Su 'Bpamamandu sa dikena Pakatidtu
2
Ugaid'a aden bun manga 'bpenabi-nabi a namembuat paganay lu kanu manga taw a Israil. Na maitu bun ba i manggula san sa lekanu, embubuat bun san sa lekanu su 'bpamamandu sa di pakatidtu enggu ibpamandu nilan su entu sa di 'gkasipatan a pakabinasa kanu salig'u apia entain a munut kanilan. Na pakakias'ilan su Mapulu a tinemebus kanilan. Ugaid'a sabap sa entu na mangagan makatingguma kanilan su kabinasan. 2 Na madakel bun i pakapaunut'ilan kanu ukit a uyag-uyag'ilan a kamustakilan. Na sabap sa kanilan na 'gkapanila-tilan su panduan pantag kanu Isa al-Masih. 3 Na sabap man kanu di nilan kasukul na 'gkadsalimbut kanu nilan sa ukit a kapia na kabpamandu nilan asal'a kapantialian kanu nilan. Na nauget den man naadil su kasiksan nilan enggu natatalanged a manggula su entu a kabinasan nilan.4 Ka apia man su manga malaikat na dala lasama nu Kadenan kanu kinandusa nilan ka inidtug'in silan lu kanu kalut a nangilem-kilem i kalibuteng'in a lu sa naraka a sinangkalian taman kanu gay a kakukum'in kanilan. 5 Dala bun lasama nu Kadenan su manga taw kanu paganay sabap kanu kapembaladusa nilan ka inimatayan nin silan sa ukit a kinapadsanaw nin kanu dunia. Nia nin bu inilipuas na su Nabi Nuh a nangusiat pantag kanu kapaguyag-uyag sa matidtu enggu su pitu kataw a tagapeda nin.a 6 Siniksa bun nu Kadenan su siudad a Sudum enggu Gumura sa ukit a kinagepul'in lun asal'a makapailay nin u ngin i manggula nu taw a pedsungkang sa lekanin. 7 Na nia bu inilipuas lu nu Kadenan na su matidtu a taw a si Lut a sangat a nabulibug i ginawa nin kanu kamustakilan a kabpaguyag-uyag'u manga taw kanu entu a timpu.b 8 Ka gagalu nu kapegkaleben nin lu na uman-uman gay na sangat a papegkapasang kanu ginawa nin su kapegkailay nin enggu kapegkakineg'in kanu kamustakilan a galebek'u manga taw lu. 9 Na 'gkailay lu ba i su Kadenan a Mapulu na katawan nin u panun i kapalipuas'in kanu manga taw a matidtu sia kanu apia ngin a bataluan enggu katawan nin bun u panun i kasiksa nin kanu manga taw a pedsungkang sa lekanin sia kanu gay a kakukum'in kanilan, 10 labi lawan den su manga taw a nia nilan 'bpagunutan na su pakagiabu a kiug'u ginawa nilan enggu dikena nilan ibpamamantag su apia entain a pegkamal kanilan.
Mangasandag silan enggu mangategas i ulu nilan ka apia su manga barakat a inaden kanu kawang-kawangan na dala gilek'ilan lun sa kapedtalu-talu nilan lun sa sakutu. 11 Inunta na apia su manga malaikat a labi a masela enggu mabagel i 'gkagaga nin na dikena silan pedtalu-talu sa sakutu kanu entu sia kanu adapan nu Kadenan a Mapulu. 12 Ugaid'a su 'bpamamandu sa di pakatidtu na pedtalu-talu silan sa sakutu kanu apia dala sabut'ilan lun. Nia nilan kalagidan na binatang a dala itungan nin a nia nin bu 'bpagunutan na u ngin i sia kanu ginawa nin. Pinamipis bu silan ka enggu masumbali. Na binasan man silan a mana kanu manga binatang a entu 13 kagina u ngin man i pinggula nilan a mawag kanu ped'ilan na entu bun ba i embalingan kanilan. Na sia kanilan na pakagalaw den a benal i kanggula nilan sa kamustakilan a kiug'a ginawa sa apia kanu 'gkatitimpuan na malamag. Na mana silan budseng a pakabudseng sa lekanu. Masela a benal a kayayan silan sa lekanu ka mapia gaid i kabpagigiamung'ilan 'bpamegkan sa lekanu ugaid'a su kapenggula nilan sa kamustakilan a galebek na papedtalusen nilan bun. 14 Na su manga mata nilan na napenu na katakiuga. Da den pinda na kapembaladusa nilan taman sa 'gkaakat'ilan su manga malubay pamun i salig'in sa kapenggula sa entu. Binibit'ilan i ginawa nilan sa di kasukul. Na sabap sa entu na tiuban silan nu Kadenan! 15 Na tinagak'ilan su matidtu a lalan taman sa nakasibay den silan ka nia nilan inunutan na su pinggula ni Balaam a wata ni Biur a malilini sa kakua nin sa pantiali sa dikena mapia a ukit. 16 Ugaid'a nadaway sekanin kanu dikena a entu mapia a galebek'in. Ka su kimar a dikena pakadtalu na nakadtalu sa mana bun suala nu taw ka sinapalan nin su entu a nabi kanu kababalan a galebek'in.c
17 Na su 'bpamamandu a entu sa dikena pakatidtu na mana silan bualan a da den pedtuga lun a ig enggu mana silan gabun a pakasedseg bu na mabagel a sambel. Na inidtatalama den man kanilan nu Kadenan su kalut a nangilem-kilem a kaidtugan kanilan. 18 Ka 'bpemamasela man gaid silan ugaid'a dala katagan nin i kangadtalu nilan. Ibpamamandu nilan i dikena mawag i kaunut kanu kamustakilan a kiug'u ginawa. 'Gkaakat'ilan kanu entu a galebek'ilan su manga taw a bagu pamun i kinataligkud'ilan kanu uyag-uyag'ilan a pakasibay. 19 Ipebpasad'ilan kanu manga taw su kambaya-baya inunta na silan mismu na ulipen nu dikena mapia a galebekan a pakabinasa kanilan. Kagina su taw na ulipen nu apia ngin a pakakumpen kanu ginawa nin. 20 Na amaika su taw a tinemaligkud den kanu kamustakilan a galebek'in sia sa dunia sia nakanggulalan kanu kinatuntay nin pantag kanu Mapulu tanu a su Isa al-Masih a 'bpamelipuas ka mimbalingan menem su kamustakilan a entu a galebek'in taman sa naulipen sekanin nu entu, na labi i kapasang'u katamanan nin kumin kanu danden a natamanan nin. 21 Nia pan tinemu i dala nin den matun su lalan a kapaguyag-uyag sa matidtu kumin sa natun nin ugaid'a nia mauli lun na tinaligkudan nin bun su manga suti a kasuguan nu Kadenan a nakapamandu lun. 22 Na natuman sa lekanin su palibasan a
“Su asu na ken nin 'bpaluman su uta nin,”d
enggu,
“Su taw sa lupa na apia ngin i kapaigu lun na edtuna bun embalingan.”