Su Bibiag a Watu enggu su Pinamili a manga Taw
2
Na kagina ka maitu na tagak'u den su langun nu mawag a galebek a mana su kasalimbut, su kabpamagigiling sa mapia, su kasekel sa dikena mapia enggu su kapanila-tila kanu ped a taw. 2 Mana bun su wata a bagu ginememaw a sangat a 'gkapangilay nin su gatas'u ina nin na maitu bun ba i kapaginagkay nu kanu bantang a kadtalu nu Kadenan ka enggu mangiseg su kapedsalig'u taman sa katalutup kanu kalipuasan nu. 3 Ka nagedam'u den man su kapianan nu Mapulu.4 Supeg kanu sa lekanin a inibaratan sa bibiag a watu, inikias sekanin nu taw ugaid'a pinamili sekanin nu Kadenan enggu sangat a balapantag sekanin kanu Kadenan. 5 Na mana kanu man su manga edsiap-siapan nu walaya a papedtindegen nu Kadenan a kagkalebenan nin ka enggu kanu mabaluy a suti a 'bpamangurban a 'gkurban sa kapaguyag-uyag a pakasuat kanu Kadenan sia makanggulalan kanu Isa al-Masih. 6 Ka nia man nakadalem kanu kitab na
“Ilay nu, minetad aku sa watu kanu Zion,
a su pinamili ku a watu a balapantag a benal a udsadan.
Na apia entain i semalig sa lekanin na di makayaya.”b
7 Na su entu a watu na sangat i kabalapantag'in sa lekanu a 'bpamaginugut. Ugaid'a kanu manga taw a dikena 'bpamaginugut na natuman kanilan su nakadalem kanu kitab a
“Su watu a inendan nu manga panday
na entu bun ba i nabaluy a balapantag kanu langun nu watu nu walay.”c
8 Na nakadalem bun kanu kitab i
“Su entu a masela a watu na kasiudan nu manga taw a makapagebpa kanilan.”d
Na nasiudan nilan su entu a watu sabap sa da nilan paginuguti su kadtalu nu Kadenan, saleta na entu bun ba i naadil a manggula nilan.
9 Ugaid'a sekanu a 'bpamaginugut na pinamili kanu a manga taw nin, mana kanu balabansa a 'bpamangurban enggu mana kanu bun bangsa a sinuti nu Kadenan a iniumun sa lekanin ka enggu nu makapayag su sangat i kapia nin a manga penggalebeken nu Kadenan. Sekanin i nangenggat sa lekanu sa kaawa nu kanu kalibutengan asal'a makalusud kanu kanu sangat i kapia nin a kalinawag'in.
10 Na kanu paganay na dikena kanu nin manga taw
ugaid'a saguna na binaluy kanu nin den a manga taw nin.
Kanu paganay na dikena kanu nin linatan sa nanam
ugaid'a saguna na linatan kanu nin den sa nanam.
Su Kapaguyag-uyag'u Taw a Panunugun nu Kadenan
11 Manga lusud ku sa tian a papedtayan, mana tanu manga lapu a penggagalu bu pegkakaleben sia sa dunia tembu 'bpangenin ku sa lekanu i tagak'u den su manga mawag a kiug'a ginawa nu a pakabinasa sa lekanu. 12 Paguyag-uyag kanu sa matidtu labi den sia kanu manga taw a dala pamun sabut'in kanu Kadenan asal'a mailay nilan su manga mapia a penggalebeken nu apia nia nin kaaden i pedsenditan kanu nilan pan sa manga mawag a galebekan. Na amaika maitu na mapugi nilan su Kadenan kanu gay a kambalingan nin sia mangukum.
13 Na sia luyud kanu kapegkalilini nu sa mapugi su Mapulu na pasakup kanu kanu 'bpamegkamal kanu dalepa magidsan i sultan a mapulu sa langun nu 'bpamegkamal 14 atawa ka su manga gubilnadul a sinugu nin sa kasiksa kanu manga taw a penggula sa dikena mapia enggu pembadtug kanu manga taw a penggula menem sa mapia. 15 Ka kahanda man nu Kadenan i sia kanu kanggula nu sa mapia na makapatelen nu su dala katagan nin a kangadtalu nu manga taw a 'gkangababal. 16 Paguyag-uyag kanu a mana su manga panunugun nu Kadenan a aden baya-baya nin ugaid'a di nu mumbal a dawa nu su baya-baya nu a entu sa kanggalebek'u sa dikena mapia. 17 Pagadati nu su apia entain a taw enggu ikalimu nu su manga suled'u sa paginugut. Ikagilek'u su Kadenan enggu pagadati nu su sultan.
18 Na sekanu a manga ulipen na paginuguti nu enggu pagadati nu su mapulu nu, magidsan pan i pebpia-pianan kanu nilan atawa ka dili. 19 Ka aden guna-guna nin sa lekanu amaika pedtigkelan nu su manga mawag a papegkaidan sa lekanu a dikena wagib sabap bu sa 'gkalinian nu i masuat'u su Kadenan. 20 Na da guna-guna nin su kapedtigkel'u amaika papegkasakitan kanu sabap sa penggula kanu sa dikena mapia. Ugaid'a amaika pedtala kanu sa kamalasayan sabap sa kapenggula nu sa mapia na aden guna nin su kapedtigkel'u ka pakasuat kanu kanu Kadenan. 21 Ka nia ba i sabap'in i kinaenggat sa lekanu sa kapaguyag-uyag sa maitu ka enggu nu kailingan su Isa al-Masih a nalasay sabap sa lekanu. Na su kinalasay nin a entu na nabaluy a upaman sa lekanu.
22 “Dala man pinggula nin a kabaladusan
enggu dala linemiu kanu ngali nin a kabudtud.”e
23 Pinagkaya sekanin ugaid'a da sekanin suli. Linasay sekanin ugaid'a da bun sekanin pamagigis sa kasuli nin. Ka inidedsa nin man su ginawa nin kanu Kadenan a matidtu i kapangukum'in. 24 Pinggumaked'in su manga kabaladusan tanu sia kanu kinatutuk lun kanu kayu a pinambalawaga ka enggu tanu makatimbang i ginawa tanu sa minatay tanu den sia kanu kabaladusan ka enggu tanu makapaguyag-uyag sa ikelas. Ka sabap man kanu manga pali nin na migkapia kanu.f 25 Mana kanu man bili-bili a natadin ugaid'a saguna na nakambalingan den kanu pedtuganul lun a su pedtiakap enggu su pedtutulu kanu ginawa nu.