Yunusa
Kitabue le ka, min be annabi Yunusa la ko tarigu fɔren
Yunusa la Ala sɔsɔre
1
Lun do, Alatala kumata Amitayi la den kayireŋɛ Yunusa ye, 2 a ko: «Wuli, i ni taga Niniwu saa banba tɔ. I ni yamɔre lake ɲɔ kaanu ma i kulɛ mayɛlɛreŋɛ la, i ko: wo la ko koroŋɛ bata yɛlɛ han a bata ke nde Alatala ma.» 3 Yunusa wulita, kɔnɔ a borita tagala Taarisi saa tɔ, ka yanfaya Alatala la. A jigita Jafa bakki dala. A ka kulun banba taran ɲɔ min be tagala Taarisi, a ka a la taga sɔŋɛ dii. A nun mɔgɛnu bakkita tagala Taarisi, ka yanfaya Alatala la.4 Wo kɔma, Alatala ka fɔɲɔ bɛlɛŋɛ labɔɔ ba tɔ. Ba koronyata han kuluŋɛ dita farala. 5 Mataloŋɛnu kilanta; a bɛ be belebelela a la kuye la. Miraŋɛnu minnu be kuluŋɛ butɔ, anu ka wonu lafili je tɔ, alako kuluŋɛ ni fɛɛya. Wo ka a taran, Yunusa jigita nun kuluŋɛ bɔtinɛ tɔ, a sata ka kinnɔgɔ a ɲinma la. 6 Kuluŋɛ kunmafɔlá ka a madon a la, a ka a fɔ a ye, a ko: «I be kinnɔgɔla fenna? Ile wuli! I be Ala min batula i ni belebele a tɔgɛ la, i ni a mataran. Tumado wo Ala si naa a mira wo mɔ la ko la, wo mɔ te faga.» 7 Wo kɔma, mataloŋɛnu be a fɔla ɲɔgɔn ye: «Wo mɔ ni ma ka taga fɛrile ma, alako wo mɔ ni a lɔn min be kɛ tɔɔrɛ sigiren mɔ ma.» Anu ka fɛrile ma; fɛrili ma ka Yunusa yen. 8 Wo kɔma, anu ka a fɔ Yunusa ye, anu ko: «A ɲamakaran mɔ ye fen min be kɛ ko koroŋɛ sigiren wo mɔ ma. I la wale mu fen na? I be bɔɔren mina le? I la jamanɛ mu mina la? I mu bɔnsɔ miniman na?» 9 A ko anu ma: «N bɔnsɛ mu Hebure le la. Marigi Alatala min be saŋɛ tɔ, min ka ba nun duge da, n be wolo batula.» 10 Yunusa ka a fɔ anu ye, a be boriren de ka yanfaya Alatala la. Bɔɔla mataloŋɛnu ka wo kuma mɔɛ, anu kilanta koola. Anu ka a maɲininka, anu ko: «I ka wo ma fenna? 11 Mɔ si nɔ fen mala i la, alako ba ni lakara mɔ la?» Bayi ba la koronya be sala ɲɔgɔn kunma tun. 12 A ka a fɔ anu ye, a ko: «Wo n jigan wo ni n nafili ba tɔ. Wo kɔma ba si naa lakara wo la, bayi n bata a lɔn, nde le la ko be a maren ba be koronyaren wo la.» 13 Kɔnɔ wo tɛmuɛ ma, mataloŋɛnu be laala bɔɔla alako ka yɛlɛ kɛnɛ tɔ, kɔnɔ anu bele kela, bayi ba mɛn be tagala koronyala anu la ɲɔgɔn kunma tun. 14 Wo butɔ, anu ka Alatala mataran anu kulɛ mayɛlɛreŋɛ la, anu ko: «Ee Alatala, mɔ bata i taran, yandi, i kana a to mɔ ni faga kɛ kaye la ko la. I kana mɔ ma mɔgɔ do faga sabu la min ma ko koroŋɛ ma mɔ la. Bayi ile Alatala, a diyata i ye ki min na, i ka a ma ɲɔgɔnna le.» 15 Wo butɔ, anu ka Yunusa jigan ka a lafili je tɔ. Ba la koronya lasɔta kisanna. 16 Wo kɔma, mataloŋɛnu kilanta Alatala la sɛnbɛ la, anu ka sarika bɔɔ a ye, anu ka lahirenu dii a ma kalire la.