Ikadua a Sulat'i Pitru
Su Salam
1
Salam sa lekanu. Saki si Simiun Pitru a ulipen nu Isa al-Masih enggu sinugua nin.Su nia a sulat na san pakatumpa sa lekanu a namakatalima kanu balapantag a salig a mana bun su natalima nami sia nakanggulalan kanu katidtu nu Kadenan enggu 'bpamelipuas sa lekitanu a su Isa al-Masih.
2 Na mamelapay bun san sa lekanu su da idsan nin a limu nu Kadenan enggu kalilintad sabap kanu kapegkatuntay nu pantag kanu Kadenan enggu kanu Mapulu tanu a su Isa al-Masih.
Su Dait a Ula-ula nu Taw a 'Bpaginugut kanu Isa al-Masih
3 Su Kadenan i minenggay sa lekitanu kanu nasisita tanu sa kapaguyag-uyag a pakasuat sa lekanin sia nakanggulalan kanu kabarakat'in. Na natalima tanu su entu sia nakanggulalan kanu kapegkakilala tanu sa lekanin a namili sa lekitanu sa kapaginugut sia luyud kanu kabadtugan nin enggu kapianan nin. 4 Sabap kanu manga entu na inenggay nin sa lekitanu su balapantag enggu sangat i kapia nin a manga pasad'in asal'a sia makanggulalan kanu entu a manga pasad'in na malepas tanu kanu kamustakilan a galebek sia sa dunia a unga nu mawag a kiug'a ginawa ka enggu tanu makaampit kanu kaikelasan nin. 5 Entu bun ba i sabap'in i dait a paginapas'u a benal i makaunut'u sia kanu kapaginugut'u su kapia na ula-ula a su ula-ula a aden katuntay nin, 6 su katuntay a aden kakumpen sa ginawa, su kakumpen sa ginawa a aden kasabal'in, su kasabal a unut su kapaguyag-uyag a pakasuat kanu Kadenan 7 a su kapaguyag-uyag a aden limu nin kanu suled sa paginugut taman den kanu langun nu taw. 8 Na amaika ka aden sa lekanu su langun nu entu taman sa 'bpangiseg pan su entu na mimbalaguna enggu minunga su kapegkakilala nu kanu Mapulu tanu a su Isa al-Masih. 9 Ugaid'a apia entain menem i dala sa lekanin su entu a manga ula-ula na timbang a pisek sekanin atawa ka di makailay sa mawatan enggu nalipatanan nin su kinaikelas sa lekanin nu Kadenan kanu nangaipus a kabaladusan nin.
10 Kagina ka maitu manga lusud ku sa tian, na paginapas'u su kanggula nu kanu manga pidtalu ku a entu sa lekanu ka enggu maamad sa lekanu i saben-sabenal a inenggat kanu nu Kadenan enggu pinamili kanu nin sa kapaginugut sa lekanin. Ka amaika maitu na di makasibay su salig'u 11 ka nia pan mula na matalima kanu sa mapia a aden kagalaw nin kanu kaludep'u kanu da taman nin a kapendatu nu Mapulu tanu a su Isa al-Masih a 'bpamelipuas.
12 Tembu nia ku kahanda na lalayun ku ipatadem sa lekanu su langun nu entu apia nia nin kaaden i 'gkatawan nu den su entu enggu mabagel den su salig'u kanu bantang a natalima nu. 13 Ka sia sa laki, na dait man a ipatadem ku i entu sa lekanu gagalu na sia aku pan sa dunia ka enggu di nu kalipatanan. 14 Ka 'gkatawan ku den man i mangagan den mapupus su kutika ku sia sa dunia ka inipayag den i entu sa laki nu Mapulu tanu a su Isa al-Masih. 15 Na namba i sabap'in i kabpaginapas ku a benal penggula sa kapatadem ku sa lekanu kanu langun nu entu ka enggu di nu kalipatanan apia madala aku den.
Su Nakadsaksi kanu Sigay nu Isa al-Masih
16 Na su kinapangusiat'ami sa lekanu pantag kanu kabarakat'u Isa al-Masih enggu su kambalingan nin na dikena nami i entu pinangua bu kanu pinangumbayan bu a mapia a tudtulan ka sekami demun i matakapala a nakailay kanu sigay nin. 17 Ka binadtug man sekanin nu Ama nin a su Kadenan a sangat a pembadtugen sa kanu kinapailay nin kanu sigay nu Isa al-Masih sa kanu kinadtalu nin sa “Nia ba su Tunggal a watab ku a pinadtaya enggu sangat a 'gkasuatan ku.” 18 Na saben-sabenal a nakineg'ami demun su entu a suala a ebpun sa sulega sa kanu lu kami kanu suti a palaw nu Kadenan a kaped'ami su Isa al-Masih.c
19 Na sabap sa entu na labi a naamad'ami i benal su naalung'u manga nabi pantag kanu Isa al-Masih.d Tembu dait a pakikineg'u su ipebpayag'u manga nabi ka mana bun i nia palitan a pakatayaw kanu malibuteng taman sa kauma nu Isa al-Masih. Na mana bun man sekanin su bitun a pedsebang kanu 'gkatibuas a pakatayaw kanu pamusungan nu. 20 Nia masela na tuntayi nu sa mapia i dala man inisulat'u manga nabi kanu kitab a ebpun bu sa kanilan a katuntay. 21 Kagina langun man nu inipayag'u manga nabi na dikena ebpun kanu manusia ka ebpun kanu Suti a Ruh a pedtutulu kanu manga taw a pebpayag kanu kadtalu nu Kadenan.