Su Dait a Ula-ula nu 'Gkalumaya
3
Na maitu bun ba, su manga babay a aden kaluma nin, na ibaba nu su ginawa nu kanu kaluma nu ka enggu amaika su kaluma nu ka dikena pamun 'bpaginugut kanu kadtalu nu Kadenan na makapapaginugut'u silan apia dikena kanu den pedtalu sabap kanu ula-ula nu a ipebpagilay nu kanilan 2 kagina mailay nilan su matulanged a kabpaguyag-uyag'u enggu su gilek'u kanu Kadenan. 3 Na nia dait na su manis'u na dikena sia kanu matakapala a 'gkailay nu taw a mana su kapebpalas'u kanu buk'u, su kapembulawan nu enggu su kapembalegkas'u sa mapia 4 ka nia dait a manis'u na ebpun kanu pamusungan nu a mana su kapia na ula-ula a di pegkelas enggu su kalemek'u palangay ka entu ba i balapantag a benal kanu adapan nu Kadenan. 5 Na paganay na maitu ba man su ukit'u manga babay a ikelas a sia kanu Kadenan i inam'ilan ka su manis'ilan na sia kanu kabpangalimbaba nilan kanu ginawa nilan kanu kaluma nilan 6 a mana bun su Sara a pinaginugutan nin su kaluma nin a su Ibrahim taman sa tinawag'in pan sa mapulu nin. Na madtalu a manga muliataw kanu den nu Sara amaika nia nu enggulan na u ngin i mapia enggu di kanu magilek sa kanu apia ngin.7 Na sekanu menem a manga mama, na sia kanu kapedtiwalay nu na 'bpia-piani nu su kaluma nu ka dikena nu silan pagidsan sa kabagel. Pagadati nu silan ka isa bun silan a inenggan sa uyag-uyag a da taman nin. Na amaika maitu na dala makaungen kanu manga pangeni-ngeni nu.
Su Kamalasayan sabap kanu Kapenggula sa Mapia
8 Kagina ka maitu na nia dait na papagisa nu su itungan nu, tuntayi nu su manggiginawa nu ped'u, 'gkakalimua kanu a mana bun edsusuled, lati nu sa nanam su ped'u enggu ibaba nu i ginawa nu. 9 Da kanu semuli sa mawag kanu penggula sa lekanu sa mawag, di nu mapagkaya su papegkaya sa lekanu ka makin nu ipangeni-ngeni i palihalan silan. Ka entu ba i pinangenggatan sa lekanu a ukit a kapaguyag-uyag ka enggu nu matalima su palihala. 10 Ka nia man nakadalem kanu kitab na
“Apia entain i malilini sa mapia a kapaguyag-uyag
enggu kagalaw
na nia dait na di edtalu sa mawag
enggu di embudtud.
11 Ka makin nin tagaken su mawag a galebek ka nia nin enggulan na su ngin i mapia a galebek.
Paginapasen nin i kapaguyag-uyag'in sa malilintad.
12 Ka pedtiakapan man nu Mapulu su manga taw a ikelas
enggu 'bpakikinegen nin su manga pangeni-ngeni nilan
ugaid'a su manga taw a penggula sa mawag na pedtaligkudanan nu Mapulu.”a
13 Na dala man taw a enggula sa lekanu sa dikena mapia amaika nia nu kalilinian enggula na u ngin i mapia. 14 Ugaid'a amaika temala kanu menem sa kamalasayan sabap kanu kapenggula nu sa mapia na ngin den i kapia nin i entu sa lekanu. Na di nu bun ipegkagilek su apia ngin a pakaidan nilan sa lekanu enggu di nu bun 'bpelidui sa ginawa su entu. 15 Makin nia nu enggula na kilala nu sa senep sa atay sa su Isa al-Masih na Mapulu nu enggu lalayun kanu adil sa kasumpat'u sa kanu apia entain a midsa sa lekanu pantag kanu inam a aden sa lekanu. 16 Ugaid'a sumpati nu silan sa aden kananaw nin enggu aden adat'in. Talanged'u bun i dala andam'u kanu ginawa nu ka enggu kayan su apia entain a papegkawag kanu manga penggulan nu a mapia sabap sa nalusud kanu kanu Isa al-Masih. 17 Ka nia menem tinemu i apia 'gkalasay kanu na sia kanu kapenggula nu sa mapia amaika menem ka su entu na luyud kanu kahanda nu Kadenan kumin sa 'gkalasay kanu sabap sa kapenggula nu sa mawag.
18 Ka apia man su Masih na linasay bun sabap kanu manga kabaladusan tanu. Dala a benal kabaladusan nin ugaid'a minatay sabap sa lekitanu a manga baladusa ka enggu tanu nin makapambalingan kanu Kadenan. Na su entu a kinapatay nin na nakaisa bu nanggula. Inimatayan man su badan nin ugaid'a pinambibiag sekanin nu Suti a Ruh. 19 Na sia nakanggulalan kanu entu a nanggula nin na pibpawangan nu Isa al-Masih su nangabilanggu a ngiawab ka aden inipayag'in 20 kanu silan a entu a sinemungkang kanu timpu a kabpagingapa nu Kadenan kanu kadtaubat'u manga taw gagalu nu kabpagumbal'u Nabi Nuh kanu kapal. Ugaid'a guna makauma su kadalem na walu kataw bu i nalipuas kanu ig. 21 Na su ig a entu na inibaratan kanu salawat a napalipuas sa lekanu saguna. Na su entu na dikena kapenggagas kanu maledsik'u badan tanu ka tanda i entu sa inipangeni-ngeni tanu kanu Kadenan i limpiun nin su atay tanu. Na nalipuas tanu kanu entu a salawat sia nakanggulalan kanu kinambibiag 'bpaluman nu Isa al-Masih. 22 Na lu den sekanin saguna sa sulega a 'bpagagayan kanu kawanan nu Kadenan a pedsugiud pan sa lekanin su manga malaikat enggu su langun nu aden kamal'in enggu bagel'in.