Ika-isa a Sulat'i Pitru
Su Salam
1
Salam sa lekanu. Saki si Pitru a sinugua nu Isa al-Masih. Su nia a sulat na san pakatumpa sa lekanu a manga pinamili nu Kadenan. Na mana kanu man manga lapu a penggagalu bu sia sa dunia a nakapayapat kanu manga prubinsia a Puntus, Galasia, Kapadusia, Asia enggu Bitinia. 2 Na pigkahanda den man nu Ama tanu a su Kadenan su kinapamili nin sa lekanu kanu paganay pan enggu inikelas kanu sia nakanggulalan kanu Suti a Ruh. Na pinamili kanu nin asal'a makapaginugut kanu kanu Isa al-Masih ka enggu kanu maampun sia makanggulalan kanu lugu nin.bNa mamelapay san sa lekanu su da idsan nin a limu nu Kadenan enggu su kalilintad'in.
Su Natatalanged a Inam
3 Pugin su Kadenan a Ama nu Mapulu tanu a su Isa al-Masihc a Kadenan nin bun. Na sabap kanu kasela na lat a nanam'in sa lekitanu na binaluy tanu nin a mana pimbata 'bpaluman sia nakanggulalan kanu kinambibiag 'bpaluman nu Isa al-Masih tembu naaden sa lekitanu su natatalanged a inam 4 sa kabpusakan tanu kanu ipebpusaka a di pegkalat, dala tila nin enggu di pebpapas. Na inadil den su entu sa lekanu lu sa sulega 5 enggu su kabarakat'u Kadenan i pegkelung sa lekanu sia makanggulalan kanu kapedsalig'u gagalu na kabpagingapa nu kanu kalipuasan a inadil den i kapayag lun sia kanu Gay a Mauli.
6 Na sangat a makagkagalaw sa lekanu su entu apia nasisita a temala kanu gagalu sa manga kamalasayan sabap kanu embalang-balang a bataluan. 7 Na matala nu su entu ka enggu maamad sa tidtu-tidtu su kapedsalig'u ka amaika apia su bulawan a pegkalat bun ka pedsayaban asal'a mapagelin, na labi lawan den su kapedsalig'u a balapantag pan kumin sa bulawan a entu. Na su taw a maamad i tidtu-tidtu su kapedsalig'in na makatalima sa pugi enggu kabadtugan a ebpun kanu Kadenan sia kanu kapayag kanu Isa al-Masih. 8 Na apia da nu sekanin mailay na ipegkalimu nu sekanin enggu pedsaligan nu sekanin sa apia di nu pamun sekanin 'gkailay saguna. Tembu 'bpamelapay kanu atay nu su da idsan nin a kapegkagalaw 9 kagina 'gkatalima nu den su kalipuasan a unga nu kapedsalig'u.
10 Na su entu a kalipuasan na dinalidip sa mapia nu manga nabi a nakaalung kanu dala a entu idsan nin a limu nu Kadenan a inenggay nin sa lekanu. 11 Na dinalidip'ilan sa mapia u panun i ukit enggu kanu i timpu a kanggula kanu inipaalung kanilan nu Ruh nu Masih a pedtapid kanilan makapantag kanu matala nu Masih a kamalasayan enggu su kabadtug sa lekanin ulian nu entu. 12 Na inipayag kanu manga nabi i dikena kanilan a kapianan su entu ka lekanu a kapianan. Na nakineg'u den man su makapantag kanu entu sia kanu manga taw a nangusiat kanu Mapia a Tutuma sia nakanggulalan kanu Suti a Ruh a sinugu ebpun sa sulega. Na apia su manga malaikat na pegkiugan nilan a benal pedtuntay su makapantag kanu manga entu ba.
Su Ikelas a Kapaguyag-uyag
13 Na kagina ka maitu na adil'u su ginawa nu sa kanggula nu kanu apia ngin a kahanda nu Kadenan. Kumpen nu su ginawa nu enggu itagu nu kanu atay nu su inam sa matalima nu su da idsan nin a limu nin a inggay sa lekanu sia kanu kambalingan nu Isa al-Masih. 14 Na sabap sa nabaluy kanu den a mamaginugut a wata nu Kadenan na di nu den 'bpagunuti su mawag a kiug'a ginawa nu a mana kanu paganay a da pan sabut'u kanu Kadenan. 15 Ka nia nu den enggula na sia luyud kanu kasuti nu Kadenan a namili sa lekanu na papagikelas'u su ginawa nu kanu langun nu galebek'u. 16 Ka nia man nakadalem kanu kitab na “Nia dait na suti kanu kagina saki na suti.”d
17 Na kagina ka su Kadenan a pedtawagen nu sa Ama ka sekanin i 'bpangukum kanu manusia sa matidtu sia luyud kanu ngin i pinggalebek'u uman i isa na dait a paguyag-uyag kanu sa aden kapagadat'in enggu aden gilek'in sa lekanin gagalu na sia kanu pan sa dunia. 18 Na 'gkatawan nu bun man i dikena su pegkalat a manga langun-taman a mana su bulawan atawa ka pilak i initebus sa lekanu ebpun kanu uyag-uyag a da katagan nin a nakabpun pan kanu manga kalukesan nu, 19 ka nia initebus sa lekanu na su sangat i kabalapantag'in a lugu nu Isa al-Masih. Na su Isa al-Masih na inibaratan sekanin sa manguda a bili-bili a dala tila nin a inigkurban. 20 Na pinamili den man sekanin nu Kadenan unan pan nu kinapangaden kanu dunia. Ugaid'a inipayag sekanin kanu nangauli den a nia a gay sabap sa lekanu a kapianan. 21 Na sia nakanggulalan kanu Isa al-Masih na namedsalig kanu kanu Kadenan a napambibiag sa lekanin 'bpaluman enggu minenggay lun sa kabadtugan ka enggu su kapedsalig'u enggu su inam'u na sia kanu Kadenan.
22 Na saguna a naikelas'u den su ginawa nu sia nakanggulalan kanu kinapaginugut'u kanu bantang na naaden den sa lekanu su senep sa atay a kakalimu kanu suled'u sa paginugut tembu makin nu papangiseg su kagkakalimua nu sa senep sa atay. 23 Ka mana kanu den man pimbata 'bpaluman a dikena sia nakanggulalan kanu manusia a aden papatayan nin ka sia nakanggulalan kanu dala papatayan nin enggu dala kapegkadadag'in a kadtalu nu Kadenan. 24 Ka mana bun su nakadalem kanu kitab a
“Su langun man nu manusia na mana bun su manga utan
enggu su kabadtugan nin na mana bun su kapia na palas'u manga ulak.
Na su utan na pegkukulay
enggu su manga ulak'in na mangalubpug
25 ugaid'a su kadtalu nu Kadenan na di madadag taman sa taman.”e
Na su kadtalu nu Kadenan na entu ba su Mapia a Tutuma a inipangusiat sa lekanu.