Su 'Bpangadapan kanu Kadenan sia sa Dunia enggu lu sa Sulega
9
1-2 Na kanu nauna a kapasadan na aden inumbal a atulan pantag kanu kasimba kanu Kadenan enggu aden bun inumbal a 'bpangadapan kanu Kadenan. Na entu ba su pinatindeg a Balung-balung a Tuleda a 'Bpangadapan kanu Kadenan sia sa dunia. Na aden dua timan a bilik'u entu a nabpageletan na kurtina, na su ika-isa a bilik na bedtuan sa Suti a Bilik a lu ba su 'bpanaguan sa palitan enggu su lamisan a 'bpanaguan kanu pan a ipegkurban kanu Kadenan. 3 Na lu menem kanu bala nu nakapagelet a kurtina na su ikadua a bilik a bedtuan sa Suti sa Langun a Bilik 4 na lu ba su tudtugan a bulawan a pedtutungan kanu mamut a tutungen enggu su Kaun nu Kapasadan a linumbus sa bulawan magidsan i liu enggu ludep'in. Na nia dalem'u Kaun nu Kapasadan a entu na su 'bpanaguan a bulawan a tinaguan kanu pegken a bedtuan sa manna, su tungked'u Harun a inetuan na laun enggu su tebi na watu a nakaukil lun su manga kasuguan nu Kadenan. 5 Na nia menem lu kanu untul'u Kaun nu Kapasadan na su buntal'u manga malaikata a tanda a lu ba su Kadenan. Na nasilungan nu manga papak'ilan su dapeng a pebpesikan kanu lugu nu inigkurban kanu kabaladusan nu taw.b Ugaid'a saguna na di nami pan madsinantal sa mapia su pantag sa entu.6 Na guna mapasad mametad su langun nu entu na uman-uman gay na 'bpeludep su 'bpamangurban lu kanu Suti a Bilik ka ipenggulalan nilan su nakasangan kanilan lu a galebekan. 7 Ugaid'a su mapulu bu sa langun nu 'bpangurban i mapakay a makaludep lu kanu Suti sa Langun a Bilik a makaisa bu sa salagun. Na di sekanin mapakay a lemudep lu amaika dala makagkurban nin a lugu na binatang sa kanu manga kabaladusan nin enggu kanu manga kabaladusan nu manga taw a dikena pidtibaba. 8 Na su entu a penggulan nilan na ipebpagilay nu Suti a Ruh sa lekitanu i di pan makaludep su taw kanu Suti sa Langun a Bilik a lu sa sulega taman sa usalen pan su Balung-balung a Tuleda a sia sa dunia a 'Bpangadapan kanu Kadenan. 9 Na su manga penggulan nilan a entu na tuladan nu sagugunay a tidtu a 'gkambebetad ka su kabpagenggay nilan enggu su kapegkurban nilan na dikena pakalimpiu sa talutup kanu atay nu pedsimba kanu Kadenan. 10 Ka su entu na manga pegken bu enggu 'bpaginumen enggu embalang-balang bu a ukit a kabpelimpiu. Manga atulan bu a maliwawaw a penggulan kanu badan nu taw a ipenggulalan gagalu na di pan pakauma su bagu a ukit'u Kadenan.
11 Ugaid'a saguna na nakauma den su Isa al-Masih. Sekanin i mapulu sa langun nu 'bpamangurban sa lekitanu kanu labi i kapia nin a bagu a ukit a nakatingguma den saguna. Na lu sekanin linemudep kanu labi i kapia nin enggu talutup a Balung-balung a Tuleda a 'Bpangadapan kanu Kadenan a dikena inumbal'a manusia enggu dikena sia sa dunia. 12 Na nakaisa bu i kinaludep'in lu kanu entu a Suti sa Langun a Bilik enggu dikena lugu nu manga mama a kambing enggu manga sapi i inigkurban nin lu ka su lugu nin demun. Na sabap kanu entu na matalima tanu den su dala taman nin a kalipuasan.
13 Ka amaika su lugu nu manga mama a kambing, sapi enggu aw nu tinutung a manguda a sapi a ibpamesik kanu taw a ipedtimbang sa maledsik ka enggu masuti su badan nu entu a taw 14 na labi lawan den a makalimpiu su lugu nu Isa al-Masih kanu atay tanu sia kanu manga galebekan a pedtundan sa lekitanu sa kapatay ka enggu tanu nia manggalebek na su ngin i luyud sia kanu kaisa-isa nin a Kadenan. Ka sia nakanggulalan kanu kabarakat'u dala taman nin a Ruh nu Kadenan na ininggihad'u Isa al-Masih su umul'in a kurban a dala tila nin.
