Ika-isa a Sulat'i Pitru
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Nia ba su Ika-isa a Sulat'i Pitru a isa kanu sapulu enggu dua a pinamili nu Isa al-Masih a sinugu nin. Simiun i inibedtu sa lekanin nu manga lukes'in ugaid'a binedtuan sekanin nu Isa al-Masih sa Pitru a nia nin maena sa basa a Grik na watu. Mabatia i nia sia kanu Mapia a Tutuma a Inisulat'i Mataya 16 ayat 16 taman sa 18 enggu sia kanu Mapia a Tutuma a Inisulat'i Yuhan 1 ayat 41 taman sa 42.
Su kinasulat'i Pitru sa nia na lu natabu sa dalepa a Ruma sa kanu manga lagun a 64 ulian nu kinapatay nu Isa al-Masih. Na lu pakatumpa su nia a sulat'in kanu manga pinamili nu Kadenan a 'bpamaginugut sa lekanin magidsan i Yahudi atawa ka dikena-Yahudi a pedtala sa kamalasayan a nakapayapat kanu manga prubinsia a Puntus, Galasia, Kapadusia, Asia enggu Bitinia. Na su nia a manga prubinsia na sakup'u dalepa a Turkey sa saguna a timpu.
Na nia kahanda ni Pitru sa kanu kinasulat'in sa nia na asal'a makapagkabagel'in su manggiginawa nu 'bpamaginugut kanu Kadenan kanu entu ba a manga dalepa sa apia nia nin kaaden i pedtala silan sa kamalasayan.
Inipatadem'i Pitru kanilan su Mapia a Tutuma pantag kanu Isa al-Masih a su kinapatay nin, su kinambibiag'in 'bpaluman enggu su kambalingan nin sia sa dunia a nia nin unga na inam. Na kagina ka maitu na dait a taliman nilan atawa ka tigkelan nilan su kamalasayan a 'gkangatala nilan sabap kanu salig'ilan kanu Isa al-Masih kagina su Isa al-Masih na tinemala bun sa kamalasayan. Na natalatantu a aden mapia a unga nin kanilan su kapedtala nilan sa kamalasayan ka sia kanu kambalingan nu Isa al-Masih na makatalima silan sa limu a da taman nin enggu makaampit silan kanu sigay a di pebpapas.
Inipatadem bun ni Pitru u ngin i dait a ula-ula nu 'bpamaginugut kanu Kadenan.