, wo bɛ labɛndeŋɛ ni ma tɔnkuma koe la sarika bɛ la ko tɔ. A ni wo bintan sarika bintandula kunma. A ni ma sarika la, min kuɲɛ di nde Alatala ye.»