15 Na sabap sa entu na nabaluy sekanin a minalut kanu bagu a kapasadan kanu taw enggu kanu Kadenan asal'a su manga taw a pinamili nu Kadenan na matalima nilan den su inibpasad'u Kadenan a ipebpusaka nin kanilan a dala kapegkapupus'in. Kagina sia man nakanggulalan kanu kinanggihad'u Isa al-Masih kanu umul'in na nalipuas'in silan kanu kinasungkang'ilan kanu nauna a kapasadan. 16 Na mana bun i entu su sulat a nia lun nakadalem na su entain i pebpusakan. Na dait a maamad muna i minatay su mibpusaka, entu pan ka mapagumun su ipebpusaka. 17 Ka amaika matay den su entu, na entu pan ka aden bisa nu entu. Ka taman sa di pan matay su mibpusaka na da pan bisa nu entu a sulat. 18 Na maitu bun ba su nauna a kapasadan na dala kaludsui enggulalan taman sa da pan kapaigisi sa lugu. 19 Ka kanu timpu a kinapasad'u Nabi Musa mayag kanu manga kasuguan nu Kadenan kanu manga taw na kinemua sekanin kanu lugu nu inigkurban a sapi enggu kambing a sinimbulan nin sa ig. Kinemua bun sekanin sa tanul a ebpun sa bumbul'a bili-bili a pidsugan sa maliga ka inibalud'in kanu tangkayan nu sapak'u kayu a isupu ka inisumek'in kanu lugu a entu ka inipamesik'in kanu sinulatan kanu manga kasuguan nu Kadenan enggu kanu manga taw 20 sa nia nin pidtalu na “Nia ba su lugu a minilut kanu kapasadan nu Kadenan a inenggay nin sa lekanu enggu inisugu nin i kanggulalan nu lun.”c 21 Na pinamesikan nin bun kanu lugu su Balung-balung a Tuleda a 'Bpangadapan kanu Kadenan enggu su langun nu 'bpagusalen kanu kapedsimba kanu Kadenan. 22 Kagina nia nakadalem kanu kasuguan na timbang a su langun nu dait a pedsutin na sinuti sia nakanggulalan kanu lugu. Kagina amaika dala lugu a makaigis a kurban kanu Kadenan na dala bun kaampun kanu kabaladusan.
23 Tembu nasisita a sutin sa lugu na binatang a inigkurban su langun nu 'bpagusalen kanu kapedsimba kanu Kadenan a tuladan nu ngin i aden lu sa sulega. Ugaid'a su ngin i aden lu sa sulega na nasisita i kurban a labi i kapia nin kumin kanu langun nu entu. 24 Ka su Isa al-Masih man na dikena nia nin linudepan su Suti sa Langun a Bilik a inumbal'u manusia a tuladan bu nu ngin i aden lu sa sulega ka nia nin linudepan mismu na su sulega ka enggu makapamagelet sa lekitanu saguna kanu adapan nu Kadenan. 25 Na dikena bun pibpapalumanan nu Isa al-Masih 'gkurban su ginawa nin a mana su penggulan nu mapulu sa langun nu 'bpamangurban a Yahudi a uman salagun na 'bpeludep lu kanu Suti sa Langun a Bilik ka 'bpananggit sa lugu na binatang a inigkurban. 26 Ka amaika bu man ka nasisita a edsasalumanan nin enggula su entu na kadsasalumanan bun su kinatala nin sa kamalasayan iganat kanu kinapangaden sa dunia. Ugaid'a nakaisa bu man i kinasia nu Isa al-Masih sa dunia asal'a maaun tanu nin kanu kabaladusan tanu sia nakanggulalan kanu kinagkurban nin kanu ginawa nin kanu nangauli den ba a nia a manga timpu. 27 Na su langun nu manusia na mukit sa kapatay sa makaisa bu, entu pan ka kukumen nu Kadenan. 28 Na maitu bun ba su Isa al-Masih, nakaisa bu su kinagkurban nin kanu ginawa nin sa kaaun kanu madakel a taw kanu kabaladusan nilan. Na embalingan sekanin sia ugaid'a dikena den sabap sa kabaladusan nu taw ka sabap den sa kalipuas'in kanu manga taw a pakapagangapa a benal sa lekanin.