Bɔsu la ma koe denbaya mandilá la
4
Wo ka a taran, Bɔsu bata taga mamadɛndula saa dondula tɔ, a sigita ɲɔ. Bɔsu ka baren masutuŋɛ min na ko fɔ nun, Ala ka a ma wo tugun be tanbila. Awa, Bɔsu ka a fɔ a ye, a ko: «Ile, i madon i ni i majigi yan!» A ka a madon, a sigita. 2 Wo kɔma, Bɔsu ka saa kuntigi mɔgɔ tan kele. A ka a fɔ anu ye, a ko: «Wo majigi yan.» Anu ka anu majigi. 3 Bɔsu ka a fɔ wo baren masutuŋɛ ye, a ko: «Nayomi min bɔɔta Mowaba duge tɔ, a bata wuli mɔ bareŋɛ Elimelika la duge mayitala. 4 N be a hanigeren n ni i lalɔn, n ni a fɔ i ye, i ni kɛ duge san kuntigenu ɲala anun jama min be naren. Ka i si nɔ kɛ duge mandila, i ni a mandi. Ka i te nɔ a mandila, i ni a fɔ n ɲɛ, alako n ni a lɔn. Bayi mɔgɔ do te nɔ a mandila fɔ i ni i kulɛ dii a ma. Ka ile ma, fɔ nde le ni a mandi.» Ale kaye ka a fɔ, a ko: «Nde si a mandi.» 5 Bɔsu mɛn ka a fɔ: «I tini be kɛ duge sanna lun min na Nayomi ma, fɔ i ni Ruti Mowaba kaa tugun jigan muse la, alako fure tɔgɛ ni fɔ a la duge kunma.» 6 Ale baren masutuŋɛ ko: «N te nɔ a mandila, bayi tumado n si n na kɛɛ tiɲa le. Ile ka a mandi i yɛtɛ ye, nde te nɔ.» 7 Wo wagate Isirayila duge tɔ, ka mɔgɛ be diren fondo sanna ka wo ma a ni a mafalin, fɔ dɔndɔ ni a la samata bɔɔ a ni a don doe bolo. Wolo si ma seedeɲɔgɔya la ka a fɔla bɛŋɛ bata lakoti. 8 Awa, ale kaye min mu baren masutuŋɛ la, a ko Bɔsu ma: «I ni wo duge san i tɛŋɛ.» Wo kɔma, a ka a la samata bɔɔ, a ka a don Bɔsu bolo. 9 Wo butɔ, Bɔsu ko kuntigenu nun jama ma: «Wo bata ma seede la bi. Min bɛ mu Elimelika, anun Kiliyɔn, anun Mayilɔn tɛŋɛ la, n bata a bɛ san Nayomi ma. 10 Mayilɔn na muse, Ruti Mowaba kaa, n bata wo tugun futu, a ni ma n na muse la, alako fure tɔgɛ ni fɔ a la duge kunma. Wolo si a ma, a kabila nun a la jama te ɲina fure la ko la. Wo bata ma seede la bi.» 11 Jama bɛ nun kuntigenu minnu be kɛ mamadɛndula tɔ, anu ka a fɔ, anu ko: «Mɔ bata ma seede la! Kɛ muse min be donna i bata, mɔ bata Alatala matáran a ye, a ni a to iko annabi Yaguba la musu fila, Rakeli nun Leya, minnu bata deŋɛnu sɔtɔ, anu mata bani Isirayila jama la. Alatala ni sɛnbɛ dii i ma Efarata kabila tɔ. A ni tɔgɔ banba dii i ma Betilɛmu saa butɔ. 12 Ala mu deŋɛ siyama diila i ma kɛ sunkutuŋɛ la ko sabu la. Ala mu wo la deŋɛnu mala denbaya tige la, iko wo benba Perɛsi la denbaya, Tamari ka Perɛsi min sɔtɔ Juda ye!»Dauda benba Obedo la sɔtɛ
13 Bɔsu ka Ruti jigan ɲɔgɔnna le, a mata a la muse la, anu kafuta. Alatala ka a ma Ruti ka bue jigan, a ka den kayireŋɛ sɔtɔ. 14 Musenu ka a fɔ Nayomi ye, anu ko: «Alatala tantu, bayi a ma i to den taɲa tɔ min si i mandi. A tɔgɛ ni fɔ bani Isirayila jama tɛma. 15 A si i juse sa, a mɛn ni i dankun i la mamakɔtɔya butɔ. I la den kayireŋɛ la musu Ruti fisa i ye den kayiren mɔgɔ wɔrɔwila ko, bayi a ka i kanu. Ale le bata kɛ mamareŋɛ sɔtɔ i ye.» 16 Nayomi ka bɔɔbɛ jigan, a ka a sa a jusukuŋɛ ma. A bata ma a mɛnnilá la. 17 Muse sigiɲɔgɛnu ka kɛ bɔɔbɛ tɔgɛ lawasa, anu ko: «Nayomi bata den kayireŋɛ sɔtɔ! A tɔgɔ Obedo.» Awa, Obedo la deŋɛ le mu Jese la. Jese la deŋɛ le mu Dauda la. 18 Awa, Perɛsi juruya le ka: Perɛsi ka Heturɔn sɔtɔ. 19 Heturɔn ka Ramu sɔtɔ. Ramu ka Aminadabi sɔtɔ. 20 Aminadabi ka Naasɔn sɔtɔ. Naasɔn ka Salimu sɔtɔ. 21 Salimu ka Bɔsu sɔtɔ. Bɔsu ka Obedo sɔtɔ. 22 Obedo ka Jese sɔtɔ. Jese ka Dauda sɔtɔ.