Su Taw a 'Gkasaligan kanu Kapegkagaga a Inenggay nu Kadenan
4
Na kagina ka su Isa al-Masih na minukit bun sa kamalasayan na nia dait na maitu tanu bun ba, adil tanu bun sa katalima tanu kanu kamalasayan. Kagina su taw a tinalima nin su kamalasayan na abungan nin i kambaladusa. 2 Ka di nin den 'bpagunutan su kamamanusiay a kiug'a ginawa nin ka nia nin den 'bpagunutan na su kahanda nu Kadenan gagalu na sia pan sekanin sa dunia. 3 Na nangasasangan den man i manga kutika a naibped'u kanu nangaipus a timpu sa kinanggalebek'u kanu manga galebekan a mana su penggalebeken nu manga taw a dala sabut'in kanu Kadenan a mana su kamustakilan a galebek, su kanguda na ginawa, su kapendalangutan, su subela a kapenggalaw-galaw enggu su kapedsimba sa balahala a sungkang a benal kanu Kadenan. 4 Na 'gkagaip su entu a manga taw kagina di kanu den 'bpagigiamung kanilan kanu mawag a entu a manga galebekan nilan tembu pedtalu-taluan kanu nilan sa dikena mapia. 5 Ugaid'a mauma nilan bun i entu sia kanu adapan nu Kadenan a adil den a benal sa kakukum'in kanu langun nu taw, magidsan pan i minatay den enggu bibiag pamun. 6 Ka namba man i sabap'in i inipangusiat su Mapia a Tutuma apia kanu manga taw a minatay den ka enggu apia minatay den su badan nilan sabap kanu kinakukum'u Kadenan sa kanu kabaladusan nilan na makapaguyag-uyag pamun su ngiawa nilan a mana bun su da taman nin a kabpaguyag-uyag'u Kadenan.7 Na kagina ka mangagan den 'gkauma su kapegkapupus kanu langun-langun na nia dait na pakapia nu su kapamagitung'u enggu kumpen nu su ginawa nu ka enggu kanu makapangeni-ngeni. 8 Na nia masela sa entu na 'gkakalimua kanu sa senep sa atay kagina su kakalimu na magaga nin man sa mamakapagampuna su taw, apia ngin pan i kadakel'a kabaladusan nu uman i isa. 9 Na taliman na uman i isa kanu walay nin su ped'in sa maluwag kanu ginawa nin. 10 Na uman i isa na inenggan sa kapegkagaga. Na usal'u su entu sa kadtabang'u kanu ped'u a mana bun su taw a kasaligan sa mapia kanu embalang-balang a kapegkagaga a inenggay nu Kadenan. 11 Na apia entain i inenggan sa kapegkagaga sa kadtalu-talu sa mapia na nia dait na su edtalun nin na sia luyud kanu kadtalu nu Kadenan. Na apia entain menem i inenggan sa kapegkagaga sa kadtabang'in sia kanu galebekan kanu Kadenan na enggulan nin su entu sia luyud kanu bagel a inenggay sa lekanin nu Kadenan. Na amaika maitu na kanu langun nu penggulan nu na mapugi su Kadenan sia makanggulalan kanu Isa al-Masih. Na lekanin su langun nu pugi enggu kabarakat taman sa taman. Amin.
Su Kapedtigkel kanu Kamalasayan
12 Manga lusud ku sa tian a papedtayan, di nu 'gkagaipi su manga mapasang a batalu a 'gkangatala nu saguna a mana nia nu lun kapegkailay na dikena 'gkadsalilidan. 13 Ka nia pan dait na ikagalaw nu su entu kagina pakaampit kanu kanu kamalasayan nu Isa al-Masih enggu labi a magalaw kanu amaika ipayag den su sigay nin. 14 Na ngin den man i kapia nin sa lekanu amaika papegkayan kanu sabap sa 'bpaginugut kanu kanu Isa al-Masih ka su Ruh a barakat a su Ruh nu Kadenan na san sa lekanu. 15 Na apia papegkapasangan kanu na dikena sabap sa minimatay kanu, nanegkaw kanu, minggula kanu sa mawag atawa ka linusudan nu su uyag-uyag'u ped a taw, 16 ka papegkapasangan kanu sabap sa 'bpaginugut kanu kanu Isa al-Masih, na di nu a benal ipegkaya su entu ka makin nu pugi su Kadenan kagina nalusud kanu kanu Isa al-Masih. 17 Ka nauma den man su timpu a kakukum'u Kadenan. Na su kukuman a entu na sia lemudsu sa lekitanu. Na amaika su kukuman nin a nia ka mapasang sa lekitanu na labi lawan den i kapasang'in kanu manga taw a di pedtalima kanu Mapia a Tutuma a ebpun kanu Kadenan. 18 Na mana bun man su nakadalem kanu kitab a
“Amaika apia su ikelas a manga taw ka dikena malemu i kalipuas'ilan
na labi lawan den kanu manga taw a pembaladusa enggu di pedtalima kanu Kadenan.”a
19 Kagina ka maitu na sekanu a pedtala sa kamalasayan sia luyud kanu kahanda nu Kadenan na papanalus'u su kapenggalebek'u sa mapia. Idedsa nu su ginawa nu kanu Kadenan a nangaden ka di man sekanin mapadapat.