Su Kapedtuganul kanu manga Bili-bili nu Kadenan
5
Na aden bun 'bpangenin ku sa lekanu a 'gkangaunutan. Ka saki a pagidsan nu a 'gkaunutan a nakadsaksi kanu kamalasayan nu Isa al-Masih enggu makaampit kanu sigay nin kanu timpu a kapayag lun na 'bpangenin ku sa lekanu i 2 tuganul'u sa mapia su iniupaman sa manga bili-bili nu Kadenan a su 'bpamaginugut a inisalig sa lekanu. Tuganul'u silan sa dikena bu sabap sa entu ba i nakasangan sa lekanu a galebekan ka enggula nu su entu sa maluwag sa ginawa nu a mana bun su kahanda nu Kadenan. Tuganul'u silan sa dikena sabap sa aden 'gkapantiali nu lun ka senep sa atay a kapedtuganul. 3 Di nu pebpapului su inisalig sa lekanu sa katuganul'u lun ka nia dait na mabaluy kanu a upaman kanilan. 4 Na amaika ipayag den su mapulu nu patutuganul sa bili-bili na makatalima kanu sa balas a mana su kaampit kanu sigay a di pebpapas.5 Na sekanu menem a manganguda, na paginuguti nu su mangatua sa lekanu. Ipangalimbaba na uman i isa i ginawa nin kanu ped'in ka nia man nakadalem kanu kitab na
“Tabangan nu Kadenan su taw a ibaba nin i ginawa nin
ugaid'a sungkang sekanin kanu taw a ipulu nin i ginawa nin.”a
6 Kagina ka maitu na ibaba nu su ginawa nu sia kanu kandatu nu Kadenan a barakat ka enggu sia kanu kauma nu timpu a initandu nin na ipulu kanu nin. 7 Na su langun na pakalidu kanu manggiginawa nu na idedsa nu kanu Kadenan kagina balapantag kanu man sa lekanin.
8 Na kumpen nu su ginawa nu enggu tatap kanu edsipat kagina su kuntela nu a su Saitan na mana alimaw a pedsasaligid ka 'bpangilay sa 'gkasakab'in. 9 Na atui nu sekanin sa ukit a kapakabagel'u kanu tindeg'u sa kasalig. Ka dikena bu man sekanu i pedtala sa kamalasayan ka apia su manga suled'u sa paginugut kanu embala-bala sa dunia na pedtala bun silan sa kamalasayan. 10 Ugaid'a ulian nu kapedtala nu sa kamalasayan sa mangagan bu na su Kadenan a 'gkabpunan nu dala idsan nin a limu a nangenggat sa lekanu sa kaampit'u kanu dala kapegkapupus'in a sigay nin sia kanu kinaisa nu kanu Isa al-Masih na sekanin i mapadtindeg sa lekanu 'bpaluman enggu mapagkabagel kanu salig'u ka enggu di kanu magkeleng-keleng taman sa sekanin i temalutup kanu uyag-uyag'u. 11 Sa lekanin su tidtu-tidtu a kabarakat taman sa taman, Amin.
Su Mauli a Salam
12 Sia kanu tabang'i Silbanus a kasaligan a suled sa paginugut na nakasulat ku su mababa bu a nia a sulat sa lekanu ka nia ku kalinian na makapagkabagel ku i manggiginawa nu enggu makapailay ku sa lekanu su tidtu-tidtu a kapegkalimu nu Kadenan tembu pakabagel'u i tindeg'u sia kanu limu nin.
13 Na pedsalamen kanu nu 'bpamaginugut sia sa dalepa a Babilunia a pagidsan nu bun a pinamili nu Kadenan. Pedsalamen kanu bun ni Markus a timbang a wata ku. 14 Na salamen na uman i isa su ped'in sia luyud kanu kapegkakalimua nu.
San sa lekanu su kalilintad a nalusud kanu Isa al-Masih.
Wassalam