Ikadua a Sulat'i Pitru
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Nia ba su Ikadua a Sulat'i Pitru a isa kanu sapulu enggu dua a pinamili nu Isa al-Masih a sinugu nin. Simiun i inibedtu sa lekanin nu manga lukes'in ugaid'a binedtuan sekanin nu Isa al-Masih sa Pitru a nia nin maena sa basa a Grik na watu. Su kinasulat'i Pitru sa nia na lu natabu sa dalepa a Ruma enggu lu pakatumpa kanu manga taw a nakatalima bun kanu balapantag a salig a mana bun su salig a natalima ni Pitru enggu su manga ped'in a pinamili nu Isa al-Masih a sinugu.
Nia kahanda ni Pitru kanu kinasulat'in sa nia na papegkabagelen nin su manggiginawa nu 'bpamaginugut sa papanalusen nilan su bantang a natuntayan nilan sa aden katigkel'in taman sa maguyag-uyag silan sa matidtu a pakasuat kanu Kadenan. Na pabpagingaten nin bun silan kanu manga taw a 'bpamamandu sa di pakatidtu asal'a di silan madtatanggit'u pamakasibay a panduan nilan a sabapan na pakandua-dua kanilan kanu bantang a natuntayan nilan taman sa makapaawa kanilan kanu mapia den a 'gkatamanan nilan. Na nia kiug'i Pitru na unan nu kapatay nin na makapatadem'in kanilan sa mapia su nalabit'in a manga panduan makapantag sa kapaguyag-uyag sa mapia sia luyud kanu manga bantang a natuntayan nilan pantag kanu Isa al-Masih ka enggu silan makaampit kanu kaikelasan nin.