Su Kinatigkel'u Isa al-Masih enggu su Kapapedtidtu nu Kadenan kanu manga Nabaluy a Wata nin
12
Na kagina ka maitu sa nabalibet tanu nu madakel a benal a midsaksi pantag kanu manga salig'ilan na dait a tagaken tanu den su manga kabaladusan a pakaungen sa lekitanu. Ka iling-iling'u kapegkuya na iawa tanu su apia ngin a pakasikut sa kanu kapedtalaguy tanu. Papanalusen tanu su kapedtalaguy tanu sa aden katigkel'in kanu pegkuyan a inenggay nu Kadenan sa lekitanu. 2 Nia tanu ilayn na su Isa al-Masih a ulu nu salig tanu enggu tinemalutup kanu ukit'u kapedsalig kanu Kadenan. Tinigkelan nin su kinatutuk lun kanu kayu a pinambalawaga enggu da nin pagitunga su kayayan kanu maitu a ukit a kinapatay nin ka nia nin pinagitung na su kapia na ginawa a 'bpagingapa sa lekanin. Na saguna na 'bpagagayan den sekanin kanu tampal sa kawanan nu kulesi nu Kadenan.3 Na nia nu pagitung na su kinatigkel'u Isa al-Masih kanu manga kamalasayan a natala nin sia kanu palad'u manga baladusa a manga taw ka enggu kanu di makasangkup sia kanu kapedsalig'u atawa ka di 'gkalubay su manggiginawa nu. 4 Nia nin man kabantang, na dala pamun nakaigis i lugu nin sa lekanu sabap sa kabpaginapas'u kanu kapedsungkang'u kanu manga kabaladusan a galebek. 5 Na aden a entu na nalipatanan nu den su manga papata nu Kadenan sa lekanu a manga nabaluy a wata nin sa nia nin kadtalu na
“Wata ku, itagu nengka sa ginawa su kapapedtidtu sa leka nu Mapulu.
Di ka mapagkalubay i manggiginawa nengka amaika dawayn ka nin sa kapatidtu sa leka
6 kagina su Mapulu na patidtun nin man su taw a ipegkalimu nin.
Patidtun nin su taw a nabaluy a wata nin.”a
7 Tembu tigkeli nu su kamalasayan sabap sa kapapedtidtu sa lekanu nu Kadenan kagina ipedtimbang kanu nin sa manga wata nin. Ka langun man na ama na patidtun nin su manga wata nin. 8 Na amaika di kanu patidtun nu Kadenan a mana su penggulan nin kanu langun nu nabaluy a manga wata nin, na nia nin maena na dala kanu malusud kanu nabaluy a manga wata nin, dikena kanu nin tidtu a manga wata. 9 Na amaika su ama tanu sia sa dunia a papedtidtu sa lekitanu ka 'bpagadatan tanu silan sabap sa entu, na labi lawan den su Ama a nabpunan nu ngiawa tanu, tembu dait a mapasakup tanu sa lekanin sa kapapedtidtu nin sa lekitanu ka nia unga nu entu na uyag-uyag a da taman nin. 10 Ka su ama tanu sa dunia na papedtidtun tanu nilan sa mangagan bu a manga kutika sia luyud kanu ngin i kapegkailay nilan lun a pakagkapia. Ugaid'a su kapapedtidtu nu Kadenan sa lekitanu na lekitanu bun a kapianan ka enggu tanu makaampit kanu kasuti nin. 11 Na nia tatap na su kapapedtidtu na dikena pakapia sa ginawa kanu entu demun ba ka pakasakit sa ginawa ugaid'a nia mambu kaulianan nu entu na kalilintad enggu uyag-uyag a ikelas kanu apia entain a nabibit sa entu.
12 Kagina ka maitu na pakabagel'u su 'gkangalubayan den a manga lima nu enggu idtindeg'u su 'gkangalubayan den a manga aleb'u. 13 Ilakaw nu kanu matidtu a lalan ka asal'a su manga suled'u sa paginugut a pedtundug sa lekanu a malubay pamun i paginugut'in na di den kalunsanan ka makin 'gkabagel su paginugut'ilan.
Su Kapaingat kanu Kakias kanu Kadenan
14 Na uman i isa sa lekanu na maginapas sa kapaguyag-uyag'in sa malilintad. Paginapas'u bun i kapaguyag-uyag'u sa ikelas ka amaika dili na di nu mailay su Mapulu. 15 Talanged'u i dala makataligkud sa lekanu kanu da idsan nin a limu nu Kadenan ka nia kalagidan nu taw a enggula sa maitu ba na mana dalid'u pamumulanen a mapait i unga nin a pakaduti taman sa madakel i makalalagit'in kadutian. 16 Talanged'u bun i dala makailing sa lekanu kani Isaw a tinemaligkud kanu Kadenan enggu nia nin bu napagitung na kaduduniay. Inidsambi nin su kawagib'in sa kakakai sa nakaisa bu a kinakan.b 17 Na katawan nu bun i ulian nu entu na pinangeni ni Isaw kanu ama nin su palihala a ibpagenggay kanu kaka a wata ugaid'a dala inggay sa lekanin su entu kagina di den mabagu su unga nu pinggula nin a entu.c Na di nin den makua apia nia nin kaaden i maguguliang pan sa kapagapas'in lun.
18 Na su kapedsupeg'u man kanu Kadenan na dikena mana su kinasupeg'u manga taw a Israil kanu palaw a Sinai a nailay nilan lu su 'bpangalaw-kalaw a apuy, su kalibutengan enggu su mabagel a sambel. 19 Nakakineg bun silan sa uni na tambuli enggu suala a pedtalu taman sa nakapamagayuk'ilan kanu suala a entu i di den edtalu kanilan. 20 Kagina di nilan magaga su kasuguan a “Apia entain i makakembil kanu nia a palaw apia binatang na pamengelen sa watu taman sa matay.”d 21 Na sangat man a makagilek su entu a nailay nilan ka apia su Musa na nia nin nadtalu na “Pegkegkel aku na gilek.”e
22 Ugaid'a nia nu man sinupegan na su Palaw a Zion, a su siudad'u kaisa-isa nin a Kadenan a su Awrusalim a lu sa sulega a di mabilang i kadakel'u malaikat'in a pendidilimudan a 'gkangagalaw. 23 Nia nu kauman lu na su kapendidilimudan nu manga initimbang sa kaka sa langun a wata nu Kadenan a namakasulat su manga ngala nilan lu sa sulega. Kauman nu lu su Kadenan a 'bpangukum kanu langun nu taw enggu kauman nu lu su manga ngiawa nu manga taw a matidtu a nalimpiu den sa talutup. 24 Kauman nu bun lu su Isa al-Masih a minalut kanu bagu a kapasadan nu Kadenan sa lekitanu sia nakanggulalan kanu lugu nin. Na su lugu nin a entu na labi a mapia i tudtul'in kumin kanu lugu nu Habil.
25 Tembu talanged'u a benal i pakikinegen nu su Kadenan a pedtalu sa lekitanu. Ka amaika apia su manga taw a Israil a dala pakikineg kanu pedtalun nin kanilan lu kanu palaw sa Sinai sia sa dunia ka dala silan makalipuas kanu siksa nin na labi lawan tanu den amaika taligkudan tanu su pedtalun nin sa lekitanu a ebpun sa sulega. 26 Na kanu timpu a kinadtalu nu Kadenan lu kanu palaw a Sinai na nakuyung su lupa. Ugaid'a saguna na inibpasad'in i “Aden bun gay a kuyungen ku 'bpaluman su dunia ugaid'a dikena nia ku bu kuyungen su lupa ka apeg den nu langit.”f 27 Na su kadtalu a “Aden bun gay,” na pakapatuntay sa lekitanu sa iawa den nu Kadenan su langun nu inaden nin a makuyung ka enggu masama su langun nu di makuyung. 28 Tembu edsukul-sukul tanu kanu Kadenan kagina nalusud tanu kanu pendatuan nin a di makuyung. Simban tanu sekanin a Kadenan sa ukit a makasuat sa lekanin sa aden kapagadat lun enggu gilek sa lekanin 29 kagina su kapedsiksa nu Kadenan na mana bun apuy a penggepul.g