Su Kinaikelas sa lekitanu sia Nakanggulalan kanu Kinagkurban nu Isa al-Masih kanu Ginawa nin
10
Na su kasuguan a inenggay nu Kadenan kanu Musa na alung-alung bu nu mangapia a pakatingguma. Tembu ba dili i entu makalimpiu sa talutup kanu taw a pedsupeg kanu Kadenan sia makanggulalan kanu kapedsasaluman nilan pegkurban uman lagun. 2 Ka amaika tidtu-tidtu a pakalimpiu kanilan su entu a manga kurban na nia dait na di nilan den magedam kanu ginawa nilan i baladusa pamun silan enggu di nilan den nasisita a edsasaluman pan 'gkurban. 3 Ugaid'a nia nin kabantang na su kapegkurban nilan a entu na papedtadem bu kanilan kanu manga kabaladusan nilan sa uman lagun. 4 Ka di man makapunas kanu kabaladusan nu taw su lugu nu manga sapi enggu kambing a inigkurban. 5 Tembu guna makauma su Isa al-Masih sia sa dunia na nia nin pidtalu kanu Kadenan na“Su manga kurban enggu su manga ibpagenggay na dikena entu su 'gkapangingalap'engka,
ka su badan a inadil'engka sa laki,
6 su manga kurban a pedtutungen langun enggu su manga kurban kanu kabaladusan
na dikena pakasuat sa leka.
7 Tembu nia ku pidtalu sa leka na ‘Hu Kadenan, sinemia aku ka enggu ku manggula su kahanda nengka
a mana bun su nakasulat kanu kitab pantag sa laki.’ ”a
8 Na kanu kinadtalu a entu nu Isa al-Masih sa dikena 'gkapangingalap'u Kadenan enggu dikena pakasuat lun su manga ipegkurban, su manga ibpangenggay, su manga kurban a pedtutungen langun enggu su manga kurban kanu kabaladusan apia ipenggulalan su entu sia luyud kanu kasuguan a inenggay kanu Musa 9 enggu iniuman nin pamun edtalu i “Hu Kadenan, sinemia aku ka enggu ku manggula su kahanda nengka,” na nia nin maena na iniawa nin den su nauna a ukit a kapegkurban ka enggu nin pakasambi su kagkurban nin kanu ginawa nin. 10 Na sabap sa inunutan nu Isa al-Masih su kahanda nu Kadenan na naikelas tanu nin sia nakanggulalan kanu nakaisa bu a entu a kinanggihad'in kanu badan nin.
11 Na su 'bpangurban na uman-uman gay na pegkurban sa pamagidsan bun a kurban a dikena pakapunas kanu manga kabaladusan a mana bun su nakasangan kanilan a galebekan. 12 Ugaid'a su Isa al-Masih na nakaisa bu i kinagkurban nin ka su kinanggihad'in bu kanu umul'in sa kaampun kanu manga kabaladusan tanu. Na di den nasisita su ped pan a kurban tembu ulian nu entu na nagagayan den sekanin lu tampal kanu kawanan nu Kadenan. 13 Na iganat sa entu ba na 'bpagingapan nin bun den su kapasugiud kanu manga kuntela nin kanu palad'u ay nin. 14 Kagina su nakaisa bu a entu a kinagkurban nin na nakalimpiu den sa talutup taman sa taman kanu manga taw a 'bpagikelasen. 15 Na inipangimbenal bun i entu nu Suti a Ruh sa lekitanu sa kinadtalu nin sa
16 “Nia katigan nu Kadenan na ‘Nia su kapasadan a pangadenen ku kanilan kanu mangauma a timpu:
Idalem ku kanu pamusungan nilan su manga kasuguan ku
enggu isulat ku su entu kanu itungan nilan.b’ ”
17 Pidtalu nin bun i
“Lipatanan ku den su manga kabaladusan nilan enggu su manga galebek'ilan a mawag.”c
18 Na kagina ka naampun den su manga kabaladusan na di den nasisita a 'gkurban pan sa kaampun kanu manga kabaladusan.
Su Manggula nu Taw a Awan nin sa Katagan su Isa al-Masih
19 Kagina ka maitu manga lusud ku sa tian, na sabap kanu lugu nu Isa al-Masih na makambaya-baya tanu den lemudep kanu Suti sa Langun a Bilik 20 sia kanu bagu a ukit a 'bpawang kanu uyag-uyag a da taman nin. Binukatan nin sa lekitanu su entu sia nakanggulalan kanu tidtu a kurtina a su badan nin. 21 Na kagina ka aden den labi a mabagel a mapulu sa langun nu 'bpamangurban sa lekitanu a su Isa al-Masih a 'bpangulu kanu manga taw nu Kadenan 22 na semupeg tanu kanu Kadenan sa senep sa atay a unut su tidtu-tidtu a salig kagina nalimpiu den nu lugu nin su atay tanu kanu manga mawag a nakadalem lun enggu nasalawatan den su badan tanu kanu ig. 23 Na edtindegan tanu sa mapia sa dala kandua-dua nin su inam a 'bpaginugutan tanu ka matidtu man su Kadenan a mibpasad sa lekitanu. 24 Paginapasen tanu su kasekat tanu kanu uman i isa sa lekitanu sa kagkakalimua enggu kanggula sa u ngin i mapia. 25 Di tanu idtalipenda su kandidilimudan tanu a mana su nalayaman den a penggulan nu ped enggu pagkabagelen tanu su ginawa nu uman i isa sa lekitanu, labi lawan den sa saguna a masupeg den a benal su gay a kambalingan nu Mapulu.
26 Kagina amaika edtitibaban tanu bun i kapapanalus tanu enggula sa kabaladusan ulian nu kinatalima tanu kanu tidtu-tidtu a bantang na da den kurban a makagkurban pan sa kaampun kanu kabaladusan tanu. 27 Ka nia den makatingguma na su sangat a pakagilek a kagkukum enggu su 'bpangalaw-kalaw a apuy a pedtutung kanu taw a pedsungkang kanu Kadenan. 28 Ka amaika su kasuguan nu Musa ka 'bpagimatayan sa di 'bpelatan sa nanam su apia entain a pegkias lun amaika makapaamad'u dua kataw atawa ka telu kataw a saksi, 29 na labi lawan den su kapasang'u siksa a dait a matalima nu taw a lemusak kanu Tunggal'u Kadenan enggu mawa sa katagan kanu lugu a minilut kanu kapasadan nu Kadenan a minikelas kanu taw enggu su magumpak kanu sangat a malimu a Suti a Ruh nu Kadenan. 30 Ka katawan tanu bun man a benal u entain i midtalu sa “Saki i mataw semuli, enggu saki i mataw mapapamayad.”d Pidtalu nin bun i “Kukumen nu Mapulu su manga taw nin.”e 31 Na sangat a makagilek i manggula nu taw a sugaten sa kawagib'u kaisa-isa nin a Kadenan a barakat.
32 Na nia nu 'gkakalendem na su nangaipus a manga timpu a su muna-muna a kinatuntay nu pantag kanu Isa al-Masih sa apia tinemala kanu sa manga mapasang a kamalasayan na natigkelan nu su langun nu entu. 33 Na su ped sa lekanu na pinagkaya enggu pinamungkaidanan sia kanu adapan nu madakel a taw. Su ped menem sa lekanu na inamungan nu su manga suled'u sa paginugut a pedtala bun sa kamalasayan 34 ka sangat a 'gkalat i nanam'u kanu manga suled'u sa paginugut a nangabilanggu. Na apia 'bpangagawn su manga kaaden nu na pedtaliman nu su entu sa maluwag kanu ginawa nu kagina 'gkatawan nu i aden pan labi lawan lun i kapia nin a kaaden a di 'gkadadag taman sa taman.
35 Tembu da kanu a benal semangkup sia kanu kasalig'u kanu Kadenan ka masela i balas a matalima nu. 36 Na nasisita man a temigkel kanu kagina ulian nu kanggula nu kanu kahanda nu Kadenan na matalima nu su manga inibpasad'in. 37 Ka mana bun su nadtalu kanu kitab a
“Di den man gaid mauget
na su inibpasad a pakauma na makauma den enggu di maangga su kauma nin.
38 Na su taw a matidtu a nalusud sa laki na maaden lun su uyag-uyag a da taman nin sia makanggulalan kanu salig'in.
Ugaid'a amaika taligkudan aku nin na di ku den sekanin kasuatan.”f
39 Ugaid'a sekitanu na dikena tanu lusud kanu manga taw a entu a pedtaligkud kanu Kadenan a 'gkangatadin den ka sia tanu nalusud kanu manga taw a mamakalipuas a aden salig'in kanu Kadenan.