Sulat'i Yakub
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Nia sinemulat kanu nia a kitab na si Yakub a tebped sa pused'u Isa al-Masih. Dikena nia su Nabi Yakub ugaid'a isa bun sekanin a 'gkaunutan nu 'bpamaginugut sa Awrusalim.
Nia sabap a kinasulat'u Yakub kanu nia na asal'a makasampay nin su nia a kitab kanu 'bpamaginugut a nakapayapat kanu manga dalepa. Papegkabagelen nin su salig'u 'bpamaginugut ka enggu nilan malipuas su manga galebekan a dikena mapia taman den kanu manga ped pan a sasat sia kanu dunia. Inibpaliugat'in sia su katigkel enggu su kasabal asal'a 'gkabagel su salig. Inibpaliugat'in bun i apia ngin a kamutuan a matala na ipangeni-ngeni kanu Kadenan sa dala kandua-dua nin ka natalatantu a inggay nu Kadenan su entu sia luyud kanu kahanda nin kagina sangat a malimu su Kadenan.
Na pidsinantal bun ni Yakub kanu nia a sulat'in i dait a tigkelan su langun na bataluan a makatingguma ka isa i nia a makapagkabagel kanu salig taman sa dait a inggulalan su kadtalu nu Kadenan. Di dait a mapambidaya su taw ka nia dait na isa bu i kailay kanu manga taw magidsan pan i kawasa atawa ka miskinan enggu dait bun a mailay su salig sia kanu uyag-uyag. Nadsinantal bun sia u endaw taman i kapegkagaga nu dila sa kabinasa nin kanu taw enggu nalabit bun sia i su tidtu-tidtu a ilemu na nia nin 'gkabpunan na su Kadenan taman sa pinasabutan bun ni Yakub i su taw a malilini sa kaduduniay na 'gkabaluy a kuntela nu Kadenan.
Nakadalem bun kanu nia a sulat'in i dala kawagib'u apia entain sa kasugat'in sa kawagib kanu ped'in ka saben-sabenal a su Kadenan bu i aden kawagib'in sa entu. Di bun dait a emamasela su apia entain ugaid'a nia mapia na makin ibaba su ginawa ka entu ba i makasuat kanu Kadenan. Su manga kawasa menem na di dait a pangumisen nilan su manga taw a dala 'gkagaga nin enggu dait a itidtu nilan su ngin i kawagib'ilan. Na su manga taw menem a aden penggedamen nin na isupeg kanu Kadenan sia makanggulalan kanu kapangeni-ngeni kagina su pangeni-ngeni nu taw a senep sa atay i salig'in na pambarakaten nu Kadenan.