Su Galebekan a Makasuat kanu Kadenan
13
Papanalus'u su kagkakalimua nu a edsusuled sa paginugut. 2 Di nu ipedtalipenda su kapatalus'u kanu manga taw a dala 'gkatumpan nin kanu manga walay nu, ka aden manga taw paganay a minggula bun sa maitu ba, na da nilan katawi i manga malaikat besen su nadsakaw-sakaw nilan a entu. 3 Di nu bun 'bpelipatani su kadtabang'u kanu manga suled'u sa paginugut a nangabilanggu sa mana bun kaped kanu nilan a nabilanggu. Lati nu bun sa nanam su manga suled'u sa paginugut a papegkapasangan sa mana bun 'gkagedam'u su kapapegkapasang kanilan.4 Na nia dait na enggan sa kabalapantag su tiwalayan nu taw enggu nia dait na di kanggiabuan su entu. Kagina sugaten nu Kadenan sa kawagib su manga taw a pedsisina enggu pegkikiuga. 5 Pangingati nu bun su subela a kakiug sa kuleta. Na nia dait na masukul kanu sa u ngin i aden sa lekanu, ka nia man kadtalu nu Kadenan na “Di ku a benal sekanu tagaken atawa ka padtadayn.”a 6 Tembu madtalu tanu sa dala kandua-dua nin i
“Su Mapulu i pedtabang sa laki,
tembu di aku kagilekan. Na ngin ba man i manggula nu taw sa laki?”b
7 'Gkakalendem'u su 'gkangaunutan nu a nangusiat sa lekanu kanu kadtalu nu Kadenan enggu ilay nu su kapianan nu ukit'u kinapaguyag-uyag'ilan sia sa dunia. Ilingi nu su kinasalig'ilan kanu Kadenan. 8 Na di man embagu su Isa al-Masih. U ngin sekanin paganay na maitu bun ba sekanin saguna taman sa taman. 9 Da kanu mapadtatanggit kanu apia ngin a panduan a salakaw kanu natuntayan nu. Ka nia mapagkabagel kanu salig tanu na su da idsan nin a limu nu Kadenan, dikena su kapaginugut tanu kanu manga kasuguan pantag kanu manga atulan sa manga pegken, manga atulan a dala pakagkapia nin kanu manga taw a penggulalan lun.
10 Na su sekitanu a 'bpamaginugut kanu Isa al-Masih na aden kurban tanu a su kinanggihad'u Isa al-Masih kanu umul'in ugaid'a su 'bpamangurban a Yahudi a ipedtalus'ilan bun su kabpangurban a sia luyud kanu kasuguan a inenggay kanu Musa na dala kawagib'in a mamung sa lekitanu kanu entu. 11 Na su lawas'u manga binatang a inigkurban nu manga Yahudi sa kanu kabaladusan nilan na pedtutungen lu kanu liu nu pegkampuan nilan u mapasad kemua nu mapulu sa langun nu 'bpamangurban su lugu nu entu a binatang ka 'bpananggiten nin lu kanu Suti sa Langun a Bilik. 12 Na maitu bun ba i nanggula nu Isa al-Masih, inimatayan sekanin kanu liu nu siudad ka enggu nin maikelas su manga taw sia makanggulalan kanu lugu nin. 13 Kagina ka maitu na 'bpawangan tanu sekanin kanu liu nu siudad ka amungan tanu kanu kayayan a tinigkelan nin. 14 Ka dala man tidtu a siudad tanu sia sa dunia ka nia tanu 'gkapaginagkay na su siudad a pakauma pan. 15 Tembu sia makanggulalan kanu Isa al-Masih na papanalusen tanu su kapegkurban tanu sa ukit a kapugi kanu Kadenan a su kurban a ebpun demun kanu manga ngali tanu a pebpayag kanu ingala nin. 16 Na di nu bun lemipatani su kanggula nu sa mapia enggu su kadtabang'u kanu ped'u sa u ngin i aden sa lekanu kagina 'gkasuatan nu Kadenan su manga maitu ba a kurban.
17 Paginuguti nu su 'gkangaunutan nu enggu enggula nu su ngin i isugu nilan sa lekanu kagina silan i pedtiakap sa lekanu sa di nu kasibay sa kasangul'u kanu Kadenan. Na 'bpaginapasen nilan penggula su entu ka katawan nilan i aden timpu a sia den silan kanu adapan nu Kadenan na idsa nu Kadenan kanilan su entu u natuman nilan sa mapia. Na mapia i ginawa nilan amaika paginugutan nu silan sia kanu kanggulalan nilan kanu entu a galebekan nilan sa lekanu. Ka amaika lidun nu i ginawa nilan sia kanu kanggulalan nilan sa entu na dikena mapia i unga nin sa lekanu.
18 Na ipangeni-ngeni kami nu bu. Na natatalanged'ami man i sia kanu ginawa nami na dala pinggula nami a da makasuat kanu Kadenan. 'Bpaginapasen nami i kabpaguyag-uyag sa matidtu sa kanu apia ngin a ukit. 19 Na 'bpangenin ku sa lekanu i ipangeni-ngeni nu i mangagan aku makambalingan san.
Su Pangeni-ngeni nu Sinemulat
20 Na su Kadenan a 'gkabpunan nu kalilintad a napambibiag 'bpaluman kanu Mapulu tanu a su Isa al-Masih a mabagel a pedtiakap sa lekitanu a mana su manga bili-bili nin enggu pinambibiag sabap kanu lugu nin a minilut kanu dala taman nin a kapasadan nu Kadenan 21 na pangeni-ngenin ku sa lekanin a Kadenan i inggay nin sa lekanu su langun nu nasisita nu ka enggu nu manggula su kahanda nin. Na sia makanggulalan kanu Isa al-Masih na tabangan tanu nin sa kanggula tanu sa kanu ngin i pakasuat sa lekanin. Pugin sekanin taman sa taman. Amin.
Su Mauli a Salam
22 Manga lusud ku sa tian a 'bpamaginugut, 'bpangenin ku sa lekanu i pakikineg'u sa mapia su manga kangadtalu ku sia a pamandu sa lekanu ka dikena bun gaid malendu su nia a sulat ku sa lekanu. 23 Na papegkatawan ku bun sa lekanu i su suled tanu sa paginugut a si Timuti na nakaliu den sa bilangguan. Na amaika mangagan sekanin sia makauma na paunuten ku sekanin sa kasan ku sa lekanu. 24 Isalam kami nu bu san kanu 'gkangaunutan nu taman den kanu langun nu 'bpamaginugut. Pedsalamen kanu bun nu manga suled tanu sa paginugut a taw sa Italia. 25 Na san sa lekanu langun su da idsan nin a limu nu Kadenan.
Wassalam