Ala le mu fisamante mansa la
47
Kora la deŋɛnu la beete do le ka, beeti bɔɔlanu la kuntige ye.
2 Ee, seenu bɛ, wo bole botege!
Wo ni belebele koola wo ni wo kulɛ mayɛlɛ ɲagaliŋɛ la Ala ye.
3 Bayi Alatala le mayɛlɛta, a makilanta.
Ale le mu dunuya bɛ mansa banba la.
4 A ka seenu don mɔ bolo,
mɔ sagoe ni to jamanɛnu kunma.
5 A ka duge masubɛ a ni to mɔ bolo ka bɔɔ yuruya han yuruya,
wo be maren kun mayɛlɛ la Yaguba bɔnsɛ ye. A ka mɔ kanu.
I sulen.
6 Alatala be yɛlɛla a ni sigi a la tintiŋɛ tɔ,
ɲagalin kulɛ nun bina fe kulɛ be bɔɔla a la biliya la.
7 Wo Ala tantu, wo a tantu beeti bɔɛ la!
Wo tantu beete bɔɔ mɔ la mansa ye, wo a bɔɔ han!
8 Ala le mu dunuya bɛ mansa la,
wo ni a tantu beete bɔɔ a ɲinma la!
9 Ala bata a majigi a la mansa tintin saniyandeŋɛ tɔ;
ale le be mansaya mala seenu kunma.
10 Jamanɛ kuntigenu be anu bolo diila ɲɔgɔn ma,
anu ni ma Iburahima la Ala la mɔgɛnu la.
Bayi Ala kan ye, mansanu le be dunuya kantala.
Ala le be a bɛ kunma.