Su manga Taw a Napailay sa Tidtu-tidtu a Kinasalig kanu Kadenan
11
Na su salig na papedtalanged sa matalima su ngin i 'gkainam enggu pedtalanged sa benal su di pan 'gkailay. 2 Na sabap sa salig'u manga katupuan tanu na nasuatan silan nu Kadenan. 3 Na sabap bun kanu salig tanu na natawan tanu i su dunia na inaden nu Kadenan sia nakanggulalan kanu kadtalu nin. Tembu su langun na 'gkangailay tanu na dikena ebpun kanu 'gkangailay den.4 Na sabap bun kanu salig'u Habil na su kurban nin kanu Kadenan na labi a mapia kumin kanu kurban ni Kabil. Na sabap bun kanu salig'u Habil kanu Kadenan na initimbang sekanin a ikelas kagina nasuatan nu Kadenan su kurban nin. Na apia minatay den su Habil na masela pamun a panduan sa lekitanu su entu a salig'in. 5 Na sabap bun kanu salig'u Inuk na dala den sekanin makatala sa kapatay ka init sekanin lu sa sulega, “Nalangiap sekanin kagina kinua sekanin nu Kadenan.”a Na nalabit bun sia kanu kitab i unan nu kinakua sa lekanin na nasuatan sekanin nu Kadenan. 6 Na amaika dala salig'u taw na di man makasuat kanu Kadenan kagina apia entain a taw i pedsupeg sa lekanin na dait a paginugutan nin i aden sekanin a Kadenan enggu pembalasan nin su apia entain a 'bpaginapasen nin i kapangilay nin sa lekanin. 7 Na sabap bun kanu salig'u Nuh na pinakikineg'in su kinapaingat lun nu Kadenan pantag kanu manganggula apia di nin pan 'gkailay. Tembu pinaginugutan nin su Kadenan ka minumbal sekanin sa kapal ka enggu nin makalipuas su ginawa nin taman den kanu sakambinabatan nin. Na sabap kanu entu a salig'in na nasugat'a kawagib su sakadunia ugaid'a sekanin na initimbang'u Kadenan a ikelas sabap sa sinemalig sekanin kanu Kadenan.
8 Na sabap sa aden salig'u Nabi Ibrahim kanu Kadenan na pinaginugutan nin su inisugu lun nu Kadenan a lemu sekanin kanu dalepa a inibpasad lun nu Kadenan. Na apia di nin katawan su pedtamanan nin na ginanatan nin bun su dalepa nin. 9 Na sabap bun kanu salig'u Ibrahim kanu Kadenan na migkaleben sekanin kanu kalupan a inibpasad'u Kadenan sa lekanin apia nia nin kaaden i nakalapu sekanin lu enggu nia nin bu pegkalebenan na balung-balung a tuleda.b Na apia su wata nin a su Iskak enggu su apu nin a su Yakub a pebpusakan bun kanu pasad'u Kadenan na balung-balung bun a tuleda i pigkalebenan nilan. 10 Na tinigkelan nu Ibrahim su entu kagina nia nin 'gkapaginagkay na su siudad a mabagel i udsadan nu palaus'in a nia migkahanda lun enggu napatindeg lun na su Kadenan. 11 Na sabap bun kanu salig'u Ibrahim kanu Kadenan na nakamuliataw sekanin sa apia matua den enggu su kaluma nin menem a si Sara na di embata. Pinaginugutan nu Ibrahim i tumanen nu Kadenan su inibpasad'in a embata si Sara. 12 Kagina ka maitu na su sakataw a nia a taw a su Ibrahim a matua den a benal na sekanin i nabpunan nu katupuan a mana kadakel'u bitun sa kawang-kawangan enggu kadakel'u pedtad sa dedsan a di magaga milang.
13 Na langun nu nia a manga taw na minatay silan a aden salig'in kanu Kadenan. Na apia da nilan pan matalima su manga inibpasad'u Kadenan kanilan kanu bibiag pan silan ugaid'a naalung'a ginawa nilan den su entu a 'gkapia i ginawa nilan ka 'gkatawan nilan man i aden gay a matalima nilan su entu a 'bpagingapan nilan. Na tinalima nilan kanu ginawa nilan i mana silan lapu sa dunia enggu penggagalu bu silan lun pegkakaleben. 14 Na su manga taw a maitu ba i kangadtalu nin na ipebpagilay nilan i pakapaginagkay silan sa dalepa a kagkalebenan nilan a madtalu a kanilan. 15 Na amaika nia nilan bun 'gkapagitung su ginanatan nilan a dalepa na mapakay pamun a benal a embalinganan nilan su entu. 16 Ugaid'a nia nin kabantang na nia nilan 'gkapaginagkay na su labi a mapia a kagkalebenan a su sulega. Na namba i sabap'in i su Kadenan na di nin ikaya a tawagen sekanin nu entu a manga taw sa Kadenan ka pinagadilan nin man silan sa siudad a kagkalebenan nilan.
17 Na sabap bun kanu salig'u Ibrahim kanu Kadenan na adil sekanin sa kagkurban nin kanu wata nin kanu kinabatalu lun nu Kadenan sa kagkurban nin lun. Na sekanin a pibpasadan nu Kadenan sa madakel a muliataw na adil a benal sa kagkurban nin kanu kaisa-isa nin a wata nilan kani Sara a si Iskak 18 apia nia nin kaaden i pidtalu sa lekanin nu Kadenan i “San makanggulalan kani Iskak su manga tupu a inibpasad ku sa leka.”c 19 Kagina nia 'gkatagu kanu ginawa nu Ibrahim na magaga nu Kadenan mapambibiag su minatay. Na mana maitu ba i nanggula nu Iskak ka mana minatay sekanin a nakambalingan 'bpaluman kanu Ibrahim. 20 Na sabap bun kanu salig'u Iskak na pinalihalan nin su Yakub enggu Isaw sa nia nin pidtalu kanilan na mapia i manggula-ula nilan sia kanu mangauma a timpu. 21 Na maitu bun su Yakub, sabap bun kanu salig'in na pinalihalan nin su manga wata nu Yusup kanu timpu a mangagan den sekanin matay. Dinemukum sekanin kanu tungked'in ka nangadap kanu Kadenan.d 22 Sabap bun kanu salig'u Yusup, na kanu timpu a mangagan den sekanin matay na pidtalu nin i makaawa su manga taw a Israil kanu dalepa a Egypt enggu inidtutuma nin pan i amaika gemanat den silan lu na edtapiken nilan mawa su manga tulan nin.e
23 Na sabap bun kanu salig'u manga lukes'u Musa kanu Kadenan na inipagena nilan su Musa sa nakatelu ulan ulian nu kinambata lun kagina nailay nilan i mapia a benal a wata su Musa. Dala silan kagileki sa nasungkang'ilan su kasuguan nu datu.f 24 Na maitu bun su Musa, sabap bun kanu salig'in kanu Kadenan na guna su migkasela den sekanin na inikias'in a tawagen sekanin a wata nu puteli a wata nu Piraun. 25 Nia nin tinemu i papegkapasangan sekanin a kaped'u manga taw nu Kadenan kumin kanu gagalu bu a matala nin a kapia na ginawa ugaid'a kabaladusan. 26 Na sia sa lekanin na nia masela a kakawasan na su unga nu kalasay sabap kanu Masih kumin kanu kakawasan nu Egypt. Kagina nia nin initagu sa ginawa na su matalima nin a balas sa mangauma pan a timpu. 27 Na sabap bun kanu salig'in na minawa sekanin sa Egypt enggu da sekanin kagileki kanu lipunget'u datu. Tinemigkel sekanin kagina mana nin bun 'gkailay su Kadenan a di 'gkailay. 28 Na sabap bun kanu salig'in na ininggulalan nin su Kanduli nu Kalipuas enggu su kinapangigul sa lugu kanu bengawan ka enggu di makalalagit'u 'bpaminasakan su kaka sa langun a manga wata nu manga taw a Israil.g
29 Na sabap bun kanu salig'u manga taw a Israil na nakalipag silan kanu Maliga a Lagat a mana silan minukit sa mamala a lupa. Ugaid'a guna pedtekaw 'bpelipag su manga taw a Egypt a 'bpaneled kanilan na nangaled silan.h 30 Sabap bun kanu salig'u manga taw a Israil na nalundus su alad'u siudad a Yariku ulian nu kinabalibet'ilan lun kanu dalem'u nakapitu gay.i 31 Na maitu bun ba, sabap bun kanu salig'i Rahab a babay a sundal na dala sekanin makaamung matay kanu manga taw a pedsungkang kanu Kadenan kagina pidsakaw-sakaw nin sa mapia su manga taw a Israil a 'bpanininting.j
32 Na nangasasangan den i entu a nalabit ku. Kulang den i kutika ku amaika edsinantalen ku pan su pantag kani Gidiun, Barak, Samsun, Ipta, Nabi Daud, Nabi Samuil enggu su ped pan a manga nabi 33 a sabap kanu salig'ilan kanu Kadenan na naagaw nilan su manga pendatuan, nakakamal silan sa wagib enggu natalima nilan su inibpasad'u Kadenan. Na sabap bun kanu salig'ilan na dala silan kapamungkaidani nu manga alimaw, 34 dala silan matutung kanu 'bpangalaw-kalaw a apuy enggu nakalipuas silan kanu kapatay sa ukit a galangan na sundang. Su ped kanilan na mangalubay ugaid'a pinagkabagel silan nu Kadenan, su ped menem na nabaluy silan a mabagel a pabubunua tembu natalaw nilan su manga lapu a manga pabubunua. 35 Aden bun manga babay a sabap kanu salig'ilan na mimbibiag 'bpaluman su manga wata nilan a minatay. Ugaid'a aden bun ped a pedsalig kanu Kadenan a pinakasakitan taman sa namamatay ka inikias'ilan su kapambaya-baya kanilan a nia nin sambi na kataligkud kanu salig'ilan kanu Kadenan. Na pinggula nilan i entu ka 'gkatawan nilan i aden labi a mapia a uyag-uyag sa sulega ulian nu kapambibiag 'bpaluman kanilan. 36 Su ped menem kanilan na pinagkaya, su ped na pinametay, su ped na sinangkalian enggu pinamilanggu. 37 Aden bun pinamalantay sa watu taman sa matay, aden bun pinangeget i lawas'in taman sa nangautas enggu aden bun pinangimatayan sa sundang. Su ped menem kanilan na 'bpelalakaw a mimbalegkas bu sa upis'a bili-bili enggu kambing, miskinan a benal, papegkapasangan enggu 'bpelasayn. 38 Su ped na 'bpamagena bu silan kanu manga tawan-tawan a dalepa enggu kanu manga palaw, lu silan pegkakaleben kanu manga takub enggu kanu manga lingkab'u lupa. Na di man a benal makadait kanilan su dunia